Isayas 8 - Fanawbuid tagsibaliwas Fakayabian

Isayas Anke Sisian sik Fakatoglagan

¹ Yawi nalong sa angku te, “Buli sik fagrirukan daul, ay riruki tuy fag ngay longan: ‘Maer-Salal-Kas-Bas.’

² Ay nafili au duak taw at mafatigwananan laman tagfatuyan te, nariruk au. At ngayan Uryas sik tagfon fanggalangun ay Sakaryas, Eberekya at baguama.”

³ Ay sanya ginan, nafataladan au ku bubay. Ay nafafion ay nafasalug sik munama. Ay Yawi nalong sa angku te, “Fangayani am sisian te, Maer-Salal-Kas-Bas.

⁴ Ay kanya ban fag sisian gina yud yay nasaful guro at mama ay at mina, Asirya at fun namul furuan Damasku at ngay ramraman, ay nangago ban furuan Samarya at ngay nafangago.”

⁵ Yawi gdog yay nalong angku te,

⁶ “Kafanyu koma fia nu galaga au ngay taw Uda, kata Liskung Siluak tagarimanan nu gfamilugan, dewa katanya, kanya fagayu wa nsun si angku, ay guseganan sas fun Resin ay fun Peka.

⁷ Nu katanya, namadasug au sa anya fagayu Asirya at fun ay at ngay tagfawayan, takata Liskung Eufrates gina glugwak, ay at mamam nasakfo sas dua tigyangan.

⁸ Ay kanya ban fagayu nu kadasug sas Uda, kata sik liskung nu gfamilugan at kabasadan sitsigons liug, ay gfalugde ban at ngay fakfak sa am talun.” Dewa katanya, Dius gufud tua emi!

⁹ Am fag ngay taw tagsiginan tibak talun, dewa ban am ansadi, gababawan way ban am. Ay am fag ngay taw tagbanwan sa tangayayu fag ngay talun, dungugani! Dewa am nafalganan namawayan emi, gababawan way ban am.

¹⁰ Nusnga setaw ban ay nafalganan fag fakamulun laman gfawayan am emi, wa ban umfasludan kata ay algan, aroro Dius gufud tua emi.

Foyungan sabaliwa nu Gafanud sas Dius

¹¹ Yawi nafoli sa angku at daluap ay nafararang sa angku te, “Lag gfaning am iba at fakamulun.

¹² Ay tibaginan lag am gafanud dewa gibugan glong te, ‘Fagayu taw at maseganama ansadi wan sat mauri fag algan yud e nasaful.’ Ay lag am gtadtaruyan kalimu sat ngay fakalimuun fag ngay taw.

¹³ Au, Yawi at Mabalyanan. Tuyani te, kdi e kalong. Nu katanya, suyui tua ay alimui angku.

¹⁴ Au ban ay fagsarirungan. Dewa katanya, nu sa sangay taw Israel ay sa sangay taw Uda, kata kway sik fakataidan fag gang. Ay nu sa sangay taw tagbanwan sis Erusalem, kata kway sik sangdaw.

¹⁵ Ay ngayu bank taw takataid, takalub, ay takafaurianan. Ay ngayu yangay ban at kumsiuk sanya fag sangdaw, at masuad te, tagatabanan.”

Famararang sa sangay Taguro ngay Falad

¹⁶ Ay Isayas nalong te, “Fagayu am tagfaning angku, tuyani te, wa ban am kalyam ku ngay foyungan sa ayu sabaliwas Dius.

¹⁷ Dewa Yawi naiyan Akub at kasugfunanan, au gafanud ktua sas Yawi. Nu katanya, gagwanta ktua gfanya anya.

¹⁸ Ste au ay anggan ku ngay sisian Yawi at nafon angku. Ami wan sik ngay fakatoglagan siginans Dius laman sa sangay taw Israel, sabaliwas Yawi at Mabalyanan tagbanwan sis Buksul Siun.

¹⁹ “Tiba ginan ban e lumong ayu te, ‘Eti sik foyungan sa sangay tagfangufit ay sa sangay tagbalawvn gibugan, dewa katanya, lag gfakamulun takatanya. Nu bunway nu get am gubuk, fasai tua ay Dius. Ay wain ay fagsaun yay ngay kinbul ay fagnangintoan sabaliwa ngay tagleleg?’

²⁰ Ay nu e gfoyung way yud gfadiuganan Dius at longan kata way sik ngay taw at yud yay nasaful at matuyan.

²¹ “Kanya ban fag ngay taw lumao nusnga nday fag afud talun Israel, ginlufuyan ay ginlunusan. Nu katanya, kanya ban fagayu umdotama ay lumong at maksvn nu mauri sat fun ay sat ngay fagsegan. Ay kanya ban fagayu dewa natangda sas banwa

²² ay nadama sas daga, at lagan ban fagidapun way ay fagmadulumun ay fagafanawaun. Ay gaiyan ban anya fagayu sat maksvn fag fagmadulumun.”