Isayas 57 - Fanawbuid tagsibaliwas Fakayabian

Taw Israel at ngay Fagsegan Anfaurianan

¹ At matuyan fag taw nu nbul, we ginto ya te, “Wain at faginbulun?” Ay we nasaful te, Dius nabul wan kafag taw laman gfasaman siginans fagmauriun.

² Aroro at matuyan fag taw nu nbul wan, manabayan wan ay gfiangalay.

³ Dewa katanya, tagfangufit, tagfanugtug, ay takamatugtug am at kasugfunanan, gewan.

⁴ Gfadangungu am laman gfalingun at matuyan fag ngay taw. Am wan fag kasugfunanan takamabo ay takamalingun.

⁵ Ay gseg am ngay fagsegan gina am gtaladan si sangay fun kayu at marabung at lanbung, ay natuyan te, yud e malong. Ay gfon am ay ngay sisian laman ay fanggalangun si sangay fagfamiluganan mamam sis tigyangan buksul.

⁶ Nawat am ay ngay fagsegan ay fangawat ngay gang madalusan tagsiginans liskung, ay gseg am kaduge am gfon ay fanggalangun fag fakonun ay fag fanginum. O guseganan au takatanya ay ngay fakamulun?

⁷ Kawat am ay ngay fagfiangalayan sa tangabat fag ngay buksul, ay sanya wan nu gfon am ay ngay fanggalangun.

⁸ Ay nafasa am ay day sakbawan ay ngay fagsegan. Siginan nu gtalyuyan am angku, nataygilidan am si tagbia fag fagfiangalayan, ay nafataladan am ngay mangena. Ay naylat am glag at malulasan.

⁹ Ay nanamuba am langis ay famaebebanglu sa ay fagsegan Mulek. Ay nasugu am at nanrvbvy tibak fagsegan sa tangayayu fag talun, ay dewa sa sangay fagfolian nanrvbvy yayam.

¹⁰ Ay gfalufuy am ayu siginan nu grvbvy am ngay fagsegan, ay glong am te, “Lumag ban tam.” Gfabulun am gfaksvn ay ngay amatanganan, nu katanya wam kamomuy.

¹¹ Yawi nalong te, “Sinu fia ay fakalimuun fag ngay fagsegan laman kamuag am sa angku? Nalyam wam angku ay wam gamatang ya. Wain ay fagyudun gsuyu angku? O siginan nu yud au garingang ngaduge fag buknga?

¹² Nu glong am, masine ay matuyan ay ngay nafakamulun, ay dewa katanya namasaful au te, setain ay ugali, ay takatanya fagayu we tungkul sa ayu.

¹³ Ay nu naet am gubuk, fabayani wan ay ngay fagsegan taggubuk ayu. Kanya ban fagayu kalayug siginan at maksvn fag tagmara. Dewa katanya, nusnga sinu tagafanud sa angku, namanwan tua ban sanya fag daga ay nangagbilug at yud e malong fag buksul.

¹⁴ Glong au te, ‘Fasinei dalan ku ngay taw at fagnanloan.’ ”

¹⁵ Ay Tiba Tungud fag Dius at yud e malong ay tagleleg kabavn, glong yay fia te, “Gbanwan au sa tangabat ay yud e malong fag buknga, dewa katanya, gbanwan kyangay maful si sangay taw takamababaun ay at naubun at asalanan, laman gfabitsug au anya fagayu.

¹⁶ At matuyan, kabavn kwa namawayan ay namaurianan ayu, aroro nu nafakamulun kway ro takatanya, umbul ro ku nawat fag ngay taw.

¹⁷ Andotama au aroro ngay taw Israel gasalanan ay gfangalabian, nu katanya, nafaurianan kwan ay naiyan anya fagayu. Dewa katanya, kanya fagayu gfataglayun yay nu gasalanan.

¹⁸ Nasaful kwan kanya fag ngay taw at ugali, dewa katanya, gfalyam kyay, ay galo au ay gfasun ngay takabalu.

¹⁹ Ay nu katanya, kanya ban fagayu sumeg angku. Ay dewa tangayayu ay at munakbang, namae fagmanabayanun kban anya, ay gfafia kban anya fagayu. Au, Yawi, taglong tuy.

²⁰ Dewa katanya, at mauri fag ngay taw wa manabayan. Kanya fagayu kata way sik lugwak tagfalimus ngay lifak ay ngay nagukasan sis tigyangan dagat.

²¹ Sik taw at mauri wa ban mabayan nu gbanwan.” Katanya ku Dius at nalong angku.