Lebitiku 7 - Fanawbuid tagsibaliwas Fakayabian

Famalyam Asalanan fag Fanggalangun

¹ Katatuy at ngay faugali sabaliwas fanggalangun famalyam asalanan kanya at mafilian fia fag fanggalangun:

² Fabuli kafag fanggalangun sis fagfabulan ngay fagirugun fag ngay fanggalangun. Ay at taguk faramsigi sas fagirugan at ligung.

³ Ay fagayu at taba gfon laman sik fagirugun fag fanggalangun: tagsis liug fag taba, ay tagsis basad ungdan fag taba,

⁴ ay at amuslun fagdua, ay tagsis balangbang fag taba, ay anggan tagsis dangdangun fag taba.

⁵ Kanya fagayu girug kafag ngay fanggalangun laman sik fanggalangun sas Yawi. Kanya famalyam asalanan fag fanggalangun.

⁶ Ngay tagfon fanggalangun at ngay baguama masine way kon kanya fag fanggalangun at sawad, dewa katanya, kanya fagayu nu nangon sa tua Yawi at bale at basad alad, aroro kanya fag fanggalangun sik mafilian fia fag fanggalangun.

⁷ Katanya yangay at faugali sabaliwa famalyam ay famayad asalanan fag ngay fanggalangun. Ay kanya fag ngay fanggalangun at yamas ngay tagfon fanggalangun at afud.

⁸ Ay anggan fagirugun fag fanggalangun at balat ngay tagfon yangay fanggalangun at afud.

⁹ Anggan ngay fanggalangun fag ngay rawvg at nasanglay sas awali, laman famauseganan Yawi, ngay tagfon fanggalangun yangay at afud.

¹⁰ Ay fagayu famauseganan fag ngay fanggalangun dewa mafasuglatan langis ay deyud mafasuglatan, kanya fagayu Arun at ngay kasugfunanan fag ngay tagfon fanggalangun at afud, ay nangafudan fia gsudsudan.

Fanggalangun laman sat Nasadian

¹¹ Katatuy ngay faugali sabaliwa nu gfon fanggalangun laman sas fagmanabayanun sas Yawi:

¹² Sik taw nu nafon sik fanggalangun laman sas fagmanabayanun sas Yawi, ay aro taw kanya fag fanggalangun sa way famauseganan fag fanggalangun, kanya masine nu gfamut yay sik tinapay. Kanya gfon sik tinapay at yud e famabia; ay at madamvl fag tinapay at mafasuglatan langis, ay at mayangfis fag tinapay at mararusan langis, ay tinapay siginan at masine fag fangawat at mafasuglatan langis.

¹³ Saman ya kanya, kanya gbuba yangay tinapay at ke famabia.

¹⁴ Kanya gfon kanya fag ngay tinapay laman at fanggalangun sas Yawi. Ay kanya fag ngay fanggalangun laman sa sangay tagfon fanggalangun tagfaramsig ngay fanggalangun at taguk laman sas nasadian.

¹⁵ Sik taw nu nafon at fanggalangun laman gfauseganan, kanya masine way kon at fanggalangun ginanya yay fag menit gasfuan at talnayan, ay anggan ngay tagfon fanggalangun, ay kanya wa masine gfasawad laman ban sas balabag.

¹⁶ Dewa katanya, kafag taw at fanggalangun nu nafon way laman namafafasludan at fatuyanan ay mannga laman sas nasadian, oni wan kanya fag yamas ginanya yay fag menit, at sawad kanya yay ban at fakonun sbalabag.

¹⁷ Ay nu e sawad yay anggan sis fatuluk menit, irugi wan.

¹⁸ Ay sik taw nu naon kafag nagsawadan gina sis fatuluk menit, wa mauseganan ya sas Yawi kafag fanggalangun, aroro umsik yud e tungkul wan ay umsik masuya. Ay nusnga sinu at naon, umfaurianan kata at nafakamulun.

¹⁹ Ay kafag fanggalangun at yamas nu ntayuk way sas nusnga setaw at masuya deyud sis algan, wa masine ya kon kafag yamas, irugi wan. Ay at masine kon kafag fanggalangun at yamas at sawad, nusnga sinu way lang at natuyan te, matuyan.

²⁰ Dewa katanya, nusnga sinu fag taw at natuyan te, at masuya, ay naon kafag fanggalangun, lag am gtuyan ya te, ay gaban.

²¹ Nusnga sinu fag taw at nated nusnge wain at masuya, kata taw at kek, fagbaugun at kek, ay tiba yak masuya, ay arodi kanya naon way ngay yamas laman fanggalangun sas Yawi, tuyani anya te, bunwa ya ay gaban.

Nu Gsalag sabaliwa nu Kon Taguk ay Taba

²² Yawi nasugu Muisis

²³ laman nanlong yangay sa sangay taw Israel te, Lag kon baka, tupa ay kambing at taba.

²⁴ Masine wayam gfasuglat ngay taba tagsiginan ngay fagbaugun at kinbul, ay tibak mangilafang at nafabul, dewa katanya, wam masine kon kanya fag ngay taba.

²⁵ Nusnga sinu fag taw at naon fagirugun fag taba laman fanggalangun sas Yawi, tuyani anya te, bunwa ya ay gaban.

²⁶ Nusnga nday ban nu gbanwan am, lag am kon ngay fagbaugun ay anggan ngay manuk tungud at taguk.

²⁷ Nusnga sinu fag taw at naon taguk, tuyani anya te, bunwa ya ay gaban.

Ngay Tagfon Fanggalangun at Afud

²⁸ Yawi gfataglayun gsugu Muisis

²⁹ laman nanlong sa sangay taw Israel te, Nusnga sinu fag taw at namon at Fanggalangun laman sas Nasadian, masine kanya nu gfasaman sik afud laman sas Yawi.

³⁰ Ay kanya wan fag taw at namuba sas fagirugan at nafasaman fag fanggalangun laman sas Yawi. Kanya gbuba yangay at fanggalangun at taba ay at dubdub sas fagirugan, ay gfabat kafag mangilafang at dubdub sis Yawi at daga salubangan, laman gfon at nafasaman fag fanggalangun.

³¹ Ay at fun tagfon fanggalangun girug kafag fanggalangun at taba sas fagirugan, dewa katanya, kanya fag fanggalangun at dubdub, foni wan sas Arun talamean, laman at afud.

^32-33 Ay kafag fanggalangun at siun fag balangbang foni sa tagfon fanggalangun at nairug kafag fanggalangun at taguk ay at taba.

³⁴ Aroro kanya fag fanggalangun at dubdub, Yawi at fon sas Arun ay sat kasugfunanan. Kanya at mafalganan fag afud laman sa anya fagayu siginan ay fanggalangun kabavn ban.

³⁵ Kanya wan fag ngay afud fanggalangun ay fon laman sas Arun ay sat ngay kasugfunanan, gina ban nafili anya fagayu laman sik ngay tagfon fanggalangun laman sas Yawi.

³⁶ Gina gfadante ngay tagfon fanggalangun, Yawi nasugu sa sangay taw Israel te, “Foni sa sangay tagfon fanggalangun at mafalganan fag afud laman sa anya fagayu, ay masine nu gfafasludan am takatanya fag faugali kabavn ban.”

³⁷ Katanya at faugali sabaliwa ngay fanggalangun kata fagirugun fag fanggalangun, fanggalangun laman famauseganan, fanggalangun famalyam asalanan, fanggalangun famayad asalanan, fanggalangun sa nu gfadante, ay fanggalangun laman sas fagmanabayanun.

³⁸ Yawi nafon kafag ngay faugali sas Muisis sis Buksul Sinay. Gina Yawi nasugu sa sangay taw Israel te, foni sa anya ngay fanggalangun.