Lebitiku 16 - Fanawbuid tagsibaliwas Fakayabian

Foyungan sabaliwa nu Gfalyam Asalanan

^1-2 Gina Arun at baguama at dua anbul gina gfon fanggalangun, Yawi nalong sas Muisis te, “Longi sa am faduksay Arun te, lag gsakbo sat Mafasamanan Fia fag Suluk sis day guyuy famalabag fag ramit, dewa snga ginain nu kaylat. Kanya ro kabul nu nasakbo way. Aroro sanya nu gfalag au ku fagmabalyananun siginan sik linyabu sis tungud fanuklub Fagsuadan Nasadian.”

³ Katatuy Yawi at suguan laman sas Arun, gina kanya nansakbo sat Mafasamanan Fia fag Suluk: “Kanya masine nu gbuba sik riangan baka tama laman sik fanggalangun famalyam asalanan, ay gbuba yangay sik riangan tupa tama laman sik fagirugun fag fanggalangun.

⁴ Ay kanya masine nu gigus ay nu gsulun at mafasamanan fag lanbung at mawatan siginan at masine fag ramit; taguna kanya gsulun tagtayuk at bilug fag lanbung, ay at famutus fagwan, at sangbo fag ramit, ay tagsit famalanib fag lanbung.

⁵ Sanya ginan ngay taw Israel gfon sa anya duak tama kambing laman sik fanggalangun laman sa nu gfasine, ay sik riangan tupa laman sik fagirugun fag fanggalangun.

⁶ “Ay Arun namon kafag riangan baka laman at fanggalangun sa nu gfasine, laman at fagmauriun umkalyam wan, anggan sat ngay kalongan.

⁷ Sanya ginan, kanya gbul duak kambing ay gfabat yangay sas Yawi at daga salubangan, sit sakbawan bale.

⁸ Sanya ginan, Arun gfili nu inday fag fanggalangun laman sas Yawi ay laman sas Asasel.

⁹ Ay at nafili fag kambing laman sas Yawi, kanya at fanggalangun famalyam asalanan.

¹⁰ Dewa katanya, at nafili fag kambing laman sas Asasel, kanya gfon gina yay kanya fag kambing gleleg, ay gbuba sas Yawi at daga salubangan, ay sanya ginan tagfon fanggalangun gfalfas wan kanya fag kambing sas talun at yud e taw, laman famalyam ngay taw at asalanan.

At Famamut sabaliwa Takatanya fag ngay Faugali

¹¹ “Arun namabul sik riangan baka tama laman famalyam at asalanan ay anggan fagayu at kalongan at ngay asalanan.

¹² Sanya ginan, kanya gbul sik famanus famaebebanglu, ay gfapnu singsing afuy siginans fagirugan sis bale ramit. Kanya gbul yangay duak galumut famaebebanglu, ay gbuba kanya fagayu sat Mafasamanan Fia fag Suluk.

¹³ Ay kanya girug at buba fag famaebebanglu sas singsing afuy, sis Yawi at daga salubangan, laman at anus gfarum anggan sas Fagsuadan Nasadian at ligung, laman kanya di kabul.

¹⁴ Sanya ginan, kanya gfasurung at sumyu sa kafag baka tama at taguk ay gramsig fitu ginan sas Fagsuadan Nasadian at suklub sas fakamenitan baliwa; sanya ginan, nanramsig yangay fitu ginan sas fagunan Fagsuadan Nasadian at suklub.

¹⁵ “Kanya gfabul yangay at fanggalangun fag kambing laman famalyam ngay taw at asalanan. Ay gbuba kafag kambing at taguk sat Mafasamanan Fia fag Suluk ay gfaramsig sas Fagsuadan Nasadian at suklub kata at nafakamulun sas tama baka at taguk.

¹⁶ Katanya Arun at fakamulun laman at Mafasamanan Fia fag Suluk umsine, aroro sa sangay taw Israel at fagmauriun. Katanya yangay Arun at fakamulun anggan sa tibak afud Yawi at bale, sis wabilug ngay taw Israel.

¹⁷ Nusnga sinu fag taw lag nangakbang sas Yawi at bale gina Arun nasakbo sat Mafasamanan Fia fag Suluk yakmay naduksun. Ay kanya nu ntabu wan nu gfakamulun laman gfalyam at asalanan ay at ngay kalongan at asalanan, ay anggan fagayu taw Israel at ngay asalanan,

¹⁸ kanya gduksun wan siginan at Mafasamanan Fia fag Suluk ay nangakbang sas fagirugan tagsis Yawi at daga salubangan. Kanya gbul at fanggalangun fag baka ay fag kambing at taguk ay grarus kafag taguk sa sangay sunge tagsis fagirugan at ngay fugungan, laman kanya fag fagirugan umsine.

¹⁹ Kanya gfasurung at sumyu sas fanggalangun at taguk, ay gramsig sas fagirugan fanggalangun fitu ginan, ay at sawad fag taguk girug sas fagirugan laman sik fanggalangun sas Yawi, ay sik fanggalangun famalyam ngay taw Israel at asalanan.

²⁰ “Ay Arun nu ntabu wan nu gfasine at Mafasamanan Fia fag Suluk ay anggan Yawi at bale at ngay suluk ay anggan fagirugan, kanya gbuba tagleleg fag kambing sas wabilug fag mafulan.

²¹ Ay kanya gfoli at daluap fagdua sas kambing at tungud alfuyu ay gfoyung fagayu ngay taw Israel at asalanan. Siginan takatanya, ngay taw at asalanan nalin wan sa kafag kambing at tungud alfuyu. Sanya ginan, Arun gfon kafag kambing sat fagfatigwanan laman at namalfas, ay kanya fag taw nafalfas kafag kambing sas talun at yud e taw.

²² Nu katanya, kafag kambing gbuba fagayu ngay taw Israel at ngay asalanan sas talun at yud e taw.

²³ “Sanya ginan, Arun gsakbo sas Yawi at bale ay gtubus at lanbung laman sik fun tagfon fanggalangun, at nasulun gina kanya gsakbo sat Mafasamanan Fia fag Suluk ay gfamato at lanbung sanya.

²⁴ Ay kanya gigus sis Yawi at Bale at basad alad, ay nu ntabu wan, kanya gsulun at fangugali fag lanbung. Kanya gduksun ay gfon at fanggalangun fagdua, laman famalyam at ngay asalanan, ay anggan ngay taw at ngay asalanan.

²⁵ Ay kanya girug at fanggalangun at ngay taba sas fagirugan laman sik famalyam asalanan fag fanggalangun.

²⁶ “Ay at nanamalfas kambing laman sas Asasel sas talun at yud e taw, masine nu gigus ay nu gbakbak at lanbung gina kafoli sa sangay taw at fagmafulan.

²⁷ Ay irugi wan sas day fagmafulan fanggalangun fag baka ay fag kambing at ngay yamas at nabuba at taguk sat Mafasamanan Fia fag Suluk, laman famalyam asalanan.

²⁸ Ay at nanamuba kanya fag fanggalangun sas day fagmafulan, masine nu gigus ay nu gbakbak at lanbung gina kafoli sas fagmafulan.

^29-31 “Kata ban tuy ngay taw Israel, ay ngay taw tagsiginan tibak talun at fagnangugaliun. Galay ban sis fasafuluk menit gina sis fafituk magdanun, ngay taw masine nu gdarangin ay lag gfakamulun, kata sis Famiangalay fag Menit. Aroro ginanya fag menit nu gfalyam ngay taw at ngay asalanan, laman kanya fagayu manangakbang sis Yawi at daga salubangan.

³² At namakamulun ginanya sik fun tagfon fanggalangun at natubus at mama. Kanya gsulun at mafilian fag lanbung laman sa sik tagfon fanggalangun,

³³ ay gfakamulun laman gfasine at Mafasamanan Fia fag Suluk, ay sa tibak afud Yawi at bale, anggan sa sangay tagfon fanggalangun ay ngay taw Israel at fagirugan.

³⁴ “Ngay taw masine nu gfaning tuy fag ngay faugali kabavn ban laman famalyam at ngay asalanan. Ay sadi ginan nu gfakamulun galay banwa.” Ay nafakamulun takatanya kata Yawi at suguan sas Muisis.