Kulusas 4 - Fanawbuid tagsibaliwas Fakayabian

¹ Ngay tagfayafun, malukmei tua ay famatuyani tua ay fakamulun sa ay ngay fagsuguan. Amatangani te, e Fun yangay am sis banwa.

Tibak Suguan

² Fataglayuni nu mafandarangin am, ay fasfuani mafalganani ay useganani.

³ Ay darangini yangay emi laman tam Dius gfon emi ngayuk buknga nu kamoyung ami Dius at algan at masuksukan sabaliwa tam Fun Isus. Kanya wan ku fagmaubunganun katsi.

⁴ Darangini laman nu gfoyung au mayamag tua, kata at matuyan.

⁵ Mamatangani tua nu gfadgaloan am at yud gafanud ay lag gfangulan ay buknga.

⁶ Faylatani nu gkamatoan am, kata sik fakonun at mataba, laman ngay taw kaylat tua gdungugan, ay mafabalus tuam ngay taw nu e fagintoun sa ayu.

Fakatabuan at Longan

⁷ Tam fakesugun tam faduksay Tikiku at namadungug sa ayu sabaliwa angku. Kanya at matuyan fag fagsuguan ay ku faudgufudan sa tam Fun at fakamulun.

⁸ Gsugu au anya sa ayu laman sumaful am em kayaunanan ay laman gfaksvn tua ay ngay amatanganan.

⁹ Kanya gfaudgufudan Unesimu, tam faduksay at matuyan ay tam fakesugun, ay ay kaiban. Ay duama ban at namadungug sa ayu takafasludan ste.

¹⁰ Aristarku, ku ufud iste sis fagubungan taw, glong ayu te, O manabayan tuam? Katanya yangay anggan Markus, Bernabe at lagbe. Useganani fia fasakboi Markus nu ndasug sanya, kata ku suguan ayu.

¹¹ Tam faduksay Isus at ngayan yangay te, Ustu, glong yangay ayu te, O manabayan tuam? Kanya way lang fag tulu iste ku faudgufudan taw Udyu tagfoyung sabaliwas Dius nu gfagtainan. Ay kanya wan tagfabitsug ku amatanganan.

¹² Epafras tagsiginan ayu, tam Fun Isus at fagsuguan at sadi, glong ayu te, O manabayan tuam? Kabavn kanya maksvn nu gdarangin ayu, laman maksvn tua ay matuyan nu gfaning am tam Dius at fakaylatun.

¹³ Gfatuyan au sa ayu te, kanya maksvn at fanggubukun sa ayu ay sa tam ngay faduksay sis furuan Laudisya ay sis furuan Ierapulis.

¹⁴ Lukas, tam fakesugun tam tagfafia ay Demas glong ayu te, O manabayan tuam?

¹⁵ Ay longi sa tam ngay faduksay sis furuan Laudisya ay sas Ninfas ay sa sangay tagafanud at maful sit bale te, O manabayan tuam?

¹⁶ Ay nu natap am tuy fag rirukan, fatapi yangay sa sangay tagafanud sis Laudisya. Ay anggan am, tapi yangay tagsiginans furuan Laudisya fag rirukan.

¹⁷ Ay longi sas Arkipu te, fataglayuni nu gfakamulun tam Fun at nafon sa anya fag fakamulun.

¹⁸ Au Pablu tagriruk tuy. Amatangani te, maubungan au. Dius at fagmagalangun sumawa nangus fia ayu.