Lebitiku 9 - Fanawbuid tagsibaliwas Fakayabian

Tagfon Fanggalangun nu Gfasigad Gfakamulun

¹ Sis fawaluk menit nu ntabu gfadante ngay tagfon fanggalangun, Muisis nafauro Arun ay at ngay baguama ay fagayu fagtainan sis Israel.

² Muisis nalong sas Arun te, “Buli sik riangan baka tama, ay sik tama tupa yud e malong, ay foni sas Yawi laman sik fanggalangun. Kanya fag baka sik fanggalangun laman famalyam asalanan, ay kafag tupa laman sik fagirugun fag fanggalangun.

³ Sanya ginan, longi sa sangay taw Israel te, ‘Bubai sik kambing tama laman sik famalyam asalanan fag fanggalangun. Bubai yangay sik tama baka ay tupa tagsadik banwa, ay yud e malong laman sik fagirugun fag fanggalangun.

⁴ Bubai yangay sik tama baka ay sik riangan tupa, laman sik fanggalangun laman sas fagmanabayanun. Kanya gfon kafag ngay fagbaugun gasfuan sik rawvg at mafasuglatan langis, aroro katsi fag menit Yawi nafasure sa ayu at fagmasineun.’ ”

⁵ Nu katanya, ngay taw Israel nabuba kafag ngay fagbaugun sas Yawi at bale at daga salubangan kata Muisis at suguan. Ay ngay taw Israel anful sis Yawi at daga salubangan.

⁶ Muisis nalong sa anya fagayu te, “Katanya Yawi at nasugu ayu ay fagnamakamulunun laman gfalag sa ayu at fagmabalyananun.”

⁷ Sanya ginan, Muisis nalong sas Arun te, “Akbangi sas fagirugan ay foni famalyam asalanan fag fanggalangun, ay anggan fagirugun fag fanggalangun, laman famalyam am asalanan ay anggan am ngay kalongan at asalanan. Foni yangay ngay taw at fanggalangun kata Yawi at suguan, laman anggan ngay taw at ngay asalanan umkalyam yangay.”

⁸ Ay Arun ankakbang sas fagirugan ay nafabul at fanggalangun fag baka tama riangan laman famalyam asalanan.

⁹ Ay at ngay baguama nabuba sa anya kafag fanggalangun at taguk, ay Arun nafasurung at sumyu sas taguk ay naramsig sa sangay sunge tagsis fagirugan at ngay fugungan, ay at sawad fag taguk nabusbus sas daga fagirugan.

¹⁰ Sanya ginan, Arun nairug sas fagirugan kafag fanggalangun at taba, ngay amuslun, ay dangdangun, kata Yawi at suguan sas Muisis.

¹¹ Ay kanya nairug kafag fanggalangun at yamas ay at balat sas day fag fagmafulan.

¹² Sanya ginan, Arun nafabul yangay fagirugun fag fanggalangun. Ay at ngay baguama nafon sa anya kanya fag fanggalangun at taguk ay Arun nafaramsig kafag taguk sas fagirugan at ligung.

¹³ Ay at ngay baguama nafon yangay sa anya at nagatvng fag ngay yamas, anggan at alfuyu, ay kanya nairug kanya fagayu sas fagirugan.

¹⁴ Arun nafegus kafag fagbaugun at basad ungdan ay at ngay si, ay nairug kanya fagayu sas fagirugan gasfuan tiba yak afud fanggalangun.

¹⁵ Arun nabuba yangay ngay taw at fanggalangun. Ay nafabul ngay kambing kafag ngay taw at fanggalangun laman famalyam at ngay asalanan, kata at nafakamulun gina gfon at fanggalangun laman famalyam at sadili asalanan.

¹⁶ Ay kanya nabuba sas wabilug fagmafulan kafag ngay fanggalangun, ay nairug kata at faugali.

¹⁷ Kanya nabuba yangay sas wabilug fagmafulan at fanggalangun famauseganan Yawi. Ay kanya nabul sik galumut fangawat tinapay ay nairug sas fagirugan gasfuan ngay fagirugun fag ngay fanggalangun tagsis balabag baliwa nu girug.

¹⁸ Ay Arun nafabul yangay sik tama baka ay sik tama tupa ngay taw at fanggalangun laman sas fagmanabayanun. Ay at ngay baguama nabuba sa anya kafag ngay fanggalangun at taguk, ay kanya nafaramsig sas fagirugan at ligung.

¹⁹ Ay fagayu taba siginans liug, tagsis basad ungdan, ngay amuslun ay dangdangun,

²⁰ Arun at ngay baguama nafoli sa sangay fagbaugun at tungud dubdub. Sanya ginan, Arun nairug fagayu taba sas fagirugan fanggalangun.

²¹ Kata Muisis at suguan, Arun nafabat kafag ngay fanggalangun at ngay dubdub ay at siun fag balangbang laman sik fagfabatun fag fanggalangun.

²² Arun nu ntabu gfon ngay fanggalangun, nafabat at take ay nafadante ngay taw, ay kanya naduksun siginan at fagirugan fanggalangun fag suluk.

^23-24 Sanya ginan, Muisis ay Arun nasakbo sas Yawi at bale. Ay duksay nu naduksun, nafadante ngay taw. Ay Yawi nafasure at fagmabalyananun sa sangay taw siginan sik afuy ay nairug fagayu at fanggalangun sis fagirugan. Ngay taw nu nalag takatanya, kanya fagayu guro guseganan ay narungan naseg Yawi.