Lebitiku 4 - Fanawbuid tagsibaliwas Fakayabian

Famalyam Asalanan fag Fanggalangun

^1-2 Yawi gdog yay nalong sas Muisis te, “Longi sa sangay taw Israel te, nusnga sinu at yud nafaning ku ngay faugali, dewa yud at algan, masine kanya nu gfakamulun takatatuy:

³ “Dewa sik tagfon fanggalangun way at nasalan ay doma at algan, ay ngay taw Israel nu ntaip way, masine kanya nu namon sas Yawi sik tama baka tumad, at yud e malong, laman famalyam at asalanan.

⁴ Kanya masine nu nantabanan kafag baka tama sas Yawi at daga salubangan, sit sakbawan bale. Ay folii at daluap sat fanggalangun at tungud alfuyu ay sanya ginan, fabuli wan.

⁵ Ay kafag fun tagfon fanggalangun gbul kafag baka at taguk ay namuba sas Yawi at bale.

⁶ Ay kanya gfasurung at sumyu sas taguk ay gfaramsig fitu ginan sas ramit faningding at Mafasamanan Fia fag Suluk, sis Yawi at daga salubangan.

⁷ Sanya ginan, kanya nanrarus taguk sa sangay sunge tagsis fagirugan famaebebanglu at ngay fugungan, tagsis Yawi at Bale, sit daga salubangan. Ay kanya nangugwag at sawad fag taguk sas daga fagirugan fanggalangun tagsis aturunan Yawi at sakbawan bale.

^8-9 Ay sanya ginan, kanya namul kafag fanggalangun at ngay taba, at amuslun fagdua ay tagsanya fag taba, ay anggan talay fag afud dangdangun.

¹⁰ Katanya yangay at fakamulun sas fanggalangun fag fagbaugun laman sas nasadian. Sanya ginan, kafag tagfon fanggalangun nangirug kafag ngay taba sas fagirugan ngay fanggalangun.

^11-12 Dewa katanya, at sawad fag afud fanggalangun kata balat, alfuyu, ngay si, ay fagayu tagsisad basad anggan at kek, bubai sas day fagmafulan sa ay fagnangukasan dafug ay irugi sanya.

¹³ “Ngay taw Israel nu nafamabo way Yawi at faugali, dewa yud at algan, kanya fagayu e asalanan wan.

¹⁴ Ay kanya fagayu nu nasaful te, anke asalanan, masine nu namon sik tama baka tumad laman at fanggalangun famalyam at ngay asalanan. Ay nantaban at fanggalangun sas Yawi at bale.

¹⁵ Sanya ginan, ngay taw Israel at ngay fagtainan nanamoli sanya fag tama baka tumad at tungud alfuyu at ngay daluap, ay gfabul laman at fanggalangun sas Yawi.

¹⁶ Ay fun tagfon fanggalangun gbul kanya fag fanggalangun at taguk, ay gbuba sas Yawi at basad bale.

¹⁷ Ay kanya gfasurung at ngay sumyu sas taguk ay gfaramsig fitu ginan sas ramit faningding at Mafasamanan Fia fag Suluk, sis Yawi at daga salubangan.

¹⁸ Sanya ginan, kanya nanrarus taguk sa sangay sunge tagsi sangay fugungan fagirugan famaebebanglu, sis Yawi at basad bale, sit daga salubangan. Ay at sawad fag taguk ugwagi sas daga fagirugan fanggalangun sis Yawi at sakbawan bale.

^19-21 At fakamulun sanya fag baka kata yangay at nafakamulun famalyam asalanan fag fanggalangun fag tama baka tumad. Gbul kafag fagbaugun at taba fagayu ay girug sas fagirugan, ay at bilug nangirug sas day fagmafulan. Katanya ngay tagfon fanggalangun at fakamulun laman Yawi gfalyam ngay taw Israel at asalanan. Katanya ngay taw Israel nu gfon at fanggalangun laman famalyam at ngay asalanan.

²² “Sik tagfangguna nu dway nafaning Yawi at faugali, dewa yud at algan, kanya anke asalanan wan.

²³ Ay nu nasaful te, anke asalanan, masine kanya nu gfon sik kambing at yud e malong laman at fanggalangun.

²⁴ Kanya wan at famalyam at asalanan. Ay kanya gfoli at daluap sat fanggalangun at tungud alfuyu ay namabul kafag kambing sas fagfabulan ngay fagirugun fag ngay fanggalangun laman sas Yawi.

²⁵ Ay tagfon fanggalangun gfasurung at ngay sumyu sas kambing at taguk ay nanrarus sa sangay sunge tagsis fagirugan at ngay fugungan. Ay at sawad fag taguk ugwagi sas daga fagirugan.

²⁶ Ay irugi kafag fanggalangun at taba kata at nafakamulun sat fanggalangun fag tama baka tumad laman fanggalangun sas nasadian. Tagfon fanggalangun nu nafakamulun tua takatanya, Yawi gfalyam kanya fag taw at ngay asalanan.

²⁷ “Sik taw nu nafamabo way Yawi at suguan, dewa yud at algan, kanya anke asalanan wan.

²⁸ Ay kanya fag taw nu nasaful te, anke asalanan, kanya masine nu gfon sik tina kambing at yud e malong laman at fanggalangun, famalyam at asalanan.

²⁹ Ay kanya gfoli at daluap sa kafag kambing at tungud alfuyu. Sanya ginan, namabul sas fagfabulan ngay fagirugun fag ngay fanggalangun.

³⁰ Ay tagfon fanggalangun gfasurung at ngay sumyu sas kambing at taguk ay nanrarus sa sangay sunge tagsis fagirugan at ngay fugungan. Ay at sawad fag taguk ugwagi sas daga fagirugan.

³¹ Sanya ginan, kanya gbul kanya fag fagbaugun at taba, kata at nafakamulun sas fanggalangun laman at Fanggalangun sas Nasadian. Ay kanya nangirug kafag taba. Ay kafag ngay fanggalangun at ayuk at mabebanglu sik famauseganan Yawi. Ngay tagfon fanggalangun nu nafakamulun tua takatanya, Yawi gfalyam kanya fag taw at ngay asalanan.

³² “Ay sik taw at fanggalangun nu sik tupa laman famalyam at asalanan, masine at fanggalangun nu sik tina ay at yud tua e malong.

³³ Kanya masine nu gfoli at daluap sat fanggalangun fag tupa at tungud alfuyu ay namabul sas fagfabulan ngay fagirugun fag ngay fanggalangun.

³⁴ Ay tagfon fanggalangun gfasurung at ngay sumyu sas kambing at taguk ay nanrarus sa sangay sunge tagsis fagirugan at ngay fugungan. Ay at sawad fag taguk ugwagi sas daga fagirugan.

³⁵ Ay kanya fag tagfon fanggalangun gbul kafag fagbaugun at taba, kata at nafakamulun sas fanggalangun laman at Fanggalangun sas Nasadian. Ay kanya nangirug kafag taba gasfuan tiba yak fanggalangun laman sik fanggalangun sas Yawi. Tagfon fanggalangun nu nafakamulun tua takatanya, Yawi gfalyam kafag taw at ngay asalanan.