Lebitiku 1 - Fanawbuid tagsibaliwas Fakayabian

Fagirugun fag Fanggalangun

^1-2 Yawi nauro Muisis ay nafakamatoan anya sis Fagnansegan fag Bale Ramit ay nalong sa anya te, “Longi sa sangay taw Israel te, “Nu namon am ay fanggalangun sas Yawi, foni sik baka, tupa ay mannga kambing.

³ “Sik taw at fagirugun fag fanggalangun nu sik baka, masine nu sik tama, ay at yud e malong, ay tabanani sas aturunan Yawi at sakbawan bale, laman Yawi gfasine kanya fag taw.

⁴ Ay kafag taw masine nu gfoli at daluap sat fanggalangun fag baka at tungud alfuyu, laman Yawi gfasine anya ay gfalyam at ngay asalanan.

⁵ Sanya ginan, kanya namilas kafag baka sis Yawi at daga salubangan. Ay Arun at kasugfunanan fag ngay tagfon fanggalangun namaramsig kafag fanggalangun at taguk sas fagirugan at ligung, sis aturunan Yawi at sakbawan bale.

⁶ Ay at ke fanggalangun masine nu gbul at fanggalangun at balat ay ramyuki.

⁷ Sanya ginan, Arun at kasugfunanan fag ngay tagfon fanggalangun gfae famaygang ay gfae afuy sas fagirugan.

⁸ Kanya yangay fagayu tagfoli ngay yamas sas tungud famaygang anggan at fanggalangun at alfuyu ay at taba.

⁹ Ay kanya yangay fagayu tagfegus at fanggalangun fag ngay yamas ay anggan at ngay bitis. Sanya ginan, nangirug wan kafag fanggalangun, laman sik fagirugun fag fanggalangun. Ay kafag ngay fanggalangun at ayuk at mabebanglu sik famauseganan Yawi.

¹⁰ “Ay sik taw at fanggalangun nu sik tupa way ay mannga sik kambing, fasik tamai at yud e malong.

¹¹ Ay kanya namilas at fanggalangun sas wala baliwa fag day fagirugan fanggalangun, sas Yawi at daga salubangan. Sanya ginan, Arun at kasugfunanan fag ngay tagfon fanggalangun gfaramsig kafag fanggalangun at taguk sas fagirugan at ligung.

¹² Ay kanya nu naramyuk wan at fanggalangun, ngay tagfon fanggalangun gfoli kafag ngay yamas sas tungud fagirugan, gasfuan kafag fanggalangun at alfuyu ay at taba.

¹³ Sanya ginan, kanya masine nu gfegus kafag fanggalangun at funa ay at ngay bitis, ay arodi gfon sa sangay tagfon fanggalangun laman sik fagirugun fag fanggalangun. Ay kafag ngay fanggalangun at ayuk at mabebanglu sik famauseganan Yawi.

¹⁴ “Ay sik taw at fanggalangun sas Yawi nu sik manuk tungud, kanya nangus sik labikung, ay mannga sik udkuruan.

¹⁵ Sanya ginan, tagfon fanggalangun namuba kafag fanggalangun sas fagirugan, ay gbilus at liug anggan anlifung, ay gfanting at taguk sas fagirugan at ligung, ay kanya fagayu girug kafag fanggalangun at alfuyu sas fagirugan.

¹⁶ Sanya ginan, kanya gbul at banunan ay gukas sabaliwas fakamenitan fag fungfung fagirugan, nu inda nu gfoli at nagdafugan.

¹⁷ Ay nu gbaltak kafag manuk tungud, rangguti at fakfak fagdua, dewa katanya, wa masine gfasaruayan. Sanya ginan, irugi kafag fanggalangun sas fagirugan laman sik fagirugun fag fanggalangun. Ay kafag ngay fanggalangun at ayuk at mabebanglu sik famauseganan Yawi.