Isayas 56 - Fanawbuid tagsibaliwas Fakayabian

At Famonun sa sangay Talun

¹ Katatuy Yawi at longan, “Matuyani tua nu gfawabilugan am, ay fakamuluni at masine, aroro munakbang wan nu gfalangfe au ayu ay nu gfasure au ku fagmatuyanun.

² Mauseganan ngay taw tagfakamulun tua takatanya, ay tagfaning ku ngay suguan sabaliwas Famiangalay fag Menit. Ay mauseganan yangay sik taw at yud gfakamulun at mauri.”

³ Ngay taw tagsiginan tibak talun at nafatigwanan at ngay sadili sas Yawi, lag gamatangan te, wa katap ya sas Yawi at ngay taw. Ay ngay mangama at nafaluasan, lag gfanlonganan te, “Kata waymi sik fun kayu at mayangoan.”

⁴ Yawi, glong te, “Kanya fag ngay mangama tagfaning tua ku ngay suguan sabaliwas Famiangalay fag Menit, ay tagfakamulun tua nusnge wain at mauseganan sa angku, ay tagfafasludan tua ku nasadian,

⁵ masakbo tua ban sa ku bale, ay gfae fagusegananun kban anya gtungud tua nu nke sisian, laman ban ngay taw gamatang tua gugat anya fagayu.

⁶ Namae fagusegananun kyangay ban tibak talun at ngay taw at nafatigwanan sa angku at ngay sadili laman namakamulun sa angku, ay laman kesug angku, ay laman ku ngay fagsuguan, ay laman gfaning ku ngay suguan sabaliwas Famiangalay fag Menit, ay at namafasludan ku nasadian.

⁷ Gtaban kban anya fagayu sa ku nafili fag buksul yud e malong ay namae fagusegananun kban anya fagayu sa ku bale daranginan. Ay kaylat kban at fagirugun fag ngay fanggalangun, ay tiba yak fanggalangun at nairug sa ku fagirugan, aroro ku bale ban kangayan te, fagayu talun at taw at fagnandaranginan.”

⁸ Yawi tam Fun nafaful at natabanan fag ngay taw Israel, ay kanya glong te, “Namaful kyay ban tibak taw, saman ya ku nafaful ebi taguna.”

⁹ Akbangi, am fag ngay taw at madot kata ngay mangilafang sisad araw, ay namamin am ku ngay taw Israel.

¹⁰ Ngay taw Israel nangus at ngay tagfangguna gulit tua. Ay aroro mangaro, kanya fagayu kata way at yud glag ay at yud e fagsafulun, ay kata yangay tagulit fag ngay idu at yud gsubang ya. Kanya fagayu gtaygilidan way gugat gtiug ay gtaginfan.

¹¹ Ay kanya fagayu kata way tagfangkumon fag ngay idu at yud gfangapsug. Ay kata at yud mamatanganan fag ngay tagalaga tupa, ay galay at sadi gfakamulun kata at fakaylatun, ay at fagamatanganun sa way lang at sadili.

¹² Kanya fagayu glong te, “Gewan! Namul tam fanlangu laman galangu tam! Aroro nu setain nu yud tam e fagayudanun katsi fag menit, katanya yangay ban anggan balabag.”