Isayas 60 - Fanawbuid tagsibaliwas Fakayabian

Erusalem ban at Fagmasineun

¹ “Erusalem, alunggungi wan, ay yamagi kata menit, aroro andasug wan am tagfalangfe. Yawi ban at fagmabalyananun tagyamag emu.

² Sik maksvn ban fag fagmadulumun sumuklub ngay talun sas fagdaul daga, dewa katanya, Yawi ban at fagmabalyananun tagyamag emu.

³ Ngay talun at ngay taw ay at ngay fun umkakbang ban sa emu.

⁴ Famanawani sam ligung, am ngay taw maful wan. Am ngay sisian fag ngay mangama tagsiginan tangayayu nantungul emu, ay am sisian fag ngay mangena kata ngay sisian tagasalilianan.

⁵ Ay nu nalag ro wo takatanya, guseganan ro wo maksvn, aroro gfadasug tua sa emu tibak talun at ngay ramraman.

⁶ Ay ay talun umkapnu kamelyu siginans Midyan ay Efa. Ay kanya fag ngay taw siginans Syeba umdasug sa emu gbuba gintu ay ngay famaebebanglu fag lune laman nanseg Yawi.

⁷ Ngay taw Kedar ay ngay taw Nebayut namon ban sa emu at ngay tupa, ay kanya wan at masine fag ngay fanggalangun sa angku laman gfauseganan ktua ku bale.

^8-9 Nataw manga atsi tagfioan takata linyabu tagiwangan sis kiwang ay takata labikung nu guli sat fugad? Kanya furuan Tarsis at ngay sakayan lino gbuba am ngay taw, laman namauli siginan tangayayu fag talun, ay e buba sanbung salapi ay gintu laman sa angku, ay Dius Yawi, Israel at Dius at yud e Malong, aroro kanya gfauseganan ktua emu.”

¹⁰ Yawi nalong sas Erusalem te, “Tagsiginan ban tibak talun at ngay taw nangawat am ngay alad, ay at ngay fun ban namakamulun sa emu. Dewa au nafaurianan emu aroro sa ku dotama, kafanyu au emu aroro matuyan ktua.

¹¹ Kabavn am sakbawan maluangan tua laman gfasakbo ngay talun at ngay ramraman. Ngay fun gsugfunan gsakbo sa emu.

¹² Aroro umfaurianan ban ngay talun ay ngay fagfagtainanan at yud gfaning emu.

¹³ Namagbilug kban sa emu Lebanun at ramraman: at masine fag ngay fun kayu laman famasine ku bale.

¹⁴ Tagfalingun ban emu at ngay sisian umkakbang sa emu ay kamababaun. Ngay tagfauri emu gtudan ban sam daga salubangan, ay kanya ban fagayu gngayan emu te, Yawi at Furuan, ay mannga ‘Siun, Israel at Dius at yud e Malong at Furuan.’

¹⁵ Dewa nafamabo ay nafauri emu, ay wa nafae masuad, namasik takadungug kban emu kabavn ay fagayu ban kasugfunanan guseganan.

¹⁶ Ngay talun ban ay ngay fun galaga emu kata sik mangena nu gfasusu at ngenge. Nu katanya, sumaful ban o te, au Yawi, am Tagfalangfe, Akub at Dius at Mabalyanan.

¹⁷ Ngay tansu gtubus kban gintu, ay ngay sanbung gtubus au salapi, ngay balse gtubus kban tansu, ay ngay gang gtubus au sanbung. Nu katanya, fagmanabayanun ban ay fagmatuyanun gbanwan tua si emu.

¹⁸ Di ban e gfangagras ya sim talun, ay wa ban e faurianan ya takadasug sa emu. Fakalangfeun ban gligung emu kata sik alad, ay fagayu ban tagsakbo sa emu gfauseganan ban angku.

¹⁹ Bunwa ban menit ya tagyamag emu gina swa menit, ay bunwa ban magdanun ya tagyamag emu sisad yabi, aroro au wan Yawi tagyamag emu kabavn. Au wan Dius tagfon emu fagmayamagun.

²⁰ Kabavn au wan menit ay magdanun at yud kafalyu, ay umkalyam ban am ngay fagagwantanun.

²¹ Ay am ngay taw ban umsik matuyan tua, ay kanya ban fagayu gagbilug at talun kabavn. Kanya fagayu nafakata au sik tanum ku natanum laman gfalag au ku fagmasineun.

²² Kanya wa ngayu, dewa katanya umkayu ban. Kanya sik ngay yud e kwa, dewa katanya, umsik mabalyanan ban fag talun. Au Yawi, gabanganan kban gfakamulun takatanya nu ndasug ginanya fag buknga.”