Lebitiku 23 - Fanawbuid tagsibaliwas Fakayabian

At Mafilian fag ngay Menit nu Gseg

¹ Yawi nasugu Muisis

² laman nanlong sa sangay taw Israel ngay faugali sabaliwa at mafilian fag ngay menit, nu ginain ngay taw nu maful laman gseg Yawi.

Famiangalay fag Menit

³ “Unumk menit nu gfakamulun am, dewa katanya, sis fafituk menit fiangalayi way ay afuli, aroro ginanya Famiangalay fag Menit. Lag am gfakamulun ginanya fag menit nusnga nday nu gbanwan am, aroro ginanya nu gfauseganan am Yawi.

Fagmafulun sabaliwa Tagbarita nu Glangfe ay Tinapay at yud e Famabia

⁴ “Fagmafulun sabaliwa Tagbarita nu Glangfe ay Tinapay at yud e Famabia, kanya sik mafilian fag ngay menit laman ngay taw Israel maful gseg Yawi.

⁵ Nu maful am sabaliwa Tagbarita nu Glangfe, gina sis falabi ufatk menit at yabi galay taguna fag magdanun.

⁶ Ay sis falabi limak menit ginanya yangay fag magdanun, gfasigad ay fagmafulun sabaliwa Tinapay at yud e Famabia. Ay kaduge fituk menit, ay fakonun fag tinapay at yud yakman e famabia.

⁷ Taguna fag menit ginanya fag fagmafulun, lag am gfakamulun; afuli yakman ay segi Yawi.

⁸ Ay ginanya fag fituk menit, irugi ay fanggalangun laman sas Yawi. Ay nu taguyan wan fag menit, lag am gfakamulun, afuli yakman ay segi Yawi.

Nu Gfon Taguna fag Afud Gutluan

^9-11 “Ay gina ban am andasug sas Yawi at nafon sa ayu fag talun, foni ban sa anya ay gutluan taguna fag futus. Bubai ban kanya fag rawvg sa sangay tagfon fanggalangun nu nlangfe Famiangalay fag Menit. Ay tagfon fanggalangun gfabat kafag rawvg sis Yawi at daga salubangan ay siginan takatanya, Yawi guseganan ayu.

¹² Ginanya yangay ban fag menit, gfon am sas Yawi sik tupa tagsadik banwa ay at yud e malong, laman ay fagirugun fag fanggalangun.

¹³ Ay foni yangay ufatk fabudbungguan at masine fag fangawat tinapay at ke suglat langis sa nu gfauseganan am Yawi, ay sik baringan wat ubas at mamam laman sik fanginum fag fanggalangun. Kanya fagayu sik ngay fagirugun fag ngay fanggalangun, ay Yawi kaylat kanya fag ngay fanggalangun at ayuk at mabebanglu.

¹⁴ Nu dyayam nafon takatanya fag ngay fanggalangun, lag am kon nusnga setaw fag fakonun siginan ay gutluan, dewa at melo at masanglayan ay nafatama fag tinapay. Nusnga nday ban nu gbanwan am, tuy fag faugali ay fagaloan ban kabavn, anggan ay ngay kasugfunanan.

Fagmafulun sabaliwas Fanggutluan

^15-17 “Nu nlangfe fituk buknga linggu siginan nu gfon am ay gutluan taguna, dogi yap afuli, ay foni sik famauseganan fag fanggalangun siginan ay gutluan taguna. Fakamuluni ban takatanya gina sis falimak safuluk menit, aroro kanya ban fag menit katunggu sis fafituk Famiangalay fag Menit. Ginanya ay fanggalangun duak tinapay, ay galay sik tinapay, at fangawat ufatk fabudbungguan at masine fag fangawat tinapay at ke famabia. Foni kafag tinapay laman ay fagfabatun fag fanggalangun siginan ay gutluan taguna.

¹⁸ Ay ginanya foni yangay fituk riangan tupa tagsik banwa ay at yud e malong, ay sik tama baka, ay duak tama tupa. Foni kanya laman sik fagirugun fag fanggalangun gasfuan sik gutluan fag fanggalangun ay sik fanginum fag fanggalangun. Kanya fagayu ay fanggalangun sas Yawi. Ay kafag ngay fanggalangun at ayuk at mabebanglu famauseganan Yawi.

¹⁹ Foni yangay sik tama kambing laman sik fanggalangun famalyam asalanan, ay duak tupa tagsik banwa laman sik fanggalangun laman sas fagmanabayanun.

²⁰ Tagfon fanggalangun gfabat sis Yawi at daga salubangan kafag duak tupa ay kanya fag rawvg taguna fag gutluan. Kanya fag ngay fanggalangun at mafamilian laman sas Yawi aroro kanya yangay at mafalganan fag afud laman sa sangay tagfon fanggalangun.

²¹ Ginanya ban fag menit lag am gfakamulun; afuli yakman ay segi Yawi. Tuy fag faugali ay fagaloan ban kabavn, anggan ay ngay kasugfunanan nusnga nday ban nu gbanwan am.

²² “Gina am ggutlu, lag yap gfamin ngay rawvg si ay ligung gamasun, ay lag gbul ya ay naglangfean, laman sa sangay yud e kwa ay sa sangay taw tagsiginans tibak talun. Au ay Dius Yawi.

Fagmafulun sabaliwa nu Gfawang Budyung

^23-24 “Gina taguna fag menit sis fafituk magdanun, fiangalayi way ay amatangi Yawi. Ay nu nadungug am sik budyung at awang, afuli ay segi anya.

²⁵ Ginanya ban fag menit lag am gfakamulun, abat ngate, namon way ban am sas Yawi ay fagirugun fag ngay fanggalangun.

Nu Gfalyam Asalanan fag Menit

^26-28 “Gina sis fasafuluk menit sis fafituk magdanun, ginanya fag menit nu gfalyam asalanan. Ay ginanya lag am gfakamulun, abat ngate, afuli yakman ay segi Yawi, ay lag am gfangon. Foni sa anya ay fagirugun fag ngay fanggalangun, aroro ginanya fag menit nu gfalyam ay ngay asalanan si ay Dius at daga salubangan.

²⁹ Ay nusnga sinu at yud nanangalo gina yud gfangon laman nandarangin, lag gtuyan ya te, ay kaiban.

³⁰ Yawi gfabul nusnga sinu fag taw at nafakamulun ginanya fag menit.

^31-32 Nu katanya, fiangalayi way ay darangini gina menit anfalyu, sis fasiamk menit ginanya yangay fag magdanun anggan sitsigon at fadogan fag menit nu nfalyu. Nusnga nday ban nu gbanwan am anggan ay kasugfunanan, faningi fia takatanya fag faugali.”

Fagmafulun sabaliwa nu Kawat ngay Fayag

^33-34 Yawi nasugu Muisis laman nanlong sa sangay taw Israel te, Galay ban sis falabi limak menit sis fafituk magdanun gfasigad fagmafulun sabaliwa nu Kawat ngay Fayag, ay mafuli useganani kaduge fituk menit.

³⁵ Ay taguna fag menit, lag am gfakamulun, abat ngate, afuli yakman ay segi Yawi.

³⁶ Ginanya yangay fag fituk menit, foni sas Yawi ngay fagirugun fag ngay fanggalangun. Ay anggan sis fawaluk menit, lag yap gfakamulun, abat ngate, dogi yap afuli ay segi Yawi, ay fataglayuni nu gfon am sa anya ay ngay fanggalangun. Ginanya fag menit ay fagmafulun nu katabu.

³⁷ Ginanya wan fag ngay menit at nafalganan nu maful am laman gseg Yawi ay nu gfon am ay ngay fagirugun fag fanggalangun. Ginanya bubai yangay ay ngay gutluan fag fanggalangun, ay ngay fanginum fag fanggalangun. Foni kanya fag ngay fanggalangun gina sit nafalganan fag menit.

³⁸ Mafuli tua galay sit nafili fag ngay menit, saman ya Famiangalay fag Menit. Masine nu gfon am takatanya fag ngay fanggalangun gasfuan ay ngay fanggalangun sabaliwa famafasludan fatuyanan, ay at mafalganan fia fag fanggalangun laman sas Yawi.

³⁹ Ay gina am e fagmafulun sabaliwa nu Kawat ngay Fayag, mafuli yangay fauseganani Yawi, gfasigad sis falabi limak menit sis fafituk magdanun, nu ntabu fanggutluan. Mafuli fituk menit. Ay lag am gfakamulun si taguna ay sis fawaluk menit.

⁴⁰ Gina taguna fag menit, buli at masine fag ngay rawvg kayu, layag at ngay don, ay tagsis datag fag ngay kayu marabung at ngay sanga, ay useganani fia sa ay Dius Yawi at daga salubangan, kaduge fituk menit.

^41-43 Galay banwa mafuli takatanya fag ngay fagmafulun laman gfauseganan am Yawi. Ginanya fag fituk menit, fagayu am fag ngay taw Israel masine nu gbanwan am si sangay Fayag, laman ay ngay sisian sumaful te, Yawi nafabanwan ay ngay mangaguyang gina gfalfas siginans talun Igiptu. Tuy fag faugali ay fagaloan ban kabavn, anggan ay ngay kasugfunanan.

⁴⁴ Kanya Muisis at nalong sa sangay taw Israel sabaliwa at nafalganan fag ngay fagmafulun laman gfauseganan Yawi.