Isayas 9 - Fanawbuid tagsibaliwas Fakayabian

Takadasug ban fag Fun at ke Buba Fagsegun

¹ Dewa katanya, tagidapan fag ngay taw at fagmadulumun kalyam ban. Ebi, Yawi nafabayan wan taw Sebulun ay taw Naftali at talun nu kapla. Dewa katanya, sik menit ban kanya gfasik masulo kafag duak talun. Sanya wan fag ngay talun ngay taw at dalan siginans tigyangan dagat tagsas Liskung Urdan. Kafag ngay talun, Galilea at fagagbilugun, at yud Udyu fag ngay taw at fagbanwanan.

² Ngay taw tagbanwan sisad fagmadulumun lumag ban sik maksvn fag fagmayamagun. Ay fagayu tagbanwan sanya gadamlagan.

³ Yawi, gfayu ban o kanya fag ngay taw, ay gfon ban o sa anya fagayu sik maksvn fag fagusegananun. Kanya ban fagayu guseganan sam daga salubangan kata ngay taw taguseganan gina fanggutluan, ay kata yangay sik ngay taw taguseganan gina gafudan at nabul fag ngay ramraman siginan at nababo fag ngay fawayan.

⁴ Aroro gfalfas ban o am ngay taw siginan nu gafagsuguanan. Ay namalfas ban o anya fagayu kata ban sik ngay fagbaugun, nanlifung ban o at ngay fantungud liug ay anggan at famalang anya fagayu. Namakamulun ban o takatanya, kata ebi am nafakamulun gina o gbabo ngay taw Midyan.

⁵ Ay at ngay tagfawayan at ngay lanbung tagatagukun ay anggan at ngay lapak umsik ngay famaygang wan.

⁶ Ay kaugat yay ban kafag ngay taw nu nanguseganan, aroro umsalug ban si antam sik munama laman at namagtainan ban antam. Ay gfangayan ban anya te, “Madulo fag Tagfalu, ay at Mabalyanan fag Dius, ay at Yud e Fakatabuan fag Mama, ay Tagfae Fagmanabayanun fag Fun!”

⁷ Wa ban e fakatabuan kanya nu gfunan, ay nu gfae fagmanabayanun. Kanya namataglayun ay namaksvn Dabid at fagfagtainanan siginan nu matuyan nu gfunan yud e fakatabuan. Anud, umfasludan ban takatanya, aroro Yawi at Mabalyanan nu kesug kata tua tagigang fag afuy.

Dius nu Kadotama ngay Taw Israel

⁸ Fun Dius nalong te, “Namaurianan kban ngay taw Israel, Akub at ngay kasugfunanan.”

⁹ Fagayu taw Israel ay anggan tagbanwan sis furuan Samarya sumaful te, Dius nalong takatanya. Dewa katanya, aroro sat fakamatungudunun, kanya fagayu glong way te,

¹⁰ “Dewa anrasras wan em ngay bale at mawatan way tisa ay yud mogat fag ngay kayu, gdog yay ban mi nangawat siginan at madasdasan fag ngay gang ay at mogat fag ngay kayu.”

¹¹ Nu katanya, Yawi ban namabitsug fun Resin at ngay fawayan, laman namawayan ngay taw Israel.

¹² Ngay taw Sirya ban kadasug siginans fakamenitan ay ngay taw Filistia kadasug yangay siginans fakayabian laman nanrasras talun Israel. Kanya fagayu kata at madot fag mela at mafalganan wan nangagat. Dewa katanya, Yawi at dotama ya nalyam, ay mafalganan yay namaurianan anya fagayu.

¹³ Kafanud kanya, nu gfaurianan ngay taw Israel, kanya fagayu ya kafoli sas Yawi at Mabalyanan. Ay kanya fagayu wa gamatangan ya anya.

¹⁴ Nu katanya, sik menit way ban, Yawi nu gfaurianan ngay taw Israel, kanya namaurianan at ngay tagfangguna ay anggan at ngay taw, ay kanya ban fagayu umkata sik mangilafang at malifungan at iug ay at liug.

¹⁵ Ngay fagtainan ay at ke fanambagun fag ngay taw umkata kafag mangilafang at liug, ay takamuag fag ngay taglong umkata kafag mangilafang at iug.

¹⁶ Taw Israel at ngay tagfangguna gtabanan way at fagfanggunaun fag ngay taw sat yud matuyan, nu katanya, kafag ngay taw gaduanun.

¹⁷ Nu katanya, tam Fun wa kaylat ngay taw Israel at ngay baguama, ay wa kafanyu at ngay yud e fagtainan ay ngay fagbubayun. Kanya fagayu mauri way ay wa gfaning Dius, ay mapla way at ngay longan. Dewa katanya, Yawi at dotama ya nalyam, ay mafalganan yay namaurianan anya fagayu.

¹⁸ Aroro kafag ngay taw at fagmauriun maksvn wan kata sik afuy tagirug sas wa makmak tagadugiun. Kanya gbia nu gigang kata afuy nu girug sik araw, ay kata sik takabat fag anus at madamvl.

¹⁹ Ay aroro Yawi at Mabalyanan maksvn nu kadotama anya fagayu, anggan at daga umkirug wan, ay kafag ngay taw umkata famaygang takayungu. Ay kanya ban fagayu wa kadkafanyuan ya.

²⁰ Ay kanya fagayu gbul wan ay kon nusnge wain fag fakonun at nalag, dewa katanya, wa kapsug. Ay kon wan anggan at ngay sisian.

²¹ Ngay taw Manase ay ngay taw Efraim nangawayan, ay sanya ginan, kanya fag dua nangasadi laman namawayan ngay taw Uda. Dewa katanya, Yawi at dotama ya nalyam, ay mafalganan yay namaurianan anya fagayu.