Kulusas 3 - Fanawbuid tagsibaliwas Fakayabian

¹ Dius nafadog wan nafaleleg ayu gasfuan tam Fun Isus. Nu katanya, ay fagamatanganun fasai tua gugat sbanwa, sa tam Fun Isus, at malunggung sis Dius at siun.

² Katanyai tua gugat ay fagamatanganun, dangay tagste swa daga,

³ aroro anbul wan ay dan fag ugali ay katsi ay leleg masuksukan sas Dius gfaudgufudan tam Fun Isus.

⁴ Tam Fun Isus tagfon ayu ay leleg. Ay gina ban ansure, umsure yangay ban am gasfuan anya sat fagmasineun.

At Dan ay at Bagu fag Ugali

⁵ Nu katanya, at masine fabuli wan tagsi ayu tagfaning ste swa daga fag fakaylatun kata fagfanugtugun, ay fagamatanganun ay fagkamatoanun sanya baliwa, ay fagfaningun ay bilug at fakaylatun, ay at mauri fag fakaylatun, ay fagfanganuranun. Fagfanganuranun kata yay nu gseg at yud matuyan fag ngay fagsegan.

⁶ Dius gfaurianan ban nusnga sinu tagfakamulun takatanya fagayu.

⁷ Ebi gugali am takatanya fagayu.

⁸ Ay katsi masine nu gubun wam takatatuy fagayu: fagfangadotamaun, ay fagfangauriun, ay at mauri fag amatanganan, ay fakamalingunun, ay at mauri fag ngay longan.

⁹ Lag am kadkamuagan ya, aroro naubun wam ay dan fag taw anggan ay dan fag ugali,

¹⁰ ay nasulun am at bagu fag ugali. Dius, at nawat ayu, gfataglayun gfabagu ay ugali gfaning anya, laman tumoglag am fia anya.

¹¹ Nu katanya, fagayu taw gsud way, dewa taw Gresya, ay taw Udyu, ay at ke fakatoglagan, ay at yud e fakatoglagan, ay at nafoyungan fag taw, ay at yud yay nafoyungan, ay sik fagsuguan, ay yud fagsuguan. Tam Fun Isus way lang at mafanud, ay kanya tagsi ayu fagayu.

¹² Nu katanya, aroro am wan Dius at nafili ay at nafasaman ay at fakesugun, masine nu kedkesugan tuam fia, ay nu magalang am, ay nu kamababaun am, ay nu malukme am, ay nu mafangagwanta am.

¹³ Maluayani tua, ay fadfalyamani nu e fakauriun way am sas galay at sadi, aroro Fun nafalyam tua ay ngay asalanan.

¹⁴ Tagtungud sas fagayu, edkesugani aroro fakesugun wan tagfutus sat matuyan fag fagmasadiun.

¹⁵ Fabanwani si ay ngay amatanganan fagmanabayanun siginan tam Fun Isus. Aroro siginan at nauroan ayu, antap am te, tam Fun Isus am at bilug at ngay afud. Ay kabavn useganani.

¹⁶ Fabanwani fia tam Fun Isus at longan si ay ngay amatanganan. Ay fadfamatangani sas galay am at sadi ay fodfoyungani sas fagdaul ay fagsafulun. Ay alubadi siginans Dius at Longan fag ngay alubad, ay siginan ay ngay fafil fag ngay alubad, ay siginan ay amatanganan fag ngay alubad, ke fagusegananun sas Dius.

¹⁷ Ay fagayu ay fakamulun, ay anggan ay longan, fakamuluni sa tam Fun Isus at ngayan, ay siginan anya useganani sas Dius tam Mama.

Masadii sat Bagu fag Ugali

¹⁸ Ngay mangena, faningi tua fia ay mesa mangama, aroro katanya tua tam Fun at fakaylatun.

¹⁹ Ngay mangama, esugi tua fia ay mesa mangena, ay dangay am gfauri anya.

²⁰ Ngay sisian, faningi tua ay ngay fagtainan sas fagayu ay fakamulun, aroro kanya tua tagfauseganan tam Fun.

²¹ Ngay mama, lag gfaksvn nu gatul am ay ngay sisian, laman at amatanganan di kamomuy.

²² Ngay fagsuguan, nusnga setaw ay fakamulun, faningi ay ngay tagfayafun dewa e glag ay yud e glag; fakamuluni dangay am lang gfaylatan ay tagfayafun, nu bunway aroro matuyan am, ay gsuyu am tam Fun.

²³ Nusnga setaw ay fakamulun, ugatani tua fakamuluni laman gfaning am tam Fun, ay bundi sas taw,

²⁴ aroro saful wam te, mul ban am tam Fun at famonun at nafalganan sa ayu. Tam Fun Isus wan tam Fun ay kanya ay fagfaningan.

²⁵ Tagfakamulun at mauri gafaurianan ban aroro Dius we fagfili taw.