Lebitiku 5 - Fanawbuid tagsibaliwas Fakayabian

¹ “Ay nu nafauro sik taw sas faginsafulan laman namatuyan kata at nalag at kinfasludan, ay kanya nu dway nasanya, kanya e asalanan wan.

² Nusnga sinu fag taw at nated nusnga setaw at masuya, kata at kinbul fag mangilafang, dewa at mela ay at magup, kanya deyud nasaful te nated, kanya e asalanan wan.

³ Ay nusnga sinu fag taw at nated sik masuya siginan sik taw at bilug ay deyud nasaful te nated, kanya sik masuya wan ay e asalanan wan.

⁴ Ay sik taw nu nabanganan way nu gfatuyanan, dewa masine ay mauri at fatuyanan, ay nu nasaful at fakamulun takatanya, kanya e asalanan wan.

⁵ Sik taw nu nasaful te, nafakamulun way at fagsalagun fag ngay fakamulun, masine kanya nu gfoyung at asalanan.

⁶ Ay masine nu namon sas Yawi sik tina tupa ay mannga sik tina kambing laman at fanggalangun. Ay tagfon fanggalangun namon sas Yawi kafag fanggalangun laman famalyam kafag taw at ngay asalanan.

⁷ “Dewa katanya, kanya fag taw way makatu gfon sik tupa laman at fanggalangun, foni duak labikung ay mannga duak udkuruan; at sadi famalyam at asalanan ay at sadi at fagirugun fag fanggalangun.

⁸ Ay kanya namuba at fanggalangun sa tagfon fanggalangun ay taguna ro at fagnamonun famalyam asalanan. Ay kanya gbilus kafag manuk tungud at liug, dewa katanya, ya gfalifung.

⁹ Ay kanya ro gfaramsig kafag fanggalangun at taguk sas fagirugan at ngaba ligung, ay at sawad fag taguk gugwag sas daga fagirugan. Kanya famalyam asalanan fag fanggalangun.

¹⁰ Ay tagfon fanggalangun girug yangay at faduak labikung, kata at faugali sabaliwa nu girug takatanya fag fanggalangun. Katanya tagfon fanggalangun at fakamulun laman Yawi gfalyam ngay taw at ngay asalanan.

¹¹ “Dewa katanya, kanya fag taw nu dway makatu gfon duak labikung ay mannga duak udkuruan, masine kanya nu gbuba duak fabudbungguan fangawat tinapay, at yud e suglat langis ay famaebebanglu, aroro kanya sik fanggalangun laman famalyam asalanan.

¹² Ay kanya ro namuba at fanggalangun fag fangawat tinapay sa tagfon fanggalangun ay tagfon fanggalangun ro gbul sik galumut ay girug sas fagirugan, laman ngay taw gamatang tua gugat Yawi. Ay girug yangay sik galumut gasfuan tibak fanggalangun laman sas Yawi. Katanya famalyam asalanan fag fanggalangun.

¹³ Katanya tagfon fanggalangun at fakamulun laman Yawi gfalyam kafag taw at ngay asalanan. Ay at sawad fag fangawat tinapay, kanya tagfon fanggalangun at afud, kata at nafakamulun sas famauseganan fag fanggalangun.”

Famalyam Asalanan fag Fanggalangun

¹⁴ Yawi gdog yay nafoyung sas Muisis sik faugali laman sa sangay taw te,

¹⁵ “Sik taw nu nafamabo way Yawi at suguan, siginan nu yud gfon nusnga setaw fag fanggalangun, dewa yud at algan, kanya masine nu gfon sik tupa riangan yud e malong laman at fanggalangun famalyam at asalanan. Ay kanya masine yangay gfon salapi kabyat famayad kafag tupa ay gsud si sangay tagfon fanggalangun at fabudbungguan nu gfabudbungguan. Kanya famalyam asalanan fag fanggalangun.

¹⁶ Kanya nu dway nafon at kasakan sas Yawi, masine nu gfon salapi laman at famayad sat nayud nafon, ay famuti yap sik falimak afud. Ay kanya ro namuba sa tagfon fanggalangun at famayad laman Yawi gfalyam at asalanan.

¹⁷ “Sik taw nu dway nafaning Yawi at suguan, ay doma at algan, kanya e asalanan wan.

^18-19 Ay kanya nu nasaful te, anke asalanan, kanya masine nu namon sa sangay tagfon fanggalangun sik riangan tupa at yud e malong, laman famalyam at asalanan. Ay kanya nu dway mafon sik tupa, masine nu gfon salapi, kabyat sik famayad tupa ay gsud si sangay tagfon fanggalangun at famabudbungguan nu gfabudbungguan. Siginan takatanya, Yawi gfalyam kafag taw at ngay asalanan.”