Lebitiku 11 - Fanawbuid tagsibaliwas Fakayabian

At Masine ay at Mauri fag ngay Mangilafang

^1-3 Yawi nasugu Muisis ay Arun laman nanlong sa sangay taw Israel te, Masine wayam kon ngay fagbaugun at mabaltakan at u tagdog tua gamsak at naon.

^4-8 Dewa katanya, lag am kon ngay mangilafang tagdog gamsak at naon, at yud mabaltakan at u, kata kamelyu. Aroro kamelyu dewa gdog gamsak at naon, wa mabaltakan at u, ay nu katanya, kanya masuya sa ayu. Ay lag yangay kon bumbu, aroro, dewa mabaltakan at u wa gdog ya gamsak at naon. Tuyani te, kanya fag ngay fagbaugun masuya. Lag am kon kafag ngay fagbaugun at yamas ay lag gted at bilug at mabulan.

^9-12 Masine wayam kon nusnga setaw tagsisad liskung ay tagsisad dagat nu e fakfak tua ay e ngay sariksik. Dewa katanya, lag am kon ngay albon at yud e fakfak ay yud e sariksik, ay lag am gted takatanya fag ngay albon at mabulan. Tuyani fagayu takatanya te, masuya.

^13-19 Ay nu ngay manuk tungud, lag am kon bio, sikwi, sabungan, ay fagayu takon ngay taw ay ngay mangilafang at mabulan, ay ugak, ebo, liaw, ay manuk tungud taggamat albon, tibaus, kalaw ay alebung. Tuyani te, kanya fagayu at masuya way fag ngay manuk tungud.

^20-23 Masine wayam kon ngay taglayug ay tagalafang tagbia at fanliptuk kata liung, batiting, ay fitfit. Dewa katanya, wam masine kon tiba yak taglayug ay tagalafang talay ayu sirut. Tuyani te, kanya fagayu masuya way.

^24-28 Lag am gted at mabulan fag ngay mangilafang at yud mabaltakan at u ay at yud gdog ya gamsak at naon. Lag yangay gted at mabulan fag ngay fagbaugun tagufat at si ay at u. Tuyani te, kanya fag ngay fagbaugun masuya way. Nusnga sinu fag taw at nated takatanya fag fagbaugun at kinbul, masine kanya nu gbakbak at lanbung, ay yakmay menit anfalyu gtuyan yay gugat te, kanya fag taw masuya.

^29-31 Ay tuyani yangay te, masuya way nusnge wain fag mangilafang tagalafangan kata but, taktak, tiki, aktat, buaya, ay balan. Nusnga sinu fag taw at nated takata kanya fag ngay mangilafang at kinbul, tuyani anya te, sik masuya yakmay menit anfalyu.

³² Nusnga setaw fag fagagbilugun at natalfian sik mangilafang at mabulan, tuyani te, kanya fag ngay fagagbilugun masuya: kata ngay fagagbilugun at mawatan siginans kayu, ngay ramit, ngay balat, ay ngay saku, ay fagayu fagagbilugun. Fegusi kanya fagayu sasad mamam, ay yakmay menit anfalyu tuyani te, kanya fag ngay fagagbilugun masuya wan.

³³ Ay sik mangilafang at mabulan nu ntong way sa sik tikung, fagayu tagsisad tikung masuya wan, ay rufai wan kafag tikung.

³⁴ Fagayu fakonun at nafegus sas mamam tagsiginans tikung masuya wan. Ay fanginum fag mamam tagsiginans tikung masuya yangay.

³⁵ Masuya wan fagayu fagagbilugun at nafakwanan fagbaugun at mabulan. Ay nu ntong way sasad dafug rufai wan kafag dafug aroro masuya wan.

³⁶ Ay sik fagbaugun at mabulan dewa antong sasad liskung ay sas bubun, kafag liskung ay fag bubun masine way, dewa katanya, nusnga sinu fag taw at nated kafag fagbaugun at kinbul, kanya fag taw ansik masuya.

³⁷ Ay sik fagbaugun at kinbul nu natalfi sik fananum, kanya fag fananum masine way,

³⁸ dewa katanya, kafag fananum nu masurungan way gugat sis mamam, kafag fananum wa masine ya.

³⁹ Sik fagbaugun at natuyan te, masine, nu nbul way, nusnga sinu fag taw at nated kafag fagbaugun, tuyani anya te, masuya wan yakmay menit anfalyu.

⁴⁰ Ay nusnga sinu at naon kafag fagbaugun, masine kanya nu gbakbak at lanbung, ay tuyani te, kanya fag taw masuya yakmay menit anfalyu.

^41-42 Lag am kon ngay mangilafang tagalafangan: fagayu tagirusan at ungdan sas daga, ay anggan tagufat ay tangayu at ngay si.

^43-44 Lag am gfasuya ay sadili siginan nu kon am takatanya fag ngay mangilafang at masuya aroro au Yawi, ay Dius kdi e malong. Fatigwanani sa angku ay ngay sadili, fakamuluni at matuyan aroro au ay Dius, kdi e malong.

⁴⁵ Au wan Yawi, at nafalangfe ayu siginans talun Igiptu, laman au tua ban ay Dius. Nu katanya, ay ugali at yud tua e malong, aroro kdi e malong.

⁴⁶ Siginan takatanya fag ngay faugali sa sangay fagbaugun,

⁴⁷ sumaful am at masine ay at mauri fag fagbaugun, ay ay fakonun ay ay fagyudun kon.