Isayas 7 - Fanawbuid tagsibaliwas Fakayabian

Yawi at Longan laman sas Fun Akas

¹ Gina Akas gfunan sis Uda, Resin, talun Sirya at fun, ay Peka, Israel at fun, nalao sas furuan Erusalem gadgaloan at ngay tagfawayan. Ay dewa katanya, kanya fagayu wa nakatu gbabo. (Akas, Utam at baguama ay Usya at fufu, ay Peka, Remalya at baguama.)

² Ay Uda at fun nu nadungug te, Sirya at fun ay Israel at fun ansadi namawayan taw Uda, kanya fag fun ay fagayu at ngay taw gtadtaruyan kalimu, kaksvn sik fulug nu guig sik fun kayu.

³ Ay sanya ginan, Yawi nalong sas Isayas te, “Tabani am baguama Sear-Asub ay namablang am fun Akas sas fungfung fagfamiluganan mamam tagsit buid fag fagfungsuan mamam, munakbang sis dalan tagsas fagbakbakan lanbung.

⁴ Nanlong o sa anya te, ‘Madiriani tua laman di o kalimu. Ay manabayani tua am amatanganan. Lag gafanawa dewa fun Peka ay fun Resin maksvn nu kadotama emu. Aroro kanya fag dua kata way sik famaygang takanus at yud e afuy ya.

⁵ Kanya fag dua anke algan mauri sa emu, ay nalong te,

⁶ “Namawayan ban ta ay nangagbilug talun Uda. Ay nanfili ban ta Tabeel at baguama laman tagfunan sanya.”

⁷ “ ‘Dewa katanya, Yawi tam Fun nalong te, Wa ban umfasludan takatanya.

^8-9 Aroro talun Sirya wa gtungud furuan daul Damasku, nu inda fun Resin nu gfunan. Ay Damasku wa yangay gtungud at fun Resin. Ay talun Israel wa gtungud furuan daul Samarya, nu inda fun Peka nu gfunan. Ay Samarya wa yangay gtungud at fun Peka. Ay e rumasras ban talun Israel nu nlangfe unumk safulu e limak banwa, ay wa ban kangayan ya te, sik talun at taw. Ay am fag ngay taw Uda, nu dway mogat ay fagafanudun sas Dius, wa yangay ban am mogat.’ ”

¹⁰ Yawi gdog yay glong sas Akas te,

¹¹ “Au am Dius Yawi. Eti sa angku sik fakatoglagan laman tagfatuyan sa emu te, namakamulun au ku ngay fatuyanan sa emu, dewa maksvn nu maidap, dewa tagsiginan tangabasad, ay tagsiginan tiba tungud.”

¹² Ay Akas nabalus te, “Duan, kwa nanget fakatoglagan; kwa namaskud Yawi.”

¹³ Ay Isayas nalong te, “Dabid at ngay kasugfunanan, dungugani! Faragangi wan nu gfauri am ngay taw. O nunda namauri yangay am anggan ku Dius?

¹⁴ Nu katanya, tam Fun Dius namasure ban sa ayu sik fakatoglagan: sik baguina ban gfafion ay namasalug sik munama, ay gfangayan ban anya te, Emanuel.

^15-16 Ay kaduge ban kanya fag sisian yud nasaful gsaruy at mauri ay gugali at matuyan, ay at fakonun baka way at susu bilug kindai ay deut, umrasras ban am fakalimuun fag duak fun at talun, ay wa ban e gbanwan ya sanya.

¹⁷ “Yawi ban namadasug sa emu ay sam fagfanggunaun fag ngay taw ay sam ngay kalongan, sik fagidapun at yud batang kadasug sa ayu, siginan ebi gina talun Israel ay talun Uda gsaruayan. At masuad, namadasug ban sa ayu talun Asirya at fun laman namawayan ayu.

¹⁸ “Ginanya ban fag buknga, Yawi gfaful ngay lango siginans talun Igiptu at fungfung fagfamiluganan mamam ay anggan ngay gabe siginans Asirya at ngay fagtanuman.

¹⁹ Ay kanya ban fagayu namanwan sas fagdaul talun Uda, ay sa tangabasad fag liskung, ay sa sangay luib, ay sat madugi fag ngay tanum, ay sas fagnamafangonan fagbaugun.

²⁰ “Ginanya ban fag buknga, Fun Dius gagbilug Asirya at fun tagsiginans dife Liskung Eufrates laman nanrasras ay talun. Kanya namaurianan ayu kata at nabayad fag tagufo laman nangufo ay buk, ay ay umi, ay ay sigyu.

²¹ “Ginanya ban fag buknga, galay sik taw at fagbaugun at sawad sadi way langk baka ay duak kambing,

²² ay sanya ginan way lang at fagbulan susu bilug, aroro kasakan wan. Ay fagayu at kinsawad sis Uda at fakonun at kindai fag susu bilug tua ay deut.

²³ At tanuman wat ubas nu sadik libuk fun, nu kabayad sadik libu tuak lifung salapi, dewa katanya, ginanya ban fag buknga, tagtugbung sit ngay gamasun at madugi way fag ngay makmak.

²⁴ Ngay taw ban nanlafat sanya gbuba at ngay godun, aroro fagdaul at talun antubas wan ay gadugiun way lang.

²⁵ Ay wa ban e nanlao ya sa sangay buksul sa ebi ataw at ngay fagtanuman, aroro antubas wan ay gadugiun way lang, ay sik fagnamafangonan way lang fagbaugun.”