Isayas 6 - Fanawbuid tagsibaliwas Fakayabian

Nu Gfili Isayas

¹ Gina fun Usya kabul fag banwa, nalag au tam Fun Dius nu malunggung si tiba tungud fag fagmalunggungan, ay at lanbung aba ankapnu sat basad bale.

² Sit tungud alfuyu e ngay awatan tagsiginans banwa. Ay galay at sadi e unumk fakfak. At fakfak at dua gtabun at mesa mata, ay at dua gtabun at mesa darafa, ay at dua at fanlayug.

³ Ay kafag ngay awatan nasfuan nauro te, “Yud e malong, yud e malong, yud e malong, Yawi at Mabalyanan! At kamasuloan ankapnu sas fagdaul daga.”

⁴ At kaksvnan kanya fag awatan nu guro, nauig Yawi at bale at fagfatungkudan, ay anus ankapnu sasad basad bale.

⁵ Nu katanya, nalong au te, “Afanyuan au! Matuyan wan umfaurianan au, aroro glong au gugat at mauri, ay gbanwan au magamut si sangay taw taglong gugat at mauri. Ay katsi, nalag au tam Fun, Yawi at Mabalyanan!”

⁶ Ay sanya ginan, at sadik awatan nalayug nangadasug sa angku, e buba sik fanikfit singsing afuy siginans fagirugan fanggalangun.

⁷ Ay kanya nafatayuk kafag singsing afuy sa ku bibig ay nalong te, “Katsi nafatayuk kwan tuy fag singsing afuy sam bibig, nu katanya, wo e asalanan ya; nafalyam kwan.”

⁸ Ay nadungug au tam Fun nu glong te, “Sinu ku fagsuguun? Sinu ban tagfosuk em longan sa sangay taw?” Ay nabalus au te, “Ste au. Sugui angku.”

⁹ Ay tam Fun nalong te, “Loi wan ay foyungi sa ku ngay taw Israel te, ‘Gdungug oma am gugat, dewa katanya, wam gtogdungug. Ay gdama oma am gugat, dewa katanya, wam kayamag!’ ”

¹⁰ Ay nalong yangay te, “Fatugasi wan kafag ngay taw at amatanganan. Fayudi wa gdungug ay fayudi glag anya fagayu, laman ban wa gdungug ya, ay wa glag ya, ay wa gtogdungug ya. Namakamulun o takatanya laman ban kanya fagayu wa kafoli sa angku ay laman wa kafia ya.”

¹¹ Ay nainto au te, “Ku Fun, seduge tua ban kanya fagayu nu kamaogatun?” Ay nabalus angku te, “Yakmay ban yud e gbanwan ya sat ngay bale, ay gina ban at ngay furuan ay at ngay tanuman anrasras,

¹² ay yakmay kban naiyan ngay taw Israel sa tangayayu fag talun, ay gina ban at talun ansik tubas.

¹³ Ay dewa ban anke sawad yay sit talun at fasafuluk afud taw Israel, e namamin yay ban. Dewa katanya, e nafili kyay at kumsawad sanya. Kanya ban fagayu umkata sik bvtang at yud e malong, ay kata sik nagtudan kayu at natugbung yay.”