Lebitiku 2 - Fanawbuid tagsibaliwas Fakayabian

Famauseganan Yawi fag Fanggalangun

¹ “Ay sik taw nu namon at fanggalangun laman famauseganan Yawi, at fanggalangun at masinei tua fag fangawat tinapay, ay fasuglati langis ulibu ay famaebebanglu.

² Ay kanya namuba at fanggalangun sas Arun at kasugfunanan fag ngay tagfon fanggalangun. Ay kanya fag ngay tagfon fanggalangun gbul sik galumut kafag fangawat tinapay at mafasuglatan langis ay famaebebanglu, ay nangirug sas fagirugan. Sanya ginan, ngay tagfon fanggalangun nangirug kafag fanggalangun. Ay kafag ngay fanggalangun at ayuk at mabebanglu sik famauseganan Yawi.

³ Ay kafag fanggalangun at sawad mafalganan laman sas Arun ay sat ngay kasugfunanan aroro kafag afud fanggalangun mafilian laman sas Yawi.

⁴ “Ay nu e fanggalangun tinapay at mafataman siginans faygangan laman famauseganan Yawi, at fangawat at masinei tua, ay at yud e suglat famabia. Ay masine yangay gfon laman sik fanggalangun at madamvl fag tinapay at mafasuglatan langis, ay mannga at mayangfis fag tinapay at mararusan langis.

⁵ “Sik fanggalangun tinapay at mafataman sa tagbia fag awali, at fangawat at masinei tua fag fangawat tinapay ay mafasuglatan langis, ay at yud e suglat famabia.

⁶ Ramyuki kanya fag tinapay ay fasuglati langis. Kanya sik famauseganan fag fanggalangun.

⁷ “Ay sik fanggalangun fag tinapay at mafataman siginan at mabalulang fag awali, at fangawat at masinei tua fag fangawat tinapay ay mafasuglatan langis.

⁸ “Takatanya fag ngay fanggalangun ay fagnamonun sa sangay tagfon fanggalangun at fagnangirugun laman sas Yawi.

⁹ Ay tagfon fanggalangun gbul yay kafag fanggalangun tiba ay nangirug laman famauseganan Yawi. Ay at mabebanglu fag ayuk tagsiginans fagirugan, sik mauseganan sas Yawi.

¹⁰ Ay kafag fanggalangun at sawad mafalganan laman sas Arun ay sat ngay kasugfunanan aroro kanya at mafilian fag afud fanggalangun laman sas Yawi.

¹¹ “Lag gfasuglat famabia tinapay sa sangay fanggalangun laman sas Yawi, aroro wam masine girug famabia tinapay ay deut laman ay fanggalangun sas Yawi.

¹² Masine wayam gfon famabia tinapay ay deut laman ay fanggalangun nu siginan tua ay gutluan taguna, dewa katanya, wam masine nangirug kanya fag fanggalangun sas fagirugan.

¹³ Fasuglati barara sa ay famauseganan fag fanggalangun, aroro barara sik fagtoglagan te, masadi tuam gugat sas Yawi. Nu katanya, masine nu gfasuglat am barara sas fagayu ay fanggalangun.

¹⁴ “Nu namon am ay fanggalangun siginan ay gutluan taguna laman ay famauseganan Yawi, foni ay nasanglay, ay ay nalubuk fag rawvg.

¹⁵ Ay fasuglati sik langis ay sik famaebebanglu. Kanya ay fanggalangun laman gfauseganan am Yawi.

¹⁶ Ay tagfon fanggalangun gbul tiba ay nasanglay ay ay nalubuk at mafasuglatan langis ay famaebebanglu ay nangirug laman gamatang tuam gugat Yawi. Kanya sik fagirugun fag fanggalangun laman sas Yawi.