Isayas 55 - Fanawbuid tagsibaliwas Fakayabian

Dius at Fakafanyun

¹ Yawi glong te, “Iste wan mamam! Fagayu am takadanum akbangi! Dewa am at yud e famayad, akbangi ay inumi! Gewan wan, buli fanginum ay susu bilug!

² Wain ay fagfangulanun ay ngay salapi sat yud e tungkul fag ngay fakonun? Wain ay fagfaminun ay nalufuyan sat yud mafapsug ayu? Dungugani angku, ay oni at mataba fag ngay fakonun.

³ Akbangi ay dungugani angku laman gleleg tuam. Nangawat au sik nasadian laman sa ayu, ay wa ban e fakatabuan. Kafanyu kban ay kesug ayu kata ku nafatuyanan sas Dabid!

⁴ Nafili au anya laman gfunan sa sangay talun at taw, ay siginan anya nafasure au ku fagmabalyananun sa kafag ngay taw.

⁵ Nanguro am ay fagyudun toglag fag ngay talun at ngay taw, ay kanya ban fagayu gabanganan nangakbang sa ayu, aroro au Yawi, Israel at Dius at yud e Malong, at nafae famauseganan ayu.”

⁶ Akbangi sas Yawi ay darangini kaduge kanya munakbang si ayu, laman kanya ggubuk ayu.

⁷ Am fag ngay taw at mauri, ubuni wan ay fagmauriun, ay ay ngay ugali at yud matuyan ay fabalii wan ay ngay amatanganan. Ay afolii wan sas Yawi tam Dius, aroro kanya kafanyu tua ayu ay gfalyam ay ngay asalanan.

⁸ Yawi nalong te, “Ku amatanganan gtungud tua ay amatanganan ay ku balyawvtan gtungud tua ay balyawvtan.

⁹ Ay nu seyayu banwa ay daga at wabilug, katanya yangay at kayayuan ku amatanganan ay ku balyawvtan siginan ay amatanganan ay ay balyawvtan.

¹⁰ Ay arak ay at marios fag mamam tagsiginans kiwang ya kafoli sas linyabu yakmay nafarugme daga, ay nafarabung ngay tanuman ay nafae bvtang, laman fagayu e fakonun.

¹¹ Katanya yangay ku longan, kabavn ban e tungkul tua. Ay ku fagnafadasugun ku longan laman namafasludan ku fakaylatun ay namakamulun ku algan.

¹² Am fag ngay taw Israel, duksuni useganani siginans talun Babilunya, aroro Dius wan tagufud ayu. Ngay buksul ay ngay fungsu kata sik ngay taw tagalubad guseganan. Ay fagayu fun kayu kata wa sik ngay taw tagfantalaptapan.

¹³ Abat ngate dugi dauy tagtugbung sanya fag daga, altimu tua. Ay abat ngate tanulung, sik dingin tua. Ay at ngay kinfasludan takatanya gfae fagusegananun tua ban angku. Ay kanya ban tagfalag te, mabalyanan au kabavn.”