Isayas 65 - Fanawbuid tagsibaliwas Fakayabian

Faurianan ay Famalangfe

¹ Yawi nalong te, “Nafatoglag au angku sa sangay taw at yud ginto ya sabaliwa angku. Ay kanya fagayu nalag angku dewa yud narvbvy. Ay dewa yud guro angku, nafatoglag ktua sa anya fagayu ku sadili.

² Gfanya au gugat ku ngay taw takamabo ay yud gfaning at masine fag ugali, ay at fagfaningun at sadili way fakaylatun.

³ Ku ngay taw nafadotama angku. Ay gfataglayun gfalag sa angku nu gseg at ngay fagsegan gina gfon at ngay fanggalangun si sangay tanuman, ay gina girug at ngay mabebanglu fag ngay lune sit ngay tungud bale.

⁴ Ay galay yabi kanya fagayu malunggung sa sangay fagfolian, ay sat masuksuk fag ngay buknga laman namakamatoan ngay labang. Ay kanya fagayu kon bumbu at yamas ay tiba yak yamas at natuyan te, masuya.

⁵ Ay kanya fagayu glong sat iba te, ‘Lag kakbang angku; mansik masuya au. Aroro kdi kata emu au sik yud ktua e malong!’ Maksvn nu kauri au takatanya fag ngay taw. Ay nu kadotama au anya fagayu kata sik afuy tagigang fagngabak menit.”

^6-7 Yawi nalong yay fia te, “Dungugani! Nariruk wan ngay faurianan sa ku ngay taw. Kwa masine maragangan lang; namasud au anya fagayu nu se aksvn at ngay asalanan, ay at ngay mangaguyang at ngay asalanan. Aroro kanya fagayu nairug at ngay lune at mabebanglu ay nafadotama angku si sangay fungsu ay sa sangay buksul. Nu katanya, namasud au anya fagayu nu se aksvn at ngay nafakamulun.”

⁸ Yawi nalong yay fia te, “Lag yap gfangulan sik raug ubas dewa tibak rawvg andan wan, aroro at masine fag rawvg e fanambagun yay. Katanya yangay ban ku fakamulun sa ku ngay taw, kya ban gfamin anya fagayu. Gfalangfe kyay ban fagayu tagfaning angku.

⁹ Gfasawad kban Akub ay Uda at kasugfunanan tiba, ay kanya ban fagayu at nangagbilug ku nafili fag talun at ke ngay buksul. Kanya fagayu ku nafili ay ku ngay fagsuguan at namanwan ban sanya fag talun.

¹⁰ Namaramraman kban anya fagayu at nanangakbang angku. Ay gfon kban sa anya fagdaul Sarun ay datag Akur laman at fagnamafangonan at ngay fagbaugun.

¹¹ Ay dewa katanya, namaurianan kban ayu fag ngay taw at yud gfaning angku ay at yud gfae masuad ku nafili fag buksul at yud e malong. Nustua gfon wayam ay ngay fanggalangun sa sangay fagsegan nu dada nu gafanud am te, gfadasug ban sa ayu at masine.

¹² Nu katanya, nafalganan kwan nu kabul am. Aroro ebi gina au guro ayu, wam nabalus angku, ay gina au garingang, wam nadungugan. Nafakamulun am at mauri sa ku daga salubangan; ku fagyudun kaylat fag ngay fakamulun.

¹³ “Nu katanya, au ay Fun Yawi, glong au te, Ku ngay fagsuguan ban gfangon tua ay ginum, dewa katanya, am ban kalunus wayam ay kadanum. Ku ngay fagsuguan ban guseganan tua, ay am ban kapla wayam.

¹⁴ Ku ngay fagsuguan ban galubad tua guseganan, dewa katanya am ban gwayway wayam kabalu ay gidapan ay ngay amatanganan.

¹⁵ Ay ku ngay fagsuguan ban gfauri ay ngayan, ay au Fun Yawi, at namabul ayu. Dewa katanya, namon kban sa ku ngay fagsuguan at bagu fag ngay ngayan.

¹⁶ Nusnga sinu taglong te, e fon ban sas Israel ay tagfatuyan sanya fag talun, kanya masine nu gfakamulun takatanya siginan nu glong ku ngayan, at matuyan fag Dius. Aroro kwa ban gamatangan ya at kinlangfe fag ngay fagidapun.

¹⁷ Dungugani! Nangawat kban at bagu fag banwa ay fag daga. Aroro at dan fag banwa ay fag daga kalyam wan.

¹⁸ Nu katanya, kabavn useganani ay mafuli laman sa ku ngay fagnamakamulunun. Aroro furuan Erusalem ban namasik fagusegananun au sa sangay taw, ay tagbanwan ban sanya fag ngay taw gfae fagusegananun yangay sa tibak taw.

¹⁹ Ay guseganan kyangay ban furuan Erusalem ay sa sangay taw tagbanwan sanya. Sanya ban we gwayway ya ay get gubuk, ay we gfandeng.

²⁰ Ay sanya ban fag furuan at bagu kasalug ay at ngay sisian we kabul. Ay nusnga sinu ban at kinbul at banwa gina sadik sandan, kanya katap te, mabaguama yay, ay nusnga sinu at kinbul at yud nadasug sadik sandank banwa, tuyani anya te, ku nafaurianan.

²¹ Ay ginanya ban, ku ngay taw kawat at ngay bale laman at fagbanwanan. Ay kanya ban fagayu nananum at ngay wat ubas, ay kanya tua ban fagayu taggutlu.

²² Ay bunwa ban at ngay fawayan at namanwan sat ngay bale, ay at nanggutlu at ngay fananumun. Aroro nu setain sik fun kayu nu ngaduge nu yud kayango, katanya yangay ban ku ngay taw nu gleleg, ay kanya tua ban fagayu tagagbilug at ngay nainlufuyan.

²³ Kanya ban fagayu wa gfakamulun at yud e tungkul, ay at ngay sisian ban di gdalan sat maksvn fag fagidapun. Aroro Yawi nafaramraman anya fagayu, anggan at ngay kasugfunanan.

²⁴ Ay kanya ban fagayu gina nanget ay gina get, gbalus kwan at darangin.

²⁵ Ay ginanya ban fag ngay menit ngay idu talun ay ngay tupa magamut way nu gfangonan. Ay ngay liun ban ay baka magamut kon ngay makmak. Ay fagayu ban ule we gfangagat ya. Ay wa ban e namauri ya ay nanrasras ku nafili fag buksul at yud e malong. Au, Yawi, taglong tuy.”