Kulusas 2 - Fanawbuid tagsibaliwas Fakayabian

¹ Kaylat au nu sumaful am te, se aksvn nu gugatan au gfakamulun laman sa ayu, ay sas fagayu tagafanud sis Laudisya ay anggan yangay sas fagayu at yud batang glag angku.

² Katanya ku fakamulun laman umkaksvn at ngay amatanganan, ay umsadi sas fakesugun, ay laman kanya fagayu tumogdungug ay sumaful fia sabaliwa Dius at algan at masuksukan, we tiba nu bunway tam Fun Isus.

³ Dius at fagmamatanganun ay at fagsafulun masuksukan si tam Fun Isus.

⁴ Nafoyung au sa ayu takatanya laman diam gadayan nusnga sinu ban fag takamoyung takamaylatan nu gfoyung.

⁵ Dewa au yud sanya gamatang ktua gugat ayu. Guseganan au aroro ay ugali masine tua, ay maksvn tua nu gafanud am sa tam Fun Isus.

At Bagu fag Ugali at Masadi sas Isus

⁶ Dakngani gafanud tuam te, Isus tam Fun, fataglayuni tua nu gfaning am anya.

⁷ Fataglayuni nu mabakvd am si tam Fun Isus, ay fagbilugi sa anya ay leleg, ay faksvni ay fagafanudun kata at foyungan sa ayu, ay kabavn useganani.

⁸ Dirii laman diam gatabanan sa sangay foyungan at yud e tungkul ay takamuagan, kata tam ngay mangaguyang at fagsafulun ay siginan fagdaul daga at ugali. Takatanya fag foyungan bunwa siginan tam Fun Isus.

⁹ Aroro Dius at fagmadiusun siwa tam Fun Isus.

¹⁰ Ay siginan ay fagmasadiun sa tam Fun Isus, ay leleg ansak tua. Kanya wan tiba tungud sas fagayu fagmabalyananun ay fagmafunanun sas fanfalad.

¹¹ Aroro siginan ay fagmasadiun sa tam Fun Isus anke fakatoglagan tuam, bundi takalag si ay bilug fag fakatoglagan, nu bunway siginan tua nu gubun am at mauri fag ngay ugali ste swa daga. Takatanya fag fakatoglagan tagsiginan tam Fun Isus.

¹² Siginan nu kasurung am sasad mamam, kata wan nu nbul am, ay nafoli ayu gfasfuan anya, ay nafadog nafaleleg ayu gfasfuan yangay anya aroro gafanud am sas Dius at fagmabalyananun at nafadog nafaleleg tam Fun Isus siginans fagmabulanan.

¹³ Ay am at yud Udyu fag ngay taw, ebi ginan mabulan am aroro sa ay asalanan. Ay dewa katanya, Dius nafaleleg tua ayu gasfuan tam Fun Isus ay nafalyam fagayu tam ngay asalanan.

¹⁴ Dius nafaut wan fagayu at rirukan sabaliwa tam ngay fakamaboun, ay nafalyam wan fagayu siginan tam Fun Isus at narabingan sas fasulungan kayu.

¹⁵ Ay siginan takatanya, Dius nababo wan ngay tagfunan ay at ke ngay fagmabalyananun sas fanfalad. Kanya nafalag sas fagayu taw te, at fawayan nababawan wan.

¹⁶ Nu katanya, lag am gafanud tibak taw dewa glong sa ayu te, mauri way ay fakamulun, sabaliwas fakonun ay fanginum, ay sabaliwa ay ngay fagmafulun ay anggan gina am maful sabaliwa Magdanun nu bagu Kasure, ay Famiangalay fag Menit.

¹⁷ Takatanya fagayu sik ngay aninu way sa takadasug ban. Ay anfasludan takatanya siginan tam Fun Isus.

¹⁸ Lag am gatabanan nusnga sinu at yud matuyan nu kamababaun ay tagseg ngay tagbarita. Takatanya fag ngay taw gfoyung sabaliwa at ngay taginfan, ay kamatungudun sabaliwa at ngay amatanganan tagfaning ste swa daga fag ngay ugali.

¹⁹ Takatanya fag taw wa gfaning tam Fun Isus, tam alfuyu, tagfon fagmatagluun sas fagdaul at bilug siginan at ngay afud nu gsugfunan ay at ngay lalid. Siginan takatanya umkaksvn tam kata Dius at fakaylatun.

²⁰ Anbul oma am gasfuan tam Fun Isus ay nalfas oma am siginan fagdaul daga at ugali at fagmabalyananun. Ay wain ay fagfaningun yay fagdaul daga at ngay suguan te,

²¹ “Lag am gted, ay lag am gfaskud, ay lag am glangbud sumyu?”

²² Fagayu takatanya taw way at ngay suguan ay at ngay foyungan at yud e tungkul. Takatanya fag longan sa way baliwa takamin way nu naon ay nu nainum.

²³ Ngay taw at amatanganan, kafag ngay foyungan kata tua at mamatanganan fag taw at foyungan, aroro kafag ngay tagfandaya maksvn nu gseg ngay tagbarita, ay wa matuyan nu kamababaun ay gfaidapan at sadili. Dewa katanya, takatanya fag ngay suguan wa mafafaragang tam bilug at fakaylatun.