Isayas 66 - Fanawbuid tagsibaliwas Fakayabian

Yawi ban Namaurianan ngay Talun

¹ Katatuy Yawi at longan: “Banwa ku faglunggungan, ay fagdaul daga ku fagsiadan. Nu katanya, tain ban ay fagnangawatun fag bale laman sa angku? Ay dada ban fag furuan nu namafiangalay am angku?

² O nunda bunwa au at nawat fagayu? “Au Yawi, glong au te, Guseganan au ngay taw takamababaun, tagubun at ngay asalanan, ay tagfaning tua ku ngay longan.

³ Dewa katanya, wa ban kata kanya nu gdama au ngay taw tagfaning at sadili fakaylatun, ay taguseganan gfakamulun at maksvn fag fagmauriun. Kanya ban fagayu dewa nafilas sik baka laman at fanggalangun, gtap kway anya fagayu te, takamabul. Ay nu nanamon ban sik tupa laman at fanggalangun, gtap kway te, kata way sik idu at nafabul. Ay nu nanamon ban at gutluan fag ngay fanggalangun, at ngay fanggalangun ban kata way bumbu at taguk. Ay kanya ban fagayu nu nairug at mabebanglu fag lune, laman gamatang angku, gtuyan kway ban te, kanya fagayu gseg way ngay fagsegan.

⁴ Ay nustua, namadasug kban sa anya fagayu ku faurianan at maksvn, tagfae fakalimuun ban maksvn anya fagayu. Aroro ebi gina au guro ayu, wam nabalus angku, ay gina au garingang, wam nadungugan. Kanya fagayu nafakamulun at mauri si ku daga salubangan, ay nafakamulun ku fagyudun kaylat fag ngay fakamulun.”

⁵ Fagayu am tagfaning Yawi at longan, dungugani at ngay foyungan: “Aroro matuyan tuam sa angku, ay ngay iba ankuri ay naiyan ayu. Kanya fagayu gfalingun glong te, ‘Yawi nangus gfalag wan sa ayu at fagmabalyananun laman lumag ami nu guseganan am!’ Kanya ban fagayu umkapla way.

⁶ O gdungug am ngay aringang sis furuan ay sis Yawi at bale? Kanya Yawi at aringang gina gfasud at ngay fawayan.”

⁷ Yawi gdog yay nalong te, “Erusalem umkata sik mangena tagafasalugun at yud yay kasait at ungdan, at nafasalug wa vtv.

⁸ Sinu at batang gdungug ay glag takatanya? O sik talun masakit nu kasik talun? Dewa katanya, Erusalem ban nu nke fagidapun, at ngay taw kasalug wan.

⁹ Kaylat au kanya fagayu nu kasalug wan masakit. Ay katsi buknga wan kanya fagayu nu kasalug, o nunda kya kaylat nu kasalug? Sabv! Kwa kaylat kanya fagayu nu yud kasalug. Au, Yawi, taglong tuy.

¹⁰ Fagayu am takesug Erusalem useganani ay segi gasfuan anya,

¹¹ laman umsik maramraman yangay am kata sik ngenge tagsusu sit mina ay napsug.”

¹² Aroro Yawi glong te, “Namaramraman kban furuan Erusalem. Ay tiba bank talun namuba sa anya at ngay ramraman, kata ban sik liskung nu glugwak. Ngay taw Erusalem umkata ban am sik ngenge; at mina galaga, gsalilian ay gfasusu, ay gugwan anya.

¹³ Namasun kban ayu kata sik mina nu gfasun at ngenge.”

¹⁴ Nu nalag ban am ku fakamulun takatanya, guseganan am ay umkaksvn kata sik tanum at marabung. Yawi ban gfalag at fagmabalyananun sat ngay fagsuguan, ay dewa katanya kanya ban gfalag at dotama sat ngay fawayan.

¹⁵ Dungugani! Yawi kadasug wan, gbuba afuy. Kanya gsakay sit ngay famawayan fag ngay faguyudan ay kata sik fulug tagbaribungan. Kanya namalag at dotama sat ngay fawayan, ay namaurianan anya fagayu siginan sik igang.

¹⁶ Yawi ban gagbilug afuy ay fiso tagsumbalian at uyup, laman namaurianan at ke asalanan fag ngay taw, ay ngayu ban at fagnamabulun.

¹⁷ Yawi nalong te, “Gasfuan ban nu kabul ngay taw takamuag te, di e malong, ay tagfasine at ngay sadili siginan nu gseg at ngay fagsegan sat ngay fagtanuman. Kanya ban fagayu kabul gina kon bumbu at yamas, ay but, ay tiba yak mangilafang at natuyan te, masuya.

¹⁸ “Saful kway kafag ngay taw at fakamulun ay at ngay amatanganan. Nu katanya, kadasug kban laman namaful au fagayu talun at taw, ay kanya ban fagayu lumag ku fagmabalyananun.

¹⁹ “Namalag kban at madulo sa anya fagayu. Ay fagayu ban at sawad gsugu au sa sangay talun Tarsis, Pul, Lud (ngay taw Lud saful gagbilug godun), ay sas Tubal, Gresya, ay sa tiba yak talun tangayayu yud batang gdungug sabaliwa ku fagmasineun, ay yud batang glag ku fagmabalyananun. Kanya ban fagayu namoyung sanya fag ngay talun at taw sabaliwa ku fagmabalyananun.

²⁰ Ay kanya ban fagayu gina guli siginan sangay talun gtaban ban ay ngay kalongan. Kanya ban fagayu gsakay sit ngay kabayu, sit ngay mola, sit ngay kamelyu, ay sit ngay faguyudan. Ay gtaban ban sa ku nafili fag buksul at yud e malong tagsis Erusalem laman sik fanggalangun sa angku, kata ebi ngay taw Israel nu gfon at ngay fanggalangun si ku bale, fanggalangun fag ngay fakonun masuadan sit masine fag fagsuadan.

²¹ Ay tiba ban gfili au laman sik ngay tagfon fanggalangun ay taggubuk ngay tagfon fanggalangun. Au, Yawi, taglong tuy.

²² “Nu setain at bagu fag banwa ay fag daga ku fagnangawatun ban nu yud e fakatabuan, am ngay kasugfunanan ban wa yangay e fakatabuan, ay gamatang ktua ban gugat ayu kabavn.

²³ Ay galay fagmafulun sabaliwa Magdanun nu Bagu Kasure, ay Famiangalay fag Menit, fagayu am fauseganani angku.

²⁴ Ngay taw tagseg angku gina gduksun siginans Erusalem, kanya fagayu lumag at mabulan fag ngay taw at nafamabo angku. Ay ngay ulud takon anya fagayu wa kabul, ay afuy tagirug anya fagayu wa karabung. Ay fagayu ban taw kauri kafag ngay taw takamabo.”