Lebitiku 18 - Fanawbuid tagsibaliwas Fakayabian

At Fagsalagun fag ngay Fakamulun at Maksvn nu Mauri

¹ Yawi nasugu sas Muisis te,

² “Longi sa sangay taw Israel te, “Au wan ay Dius Yawi.

³ Lag am gfakamulun kata ngay taw Igiptu at ngay fakamulun si ay fagbanwanan ebi. Ay lag ban gfaning ngay taw Kanaan at ngay fakamulun sa ku fagtabanan ban ayu fag talun.

^4-5 Faningi fia fagayu ku suguan ayu ay ku ngay faugali, aroro nusnga sinu tagfaning ngaduge tua ban nu gleleg. Au ay Dius Yawi.

⁶ “Lag gfataladan am kalongan fag mangena. Au Yawi.

^7-8 “Lag gfae fakaplaun am mama siginan nu gfataladan am mina ay am mama at mangena tiba.

⁹ “Lag gfataladan am faduksay fag mangena, dewa am duksay sim mama ay mannga sim mina, ay dewa am magamut ay fakagurangan ay mannga duan.

¹⁰ “Lag gfataladan am fufu mangena, aroro takatanya fag fakamulun gfae fakaplaun way emu.

¹¹ “Lag gfataladan am mama at baguina sit sadi at mangena, aroro kanya am faduksay way.

^12-13 “Lag gfataladan am bay, am mama ay mannga am mina at faduksay.

¹⁴ “Lag gfae fakaplaun am sai siginan nu gfataladan o am bay, aroro kanya am bay way.

¹⁵ “Lag gfataladan am nugang, aroro kanya am baguama way at mangena.

¹⁶ “Lag gfataladan am ifag, aroro gfae fakaplaun o am faduksay fag mangama.

¹⁷ “Lag gfataladan am nafataladan ebi fag mangena at ngay sisian ay at fufu, aroro kanya fagayu am ngay sisian way manga ay am fufu, ay takatanya gfae fakaplaun way emu.

¹⁸ “Lag kadadwa sam mangena at faduksay kaduge am mangena gleleg.

¹⁹ “Lag gfataladan sik mangena tagfangigusan, aroro kanya fag mangena masuya.

²⁰ “Lag gfataladan am iba at mangena aroro nu nafakamulun o takatanya, umsik masuya o fag taw.

²¹ “Lag gfon am sisian laman am fanggalangun sas Mulek fag fagsegan, aroro takatanya sik maksvn fag fakaplaun sa angku am Dius. Au Yawi.

²² “Sik mangama wa masine gfataladan sik mangama, ay anggan sik mangena wa masine gfataladan sik mangena, aroro takatanya maksvn nu masuya.

²³ “Lag o gtugtug fagbaugun, aroro takatanya fag fakamulun maksvn nu masuya, nu katanya, gtuyan emu te, sik taw o at mauri.

²⁴ “Lag am gfakamulun takatanya aroro gfauri wayam ay ngay sadili, ay takatanya fag fakamulun at nafasik masuya ku fagnangaiyanun fag ngay taw siginan ku fagnamonun sa ayu fag talun.

^25-28 Aroro ngay taw tagbanwan sanya nafasuya kafag talun, siginan at ngay fakamulun at mauri. Nu katanya, nafadasug au sanya fag talun ngay fagidapun laman kanya fag ngay taw glao sanya ginan fag talun. Nu katanya, am fag ngay taw Israel anggan ay ngay betaw, lag am gfakamulun takatanya fag fagmauriun, abat ngate, faningi tua ku ngay suguan ay ku ngay faugali. Aroro nu nafasuya way ban am kanya fag talun siginan at mauri fag fakamulun, gaiyan kyangay ban ayu sanya ginan fag talun kata ku nafakamulun sa sangay taw tagbanwan sanya.

²⁹ Nusnga sinu at nafakamulun takatanya fag fakamulun at maksvn nu mauri, tuyani te, bunwa ya ay kaiban.

³⁰ Nu katanya, faningi ku suguan ayu ay lag gfakamulun kata ngay taw tagbanwan sanya at ngay fakamulun at maksvn nu mauri. Au wan ay Dius Yawi.”