Lukas 12 - Fanawbuid tagsibaliwas Fakayabian

Sinu Tua Tam Fakalimuun

¹ Kadugenya ngayuk libuk taw andasug sas Isus, ay kanya fagayu gsidsikfitan. Ay Isus nalong taguna sat ngay tagadal te, “Lag gfaning taw Fariseu at fakamaninganun, aroro at fakamaninganun kata way sik famabia tinapay.

² Aroro fagayu at yud kalag umsure ban, ay fagayu at masuksukan umsaful ban.

³ Fagayu ay nalong sisad dulum umdungug ban sasad mayamag, ay fagayu ban taw dumungug ay naibugan sisad suluk.

⁴ “Ku ngay fagadgalangan, gfoyung au sa ayu te, lag kalimu tagfabul ay bilug, aroro at fagmakatuun tagfabul way lang ay bilug.

⁵ Gfoyung au ayu ay fakalimuun: ay fakalimuun Dius tua, aroro nu nafabul ay bilug kanya e fagmabalyananun yay gukas ay falad sas afuy daul. Anud, alimui fia anya.

⁶ “O nunda limak maya nu kabayad bunwa dua wayk salapi? Ay Dius wa nalyam nusdi sadik maya.

⁷ Ay anggan ay buk Dius natap wan. Lag am kalimu, aroro ay kamafanudan gtungud tuam ngay maya.

Nu Gfoyung tam Isus sa sangay Taw

⁸ “Ay glong au ayu te, nusnga sinu tagfoyung sa tiba te, ‘Gafanud au sas Isus,’ anggan au, Taw at Baguama, gfoyung kyangay ban sas Dius at ngay tagbarita te, ‘Kanya ku taw.’

⁹ Ay nusnga sinu yud gfoyung sa tiba te, ‘Gafanud au sas Isus,’ kwa yangay ban gfoyung sas Dius at ngay tagbarita te, ‘Kanya ku taw.’

¹⁰ Ay nusnga sinu at nalong at mauri sabaliwa angku, Taw at Baguama, Dius gfalyam yay. Ay dewa katanya, nusnga sinu at nalong at mauri sabaliwa at Masine fag Falad, Dius wa gfalyam ya.

¹¹ “Ay nu e nataban ayu sa sangay taw Udyu at bale fakafulan ay sa sangay tagfangguna ay sa sangay ke fagmabalyananun at daga salubangan, lag gafanawa te, ‘Tain ro siring em famalus, ay tain ro em longan?’

¹² Aroro ginanya ban at Masine fag Falad gfoyung sa ayu ay ngay longan ban at masine.”

Sik Maramraman fag Taw at Yud Amatanganan

¹³ Ay sanya fag ngay taw at sadi nalong sas Isus te, “Takamoyung, longi sa ku faduksay te, afudi wan em mama at ramraman ay foni angku ku ekwan.”

¹⁴ Ay Isus nalong anya te, “Duan sama! We taw nafili angku laman nanginsaful au at masine ay laman nangafud au ay ramraman.”

¹⁵ Ay Isus nalong sanya fag ngay taw at maful te, “Amatangani, lag am gfanganuran nusnge wain, aroro sik taw at leleg amafanud yap tua at ramraman.”

¹⁶ Isus nafoyung sik faydayuanan te, “Ebi, e sik taw maramraman. Ay siginan at gamasun ngayu at gutluan.

¹⁷ Ay kanya gamatangan te, ‘Tain ban ku fakamulun? Aroro kwe fagfasakboan ya tiba ku gutluan.’

¹⁸ “Ay kanya nalong te, ‘Nasaful kwan ku fakamulun. Nangiklas kban ku bale famoy ay gdog kyay nangawat labi yap tua aro taw. Ay sanya ban nu gfasakbo au ku gutluan ay ku ramraman.

¹⁹ Ay glong kban sa ku sadili te, Katsi ku ramraman ngayu tua, kasakan wa ban dewa ngayuk banwa. Kamato kway ban lang ay gfangon ay ginum ay anggan guseganan.’

²⁰ “Ay Dius nalong anya te, ‘Ida, o nunda wo e amatanganan ya! Katsi ro sad yabi namul kwan am falad. Nu katanya, sinu ban at nangagbilug am nafungsu fag ngay ramraman?’

²¹ “Katanya ban sik taw at nafungsu at ngay ramraman ste swa daga, ay wa ngap maramraman sas Dius.”

Isus at Foyungan sabaliwas Fagafanawaun

²² Sanya ginan, Isus nalong sat ngay tagadal te, “Lag am gafanawa te, daginan ban ay fakonun, ay ay lanbung.

²³ Aroro ay leleg at kamafanudan gtungud tua sik fakonun, ay ay bilug at kamafanudan gtungud tua sik lanbung.

²⁴ Amatangani te, sik ugak we tanum ay we gutluan ay we fungsuan. Dewa katanya Dius gfon tua gugat at fakonun. Ay ay kamafanudan gtungud tuam ngay manuk tungud.

²⁵ “Sinu am at mafafaaba ay leleg sik kadugayan sirut siginan ay fagafanawaun?

²⁶ Ay nu dway am mafafakamulun kadaul oma kanya fag fakamulun sirut, wain ya ro ay fagfamutun ay fagafanawaun sa tiba ay fakaylatun?

²⁷ “Amatangani ngay barugwak. Kanya wa gfakamulun ay wa kawat at lanbung. Ay glong au ayu te, nusnga fun Sulumun nasulun at tiba tungud at lanbung at masine nu kalag, kanya ya kamasine sik barugwak.

²⁸ Ay Dius nu gfae lanbung tua makmak katanya sa sangaba talun, dewa melo katsi, ay balabag ban e gukas wan sasad afuy, kaugat waro Dius nu gfon ayu ay lanbung. Ya maksvn nu gafanud am.

²⁹ “Lag gafanawa sabaliwa ay fakonun ay ay fanginum.

³⁰ Aroro fagayu taw at yud gtoglag Dius, kabavn grvbvy takatanya, ay ay Mama nasaful wan nusnge wain ay fagayudanun.

³¹ Abat ngate am gafanawa, ugatani yakman te, setain Dius nu gfagtainan fia ayu, ay Dius gfon ban sa ayu fagayu ay fagayudanun.

Tagsis Banwa fag Ramraman

³² “Lag am gafanawa, deyud am ngayu, aroro ay Mama naylat gfagtainan ayu.

³³ Falaoi ay ramraman ay foni at nagbulan sa sangay taw at yud e kwa. Katanya nu gbul am sik fagsuadan ramraman at yud karasras, ay anggan at yud e fakatabuan fag ramraman sas banwa. Aroro we madasug sanya ngay tagfangkamul, ay we fatung at manamin ay ramraman.

³⁴ Aroro nu inda ay ramraman, sanya yangay anggan ay amatanganan.

At Mafalganan fag ngay Fagsuguan

³⁵ “Mafalganani tua gugat ay lag gfarabung ay salung.

³⁶ Faningi sik ngay taw tagfanya tua at tagfayafun nu kafoli siginan sik fakadadwaan, ay kanya nu ndasug ay natuk sakbawan, at ngay tagfanya gluang tua vtv.

³⁷ Mauseganan ngay fagsuguan at mafuloan tua gugat gfanya at tagfayafun nu kadasug. Matuyan nu glong au ayu te, at tagfayafun namalganan at sadili ay namalunggung at ngay fagsuguan ay namon anya at yafun.

³⁸ Ay dewa at tagfayafun andasug sis wabilug yabi, ay dewa bagu kadulum, nu glag nu mafuloan tua, kanya fag ngay fagsuguan guseganan tua ban.

³⁹ “Amatangani te, sik taw nu nasaful di te, ginanya ro tagfangkamul nu kadasug sat bale, wa ro gfabayan nu gsakbo.

⁴⁰ Nu katanya, anggan am, mafalganani tua. Aroro nu kadasug au, Taw at Baguama, gina way ban am yud gamatangan te, kadasug kwan.”

At Matuyan ay at Mauri fag Fagsuguan

⁴¹ Pedru nainto te, “Em Fun, o sa way lang emi am fagyafadungugun am nafoyung fag faydayuanan, ay o mannga sa tuas fagayu taw?”

⁴² Ay tam Fun nabalus te, “Katatuy at matuyan ay at mamatanganan fag tagalaga. At tagfayafun nasugu anya te, ‘Alagai ku ngay fagsuguan ay fafangoni tua anya fagayu galay fanfangonan.’

⁴³ Mauseganan kafag fagsuguan, gina at tagfayafun kadasug, nu gfakamulun tua fia at fakamulun.

⁴⁴ Matuyan nu glong au ayu te, at tagfayafun namatigwanan sanya fag fagsuguan fagayu at fagagbilugun.

⁴⁵ “Ay sik fagsuguan nu mauri way, kanya gamatangan way te, ‘Glugo yay ban ku tagfayafun nu guli,’ ay gfasigad gfalang at iba fag ngay fagsuguan mangama ay mangena, ay kon ay ginum ay glanguan.

⁴⁶ At tagfayafun umdasug gina kanya fag fagsuguan yud mafalganan fag menit ay fag buknga, ay namaurianan anya maksvn, ay namalo sat yud gafanud fag ngay taw.

⁴⁷ “Sik fagsuguan, dewa nasaful at tagfayafun at fakaylatun, nu dway gfaning ay nu dway gfakamulun at fanambagun, kanya ban gafaurianan maksvn.

⁴⁸ Ay sik fagsuguan nu dway nasaful at tagfayafun at fakaylatun, at fakamulun dewa sak gafaurianan, di maksvn nu gafaurianan. Nu ngayu way at nafon sa sik taw, ngayu yangay ban at fagnamulun siginan anya. Ay nu ngayuk fanambagun at nafatigwanan sa sik taw, ngayu tua ban nangus at nafakamulun.”

Ngay Taw Ginkafudan Aroro sas Isus

⁴⁹ Isus nalong te, “Andasug au, laman namuba sik afuy sas fagdaul daga, ay ku fakaylatun nangus ku ba afuy gigang wan.

⁵⁰ Ay gina ban nangafasludan takatanya, nandalan kyay ngayuk fagidapun.

⁵¹ O gamatangan am te, ku fagindasugun namae fagmanabayanun au ngay taw ste swa daga? Duan. Gfoyung au ayu te, ku fagnastaeun, namainkafudan kway ngay taw.

⁵² Siginan katsi si sik bale at taw nu lima, at tulu namawayan at dua. Ay at dua namawayan sat tulu.

⁵³ Ay sik mama gfawayan at baguama, ay sik baguama namawayan at mama. Ay sik mina namawayan at baguina, ay sik baguina namawayan at mina. Ay sik nugangina namawayan at nugang, ay sik nugang namawayan at nugangina.”

Masine nu Saful tuam Takafasludan Katsi fag ngay Menit

⁵⁴ Isus glong sa sangay taw te, “Nu nalag am sik linyabu nu kasure siginans fakayabian, glong am te, ‘Karak ro.’ Ay katanya ro at kumdasug.

⁵⁵ Ay nu namatang am tagsiginans alvngvdan fag tagmara nu gtayuk ayu, glong am te, ‘Masugba ro,’ ay katanya wa fia.

⁵⁶ Sik ngay takamaningan am! Nasaful oma am at fakasafulan sa tam daga ay tam kiwang, ay wain ay fagyudun saful katsi fag ngay menit at masuad?

Rvbvyi at Matuyan fag Fakamulun

⁵⁷ “At masine nu gfili tuam at matuyan fag fakamulun.

⁵⁸ Kaduge tagfantabugan gtaban emu sas funan, at masine ugatani wa fasinei sa anya gina yayam glao, laman wo sak gatabanan sas tagwabilug, ay tagwabilug wa sak gfadasug emu sas tagulit laman ro wa gubung emu.

⁵⁹ Glong au emu te, wa ban o umkalfas, yakmay ban o nabayad fagayu am bedan.”