Lukas 11 - Fanawbuid tagsibaliwas Fakayabian

Isus at Foyungan sabaliwa nu Gdarangin

¹ Sik menit, Isus gdarangin si sik talun, ay nu ntabu wan nu gdarangin, at sadi at tagadal nalong anya te, “Em Fun, foyungi emi tagdarangin kata ebi Uan nu gfoyung sat ngay tagadal.”

² Ay Isus nalong te, “Katatuy nu gdarangin am: Em Mama, Ngay taw nangus sumeg tua am ngayan, ay masine nu gfagtainan tuo ngay taw.

³ Foni emi em fakonun kayu menit,

⁴ ay falyami em ngay asalanan, kata nu gfalyam ami em ngay iba at asalanan sa emi. Ay dirii emi laman dimi gafaskudan sas asalanan.”

⁵ Isus nalong sa anya fagayu te, “Ay am, nu e fagadgalangan am, ay nu ndasug am sat bale swabilug yabi ay get am sa anya te, ‘Sama, foni angku sik fakonun,

⁶ aroro e faduksay au at bagu kadasug, ay kwa e famayafun,’

⁷ o ay fagadgalangan ro gbalus ayu siginan sad bale te, ‘Lag o gfafulawan ya angku. Nadingding kwan ku sakbawan, ay ku sisian maful si angku si em igyan. Kwa makaabangkad ya laman namon au emu am fagetun.’ O katanya ro at longan? Duan.

⁸ Glong au ayu te, kanya dewa kauri kalindug laman namon ayu, aroro kanya ay fagadgalangan, kanya ro nangalindug fia ay namon ayu ay fagetun, aroro gurungan am get.

⁹ “Nu katanya, glong au sa ayu te, eti, ay gfon ro sa ayu. Rvbvyi, ay lumag am. Atuki, ay gluang ro laman sa ayu.

¹⁰ Aroro fagayu taget mul ban fia. Ay fagayu tagrvbvy lumag tua ban fia. Ay fagayu takatuk e lumuang waban fia laman sa anya.

¹¹ “Am fag ngay mama, ay sisian nu get sik albon, o abat ngate ro am namon sik albon, o namon ro am anya sik ule? Duan, o kin?

¹² Ay ay sisian nu get sik iklug, o namon ro am anya sik agipan? Duan.

¹³ Ay dewa am sik ngay mauri fag taw, saful tuam gfon at masine sa ay sisian, ay ay Mama sas banwa, gtungud yay nu gsaful gfon at Masine fag Falad sas nusnga sinu taget sa anya.”

Isus ay Satanas

¹⁴ Isus gaiyan siginan sik taw sik mauri fag falad gfayud maringang, ay arodi maringang wan. Ay sanya fag ngay taw andulo.

¹⁵ Ay tiba nalong te, “At fagmabalyananun gaiyan mauri fag ngay falad siginan way Lango at Fun, kanya mauri fag ngay falad at fun.”

¹⁶ Ay tiba kaylat namaskud Isus, ay get laman gfalag sik mabalyanan fag fakamulun siginans banwa tagfatoglag te, Dius at nasugu anya.

¹⁷ Isus nasaful kafag ngay taw at amatanganan ay nalong anya te, “Kayu fun at fagfagtainanan fag ngay taw nu gawayan way, abandi kalyam wan kanya fag fagfagtainanan. Ay sik talafuan nu gawayan way gugat, abandi ban sumaruayan way.

¹⁸ Ay Satanas nu gfawayan way at sadili, wa ban gtaglayun at fagmafunanun. Nalong au katanya aroro glong am te, ku fangaiyan at mauri fag ngay falad siginan ways Lango at Fun at fagmabalyananun.

¹⁹ Ay ku fagmabalyananun gaiyan at mauri fag ngay falad, nu siginan way Lango at Fun, daginan way ay ngay taw at fagmabalyananun at fangaiyan mauri fag ngay falad? Ay ngay taw at fakamulun gfatuyan te, wa matuyan ay longan.

²⁰ Ku fagmabalyananun gaiyan mauri fag ngay falad nu siginan tua Dius at fagmabalyananun, at masuad, Dius at Fagfagtainanan andasug si ayu.

²¹ Sik mabalyanan fag taw nu e famawayan, ay nu naulit at bale, we tagfangkamul kadasug sanya.

²² Ay tibak taw tagtungud yay nu mabalyanan nu nafawayan ay nababo anya, namul kafag taw at fagsegun at famawayan ay nangafud at nabul fag ngay ramraman.

²³ Nusnga sinu at yud gfadiuganan angku, kanya ku fawayan way. Ay nusnga sinu at yud ggubuk angku gfaful ngay taw, gfasaruayan way.

Sik Mauri fag Falad Gdog yay Kafoli sat Bale

²⁴ “Sik mauri fag falad nu naubun at fagbanwanan fag taw, nalo sa sangay talun at yud e mamam, laman nanrvbvy tibak fagbanwanan. Ay nu dway e nalag, kanya gamatangan te, ‘Kafoli kyay siring sa ebi ataw ku bale.’

²⁵ Ay nu ndasug wan, manlag di malanu ay masine.

²⁶ Ay kafag mauri fag falad gdog yay nalao ay nataban yay fitu yak mauri fag falad tagtungud yay anya nu mauri. Ay kanya fagayu namanwan sanya fag taw, ay kafag taw nu mauri aksvn yap ebi ataw.”

At Matuyan fag Fagmasineun

²⁷ Kaduge Isus garingang, sik mangena gbia nu nalong siginan swa taw te, “Mauseganan kafag mangena at nafasalug emu, ay at nafasusu emu ebi.”

²⁸ Ay Isus nalong te, “Kaugat yay nu mauseganan tagdungugan Dius at Longan ay gfaning.”

Tibak Taw Udyu Kaylat Gyalagun sik Mabalyanan fag Fakamulun

²⁹ Kaduge sanya fag ngay taw gfasidsikfitan lang Isus, Isus glong te, “Mauri wayam, gyalagun am sik mabalyanan fag fakamulun tagfatoglag te, siginan aus Dius. Ay wa ban e gfalag ya sa ayu takatanya sas day at kinfasludan sas Dius at taglong Unas.

³⁰ Ebi Unas at fakamulun sik ke fakatoglagan fag fakamulun sas taw Ninibe, kata yay angku, Taw at Baguama, ku fakamulun, sik ke fakatoglagan fag fakamulun sa ayu.

³¹ Ay anggan talun Seba at fun fag mangena, gdog yangay ban gleleg gasfuan ayu gina ban fanginsafulan asalanan fag menit ay lumong ban te, mauri am, aroro kafag mangena ndasug sas fun Sulumun siginans fungfung daga, laman nandungugan fun Sulumun at mamatanganan fag ngay longan. Ay amatangani, at kindasug ste katsi, gtungud yay fun Sulumun, ay dewa katanya, wam kaylat gdungugan anya.

³² “Ay ebi fag ngay taw Ninibe gdog yangay ban gleleg gasfuan ayu gina ban fanginsafulan asalanan fag menit, ay glong ban te, mauri am. Aroro ngay taw Ninibe naubun tua at ngay asalanan gina nadungug Unas at foyungan. Ay amatangani, at kindasug katsi gtungud yays Unas, ay dewa katanya, wam gubun ay ngay asalanan.

Tam Bilug at Salung

³³ “We taw namasalung sik salung ay namasas daga bale ay nanuklub sik alungkung nu bunway namasa tuas fagfatungkudan, laman ngay taw nu nasakbo lumag at damlag.

³⁴ Am mata am bilug at salung. Nu malyo tua am mata, fagdaul am bilug mayamag yangay. Ay am mata nu dway malyo, am bilug madulum way.

³⁵ Nu katanya, mataganani, laman am amatanganan te, am mayamag, bunwa fagmadulumun.

³⁶ Fagdaul am bilug nu mayamag tua, ay nu ddi e afud madulum, kanya masulo tua, kata sik salung at damlag nu gyamag emu.”

Isus Gagras ngay Taw Fariseu ay Tagfoyung Muisis at Faugali

³⁷ Kaduge Isus garingang, sik taw Fariseu nagewan Isus laman gfasfuan anya nanfangon. Ay Isus nasakbo ay nafangon.

³⁸ Kafag taw Fariseu andulo daul nu nalag te, Isus wa gfaning at mangaguyang at faugali tagfegus at daluap gina nanfangon.

³⁹ Ay tam Fun nalong anya te, “Am, ngay taw Fariseu, gfegus am ay faginuman fag taya ay ay laman at guyuy. Ay ay basad taw mapnu fagfangalabianun ay fagmauriun.

⁴⁰ “Wam mamatanganan! O nunda wam nasaful te, at nawat at guyuy, kanya yangay at nawat anggan at basad.

⁴¹ Foni tua sat yud e kwa laman masine tua fagayu tagsi ayu.

⁴² “Ida, am fag ngay taw Fariseu, aroro dewa am gfon at fasafuluk afud sas Dius siginan ay balanuy ay ay banglad ay fagayu ay famaebebanglu ay fakonun, nalyam wayam gfakamulun at matuyan sa ay iba, ay nu kesug am Dius. Nu ddi am nalyam at mafanud fag ngay suguan, dangay kalyam anggan talay fag ngay suguan.

⁴³ “Ida, am fag ngay taw Fariseu, aroro ay fakaylatun at masine fag ngay faglunggungan sa sangay bale fakafulan, ay gina am sis wabilug furuan, kaylat am ngay taw nu gseg ayu.

⁴⁴ “Ida am, aroro kata am sik ngay fagfolian at yud kalag, ay ngay taw taglao sanya wa saful te, e fagfolian.”

⁴⁵ Sik tagfoyung Muisis at Faugali nalong sas Isus te, “Takamoyung, nu nalong o katanya, gagras wo anggan emi.”

⁴⁶ Ay Isus nalong te, “Ida am, tagfoyung Muisis at Faugali, aroro gfafasanan am sas fagayu taw at mabyat fag famubaun at yud kamad, ay wam ggubuk, nusdi am glangbud sumyu.

⁴⁷ Ida am, aroro kawat wayam Dius at ngay taglong at fagfolian. Ay ay ngay mangaguyang yay ebi at nafabul kanya fag ngay taglong.

⁴⁸ Ay anggan am, gfadiuganan wayam ay ngay mangaguyang at fakamulun, aroro kanya at nafabul, ay am wan at nawat at fagfolian.

⁴⁹ Nu katanya, siginans Dius at fagsafulun, nalong te, ‘Sumugu au ku ngay taglong ay ku ngay nasugu sa sangay taw Udyu. Kanya ban gfabul kafag ngay taglong tiba, ay tiba ban gfauri.’

⁵⁰ Nu katanya, e faurianan ban am aroro fagayu Dius at taglong at kinbul, siginan ngays fakasigadan tam fagdaul daga,

⁵¹ siginan ebi at faurianan sat nafabul Abel anggan at faurianan sat nafabul Sakaryas. Kanya nbul sis wabilug fagirugan fanggalangun ay Dius at bale. Matuyan, glong au ayu te, e faurianan ban am aroro takatanya fag fakamulun.

⁵² Ida am, tagfoyung Muisis at Faugali, aroro gsuksuk wayam fagsafulun at fanluang. Ay am, wam nasakbo, ay gsalag wayam takaylat gsakbo.”

⁵³ Isus nu galoun wan sanya ginan fag bale, kafag ngay tagfoyung Muisis at Faugali ay ngay taw Fariseu maksvn nu kadotama anya, ay kanya fagayu malayun nu ginto fagayu at fakaylatun sa anya,

⁵⁴ aroro grvbvy at balyawvtan laman magamat anya siginan at longan.