Lebitiku 13 - Fanawbuid tagsibaliwas FakayabianNgay Faugali sabaliwa ngay Bangbang 1 Yawi nalong sas Muisis ay sas Arun takatatuy fag faugali: 2 Sik taw at balat nu kabaga way, ay nu nke butsig way ay nu kalaksi way, kanya at fagtoglagan te, kanya fag taw gakae bangbangun, nu katanya, tabani anya sas Arun talamean fag ngay tagfon fanggalangun. 3 Tagfon fanggalangun nanginsaful kanya fag taw at balat, ay nu nalag at sigyu nu kalaksi way ay nu ngabasad way, kanya fag taw anud gabangbang wan. Ay tagfon fanggalangun gfoyung te, kanya fag taw masuya wan. 4 Dewa katanya, kanya fag taw at balat dewa kalaksi, ay at sigyu nu ddi ngabasad, tagfon fanggalangun gfasaman anya siginan sangay taw at fagmafulan kaduge fituk menit. 5 Ay nu nlangfe fituk menit, tagfon fanggalangun nu nalag te, kafag taw at balat wa nbali, gfasaman yay anya fitu yak menit. 6 Ay sis fafituk menit, tagfon fanggalangun gdog yay ginsaful at ke fakasaitun fag taw. Ay kanya fag taw at balat nu nfia tua, ay nu ddi gabutsig ya, tagfon fanggalangun gfoyung te, kanya masine wan. Sanya ginan, kafag taw gbakbak at lanbung ay gigus laman umsine. 7 Dewa katanya, kanya fag taw at balat nu nadog way anke butsig ay nu nrapyag way sa tibak afud bilug, kanya gdog yay nangakbang sa tagfon fanggalangun. 8 Ay tagfon fanggalangun nu nalag te, kanya fag taw gdog yay anke butsig, gdog yay gfoyung te, kanya fag taw masuya wan ay gabangbang. 9 Nusnga sinu fag taw tagabangbang, masine nu nangakbang sa tagfon fanggalangun. 10 Ay tagfon fanggalangun nu gdama kanya fag taw at balat ay at sigyu nu kalaksi way ay nu kabaga way, 11 kanya e bangbang tagfandog. Ay tagfon fanggalangun gfoyung te, kanya fag taw masuya wan. Ay wa faginsafulun ya anya aroro masuya wan. 12 Ay kanya fag taw at butsig nu nfagdaul way at bilug, 13 tagfon fanggalangun gdog yay ginsaful anya. Ay nu kalaksi tua fagdaul at balat, tagfon fanggalangun gfoyung te, kanya masine wan. 14-15 Dewa katanya, at butsig nu nfoli way vtv, ay nu kasik ngay bangbang way, tagfon fanggalangun gfoyung te, kanya fag taw masuya wan. 16 Ay kanya fag taw at ngay bangbang nu nfia tua, kanya masine nu nangakbang sa tagfon fanggalangun laman namainsaful. 17 Ay tagfon fanggalangun nu nalag te, anfia wan, gfoyung anya te, masine wan. 18 Sik taw at ke yapvs at kinfia, 19 ay nu nadog yay anbaga ay mannga nabutsig ay anraska ay anlaksi, masine kanya fag taw nu nangakbang sa tagfon fanggalangun. 20 Ay tagfon fanggalangun nu nalag te, kanya fag taw at butsig ngabasad, ay at ngay sigyu nu nlaksi way, kafag tagfon fanggalangun namoyung te, kanya fag taw masuya wan, aroro kanya kae bangbang gfasigad siginans yapvs. 21 Dewa katanya, tagfon fanggalangun nu glag kanya fag taw at sigyu nu ddi kalaksi ya, ay nu ddi ngabasad, ay anfia wan, gfasaman yay kanya fag taw siginans fagmafulan kaduge fituk menit. 22 Ay kanya fag taw at butsig nu kafagdaul way sat bilug, tagfon fanggalangun gfoyung te, kanya fag taw masuya wan, ay at ngay bangbang wan tagfatuyan te, maksvn wan at fakasaitun. 23 Ay at butsig nu ddi anrapyag sas fagdaul at bilug, tagfon fanggalangun gfoyung te, kanya fag taw masine wan. 24 Ay sik taw nu nirug way sik afud at bilug, ay sit kinkirug fag balat nu nke butsig way takalaksi, 25 kanya fag taw masine nu nangakbang sa tagfon fanggalangun, ay kanya fag taw at sigyu nu nlaksi way ay nu nkabasad way, kanya gabangbang wan siginan at nairugan. Ay tagfon fanggalangun gfoyung te, kanya fag taw masuya wan. 26 Dewa katanya, tagfon fanggalangun nu nainsaful tua te, at nairugan fag afud bilug at ngay sigyu nu ddi anlaksi ay nu glag nu kafia tua, tagfon fanggalangun gfasaman kanya fag taw kaduge fituk menit. 27 Ay nu nlangfe fituk menit, tagfon fanggalangun gdog yay ginsaful anya ay at butsig nu karapyag way sas fagdaul at bilug, tagfon fanggalangun gfoyung te, kanya fag taw masuya wan, aroro takatanya sik fakatoglagan te maksvn at bangbang. 28 Dewa katanya, kanya fag taw at butsig nu ddi anrapyag sas fagdaul at bilug, ay nu kafia yay, kanya anbaga way siginan at nairugan, ay tagfon fanggalangun gfoyung te, kanya fag taw masine wan. 29 Sik mangama ay mannga sik mangena nu nabutsig way sit alfuyu ay mannga sit sulang, 30 masine kanya fag taw nu namalag sa tagfon fanggalangun. Ay nu nasaful te, kanya fag butsig ankabasad, ay at buk ay at umi nu kaelo ay kayangfis way, tagfon fanggalangun gfoyung te, kanya fag taw masuya wan, aroro kanya gabangbang sit alfuyu ay mannga sit sulang. 31 Dewa katanya, kafag tagfon fanggalangun nu glag nu ddi ngabasad kanya fag taw at butsig, ay at buk nu ddi e nlayung, tagfon fanggalangun gfasaman anya siginan sangay taw at fagmafulan kaduge fituk menit. 32 Ay sis fafituk menit, tagfon fanggalangun gdog yay nanginsaful kanya fag taw at butsig. Ay nu nalag tua te, di nfagdaul sat bilug, ay nu ddi namameloan at buk ay umi, 33 masine kanya fag taw nu gfaufo, ay nu gufo at umi, dewa katanya, wa gfadalan at fangufo sat ke buyu. Ay gfadog yay gfasaman fitu yak menit. 34 Ay nu nlangfe fituk menit, tagfon fanggalangun gdog yay nanginsaful kafag taw at balat. Ay at butsig nu ddi anrapyag sas fagdaul at bilug ay nu ddi ankabasad, tagfon fanggalangun gfoyung te, kanya fag taw masine wan. Ay kanya fag taw masine nu gbakbak at lanbung, ay tuyani anya te, masine wan. 35 Dewa katanya, kanya fag taw at butsig nu nadog way anfagdaul sat bilug, gina tagfon fanggalangun natuyan te, masine wan, 36 tagfon fanggalangun gdog yay nanginsaful anya. Ay at butsig nu nfagdaul wan sat bilug, tagfon fanggalangun wa nanginsaful ya te, o kanya fag taw at buk ay at umi mameloan, kafag taw masuya wan. 37 Ay kanya fag taw at butsig nu ddi anrapyag sas fagdaul at bilug, ay nu nlayung wan at buk ay at umi, kanya anfia wan ay tagfon fanggalangun gfoyung te, kanya masine wan. 38 Sik taw nu nke ngay butsig malaksi sit balat, 39 kanya masine nu nangakbang sa tagfon fanggalangun. Ay tagfon fanggalangun nu nalag te, at malaksi sit balat sik ngay butsig way, kanya gfoyung te, kafag taw masine way. 40-41 Sik taw nu kalanu at alfuyu, kanya masine. 42-44 Dewa katanya, nu e nalag te, sit kinlanu karaska way ay nu nke butsig way, kanya fag taw masine nu nangakbang sa tagfon fanggalangun. Ay at alfuyu nu nkaksvn way nu karaska ay nu kabaga, kata nu gabangbang, tagfon fanggalangun gfoyung te, kanya fag taw masuya wan. 45 At kinke bangbang, masine nu gsulun at marasrasan fag lanbung, ay nu gfaburago at buk ay nu gtabun at bibig. Ay kanya guro te, “Masuya kwan! Masuya kwan!” 46 Kanya fag taw yakmay anfia gtuyan anya te, masuya. Ay kanya gsadilian namanwan sas day fagmafulan. Ngay Faugali sabaliwas Amling 47-50 Ay sik lanbung mawatan siginans tupa at sigyu ay mannga at masine fag ramit ay nusnge wain fag fagagbilugun at mawatan siginans balat nu gamling way, masine nu gbuba kafag ngay fagagbilugun sa tagfon fanggalangun. Ay tagfon fanggalangun nu nainsaful wan kanya fag ngay fagagbilugun, kanya fagayu gfasaman kafag ngay fagagbilugun kaduge fituk menit. 51-52 Sis fafituk menit, tagfon fanggalangun gdog yay nanginsaful kafag lanbung ay fag ngay fagagbilugun. Ay nu nalag te, kafag amling anfagdaul wan sas lanbung ay sa sangay fagagbilugun, tuyani te, kafag ngay fagagbilugun masuya wan. Ay irugi wan kafag lanbung ay fag ngay fagagbilugun. 53 Dewa katanya, tagfon fanggalangun gina ginsaful, nu nalag tua te, kanya fag amling di nfagdaul sas lanbung, 54 gbakbak yay kanya fag lanbung ay gfegus kafag ngay fagagbilugun, ay gfasaman yay fitu yak menit. 55 Ay nu nlangfe fituk menit, tagfon fanggalangun gdog yay nanginsaful kafag lanbung ay fag ngay fagagbilugun. Ay kafag lanbung ay fag ngay fagagbilugun nu gamling yay gugat, ay dewa yay yud anrapyag, tuyani te, masuya wan kafag ngay fagagbilugun, ay irugi wan. 56 Dewa katanya, tagfon fanggalangun nu gdama nu kalyam yay at amling, girati way lang si tagamling fag afud lanbung. 57 Ay nu nalag way te, anfagdaul wan nu gamling, irugi wan kanya fag lanbung ay fag ngay fagagbilugun. 58 Ay nu nabakbak kanya fag lanbung ay fag ngay fagagbilugun nu nalyam tua at amling, tuyani te, masine wan kanya fag lanbung ay fag ngay fagagbilugun. 59 Kata kanya nu ginsaful te, o sik lanbung ay sik ngay fagagbilugun at namling masine tua ay mannga wa masine ya. |
Copyright © 2021 by OMF International, Philippines
OMF International