Lebitiku 3 - Fanawbuid tagsibaliwas Fakayabian

Fanggalangun laman sas Fagmasadiun

¹ “Sik taw at fanggalangun nu sik baka laman sas nasadian sis Yawi at daga salubangan, at masine nu sik baka at yud e malong.

² Ay kanya fag taw masine nu gfoli at daluap sat fanggalangun fag baka at tungud alfuyu, sanya ginan, kanya namabul kafag baka sis aturunan Yawi at sakbawan bale. Ay Arun at kasugfunanan fag ngay tagfon fanggalangun namaramsig kafag fanggalangun at taguk sas day fagirugan.

^3-4 Sanya ginan, tagfon fanggalangun gbul kafag fanggalangun at taba ay at amuslun fagdua ay tagsanya fag taba, ay at masine fag afud dangdangun, laman sik fagirugun fag fanggalangun sas Yawi.

⁵ Ay Arun at kasugfunanan fag ngay tagfon fanggalangun nangirug kanya fagayu gasfuan fagirugun fag ngay fanggalangun. Ay kafag ngay fanggalangun at ayuk at mabebanglu sik famauseganan Yawi.

⁶ “Ay at fanggalangun nu sik tupa ay mannga sik kambing, masine way dewa sik tama ay sik tina at yud e malong, kanya at fanggalangun laman sas fagmanabayanun.

⁷ Ay at fanggalangun sas Yawi nu sik tupa,

⁸ masine kanya nu gfoli at daluap sat fanggalangun fag tupa at tungud alfuyu ay nu gfabul sis salubangan Yawi at bale. Ay Arun at kasugfunanan fag tagfon fanggalangun gfaramsig kafag fanggalangun at taguk sas fagirugan at ligung.

⁹ Ay tagfon fanggalangun namul sik afud kafag fanggalangun ay nangirug laman sas Yawi: at iug at ke taba at malifungan munakbang sis butul guyuy,

¹⁰ ay ngay amuslun, ngay ariras ay anggan sik afud dangdangun.

¹¹ Kafag ngay afud fanggalangun, at fagnangirugun laman sik ngay fagirugun fag fanggalangun sas Yawi.

¹² “Ay nu e gfon sik kambing sas Yawi laman at fanggalangun,

¹³ masine kanya nu gfoli at daluap sat fanggalangun at tungud alfuyu, ay nu gfabul fasii sis salubangan Yawi at bale. Ay Arun at kasugfunanan fag ngay tagfon fanggalangun gfaramsig kafag fanggalangun at taguk sas fagirugan at ligung.

¹⁴ Sanya ginan, ngay tagfon fanggalangun gbul sik afud laman at fagnangirugun sas Yawi. Ay gbul yangay tagsanya fag ngay taba,

¹⁵ ngay amuslun, ngay ariras ay anggan sik afud dangdangun.

¹⁶ Ay arodi, tagfon fanggalangun nangirug sas fagirugan fagayu at nabul laman sik famonun fag fanggalangun. Ay kafag fanggalangun sik mabebanglu sas Yawi. Foni sas Yawi fagayu taba.

¹⁷ “Lag am kon taba ay taguk. Masine nu gfaning am takatanya fag faugali nusnga nday ban nu gbanwan am.”