Isayas 61 - Fanawbuid tagsibaliwas Fakayabian

Yawi Namalangfe at ngay Taw

¹ Tam Fun Yawi at Falad si tua angku aroro kanya nafili angku laman namoyung at masine fag barita sat yud e kwa. Kanya nasugu angku laman namasun at yud e fagsegun ya, ay laman namoyung sat natabanan fag ngay taw ay sat maubungan fag ngay taw te, e fagmanabayanun wan.

^2-3 Nasugu yangay angku laman namoyung au te, katsi fag buknga Yawi namalangfe at ngay taw ay namaurianan at ngay fawayan. Nasugu yangay angku laman namasun au ngay takabalu sas Siun. Abat ngate gfoli dafug sat alfuyu laman famasaful te, kabalu, kanya naugwag way langis ay nasangboan barugwak at famasaful te, e fagmanabayanun. Ay kanya umkata ngay fun kayu at mogat, Yawi at natanum. Ay e gtoglag ban anya fagayu te, at matuyan fag ngay taw tagfauseganan Yawi.

⁴ Ay kanya gdog yay nangawat at ngay furuan taglugo wan nu marasrasan.

⁵ Dius at ngay taw, tiba bank talun at ngay taw nangafagsuguanan ayu. Kanya ban fagayu nangalaga ay ngay fagbaugun, ay namakamulun sa ay daga ay sa ay ngay tanuman wat ubas.

⁶ Gfangayan ban ayu te, Yawi at ngay tagfon fanggalangun ay tam Dius at ngay fagsuguan. Gagbilug ban am tibak talun at ramraman, ay guseganan ban am.

⁷ Abat ngate ban am gafalingunan, ay gutluan ban duak kayu ay fagsegun, nu katanya, maksvn ban nu guseganan am. Ay kabavn ban manabayan tua nu gbanwan am.

⁸ “Au, Yawi, guseganan ktua at matuyan. Kauri au ngay tagfangkamul ay tagfakamulun at mauri. Ay siginan ku fagmatuyanun, namon kban sa ku ngay taw nusnge wain, ay nangawat kban sa anya fagayu sik nasadian at yud e fakatabuan.

⁹ Ay at ngay kasugfunanan ban umsik takadungug sas fagayu talun. Ay fagayu ban at lumag glong te, au, Yawi, at nafakamulun at masine sa ku ngay taw.”

¹⁰ Guseganan au sas Yawi ku Dius, aroro kanya nafalangfe tua ay nafae fagmatuyanun angku, kata nu nafae lanbung angku. Ay ankata au sik mangama at nangadadwa at ke lanbung masine kata ngay tagfon fanggalangun, ay kata yangay sik mangena at nangadadwa at mafasinean.

¹¹ Aroro nu setain ngay fananum nu gtugbung sis daga, katanya yangay Yawi tam Fun nu gfasure fagmasineun ay famauseganan sas fagayu talun.