Lebitiku 15 - Fanawbuid tagsibaliwas Fakayabian

Tagsiginans Taw at Bilug fag ngay Masuya

¹ Yawi nasugu Muisis ay Arun

² laman nanlong sa sangay taw Israel te, Nu e naduksun way siginan sik mangama at lulu, aroro sat maksvn fag fakasaitun, ay at nanting siginan at lulu tuyani te, masuya.

³ Ay dewa gfataglayun nu ganting ay deyud ganting ya, tuyani te, kanya fag taw masuya wan.

⁴ Ay fagayu at fagtaygilidanan ay at fagmalunggungan tuyani yangay te, masuya.

^5-7 Ay nusnga sinu fag taw at nated anya, ay dewa sit igyan ay sit faglunggungan, kanya fag taw at nated masine nu gbakbak at lanbung ay nu gigus, dewa katanya, gtuyan yay anya te, masuya yakmay menit anfalyu.

⁸ Ay nusnga sinu kafag mangama at natufe, masine kafag taw nu gbakbak at lanbung ay nu gigus, dewa katanya, gtuyan anya te, masuya yakmay menit anfalyu.

^9-10 Nusnga nday kanya fag mangama nu malunggung, kata faglunggungan sis kabayu, kanya fag faglunggungan sik masuya wan. Nusnga sinu fag taw at nated kafag faglunggungan, kanya masine nu gbakbak at lanbung ay nu gigus, dewa katanya, gtuyan anya te, masuya yakmay menit anfalyu.

¹¹ At ke fakasaitun fag mangama nu dyay nafegus at daluap, ay nu nated way sik taw, masine at natedan fag taw nu gbakbak at lanbung ay nu gigus, dewa katanya, gtuyan yangay anya te, masuya yakmay menit anfalyu.

¹² Kanya fag mangama nu nated way sik tikung, rufai wan kafag tikung, ay nu nated sik awatan at mawatan siginans kayu, fegusi mandi.

^13-15 Ay kanya fag mangama nu nfia tua, gdaman yay fituk menit. Ay sis fituk menit kanya masine nu gbakbak at lanbung, ay nu gigus sas bulbug. Ay sis fawaluk menit, kanya masine nu gfon sa sik tagfon fanggalangun duak labikung ay mannga duak udkuruan, sis Yawi at daga salubangan, sit sakbawan bale. At sadi at fanggalangun famalyam asalanan, ay at sadi, at fagirugun fag fanggalangun. Katanya ngay tagfon fanggalangun at fakamulun laman sik taw at kinfia umsine.

¹⁶ Ay sik mangama at famatabu nu nanting way, kanya masine nu gigus, ay gtuyan anya te, masuya yakmay menit anfalyu.

¹⁷ Ay sik lanbung nu nantingan way mangama at famatabu, masine nu gbakbak kanya fag lanbung, ay tuyani yangay kafag lanbung te, masuya yakmay menit anfalyu.

¹⁸ Sik mangama ay sik mangena nu nataladan way ay kafag mangama at famatabu nu nanting way, kanya fag dua masine nu gigus, dewa katanya, gtuyan te, kanya fag dua masuya yakmay menit anfalyu.

¹⁹ Sik mangena nu gfangigusan way, tuyani anya te, masuya, kaduge fituk menit, ay nusnga sinu at nated anya, gtuyan yangay te, masuya yakmay menit anfalyu.

²⁰ Ay tuyani yangay te, masuya kafag mangena at fagtiugan ay at faglunggungan.

^21-23 Ay nusnga sinu fag taw at nated tagfangigusan at fagtiugan ay at faglunggungan, kanya masine nu gbakbak at lanbung ay nu gigus, ay gtuyan anya te, masuya yakmay menit anfalyu.

²⁴ Sik mangama nu nafataladan way sik mangena tagfangigusan, tuyani te, kanya fag mangama masuya, kaduge fituk menit. Ay nusnga nday kanya fag mangama at fagtiugan, masuya yangay.

²⁵ Sik mangena tagfangigusan gina yud sit buknga ay mannga nlangfe at fangigusan fag buknga, tuyani anya te, masuya.

²⁶ Nusnga nday kanya fag mangena at fagtiugan ay at faglunggungan kaduge gfangigusan, tuyani te, masuya kata sit buknga kanya nu gfangigusan.

²⁷ Ay nusnga sinu fag taw at nated at fagtiugan ay at faglunggungan tuyani te, masuya. Kanya masine nu gbakbak at lanbung ay nu gigus, ay gtuyan yangay anya te, masuya yakmay menit anfalyu.

^28-30 Kafag mangena nu ntabu gfangigusan, kanya gfanya yay fituk menit. Ay sis fawaluk menit, kanya gbuba duak labikung ay mannga duak udkuruan, ay gfon sa sik tagfon fanggalangun at malunggung sis Yawi at sakbawan bale. Ay kafag tagfon fanggalangun gfon at sadi laman at fanggalangun sat nafian ay at sadi, laman at fagirugun fag fanggalangun. Katanya tagfon fanggalangun at fakamulun at masine sis Yawi at daga salubangan laman sa sik mangena at kinfia nu gfangigusan.

³¹ Yawi nalong sas Muisis ay sas Arun te, “Foyungi sa sangay taw Israel nu setain nu gsaruy nusnge wain tagfasuya anya fagayu, laman kanya fagayu di kabul gina nangakbang sas bale ramit sis wabilug fagmafulan.”

^32-33 Katanya at ngay faugali sabaliwa sik mangama at ke fakasaitun taganting siginan at lulu, ay sabaliwa sik mangena tagfangigusan gina sit yud buknga, ay sabaliwa sik mangama at nafataladan sik mangena at masuya.