Isayas 54 - Fanawbuid tagsibaliwas Fakayabian

Erusalem at Fagmanabayanun ban

¹ Yawi nalong te, “Erusalem, o takata sik mangena tagaranas, alubadi. Alubadi ay uroi useganani, o at yud batang gidapan gfasalug. Aroro am mangama ban dewa naubun emu, umke sisian ban o ayu yap tua sik mangena ke mangama at sisian.

² Fabiai yap am bale ramit, ay famuti at ngay famalanib, ay faogati at ngay fansalod ay at ngay fagtabingan.

³ Aroro umbia ban am fagbanwanan ay umdugdug ban at fatuan, ay am ngay taw ban nangagbilug tibak talun ay gbanwan ban sanya.

⁴ Lag o kalimu aroro wo gafaplan. Ay wo gamatang ya am fakaplaun gina o sik fagbubayun at mabaguina.

⁵ Ay at nawat emu kata wa nu am mangama. Au, Yawi at Mabalyanan sas fagayu. Au wan Israel at Dius at yud e Malong, am Tagfalangfe. Ku ngayan te, Fagdaul daga at Dius.

⁶ Erusalem, kata o sik baguina at bagu kadadwa, gwayway o ay kabalu aroro am mangama naubun emu. Ay katsi, au, Fun Dius, guro au emu te, ‘Gewan, magamut tua ta.’

⁷ Sik kadugayan, naubun kwa emu, dewa katanya, gdog kyay nangalaga emu aroro maksvn nu kesug au emu.

⁸ Nu katanya, sik buknga sirut naubun au emu aroro ankuri au emu. Ay dewa katanya, anfanyu ktua emu, aroro nu mafangesug au, di e fakatabuan. Au, Yawi, taglong tuy.

⁹ Nu sa angku, katsi kata ebi gina au gfatuyanan sas Nui te, kwa ban gdog ya gfae lino sas fagdaul daga. Ay kdi ban kadotama ya ay namaurianan ayu.

¹⁰ Ngay buksul ban ay ngay fungsu dewa anbaras wan, nu kesug kban emu di kabali, ay di ban e fakatabuan ku fatuyanan sa emu te, gfae fagmanabayanun kban emu. Au wan Yawi taglong tuy.

¹¹ Erusalem, kata fulug nu nadalan emu. Ay gina o gidapan maksvn, we nafasun ya ay e nafabitsug emu. Dewa katanya, gdog kyay namawat emu sat mogat fag fagfatungkudan turuk at mawatan siginan at mameloan fag ngay gang, ay namae dingding kban emu siginan at mafanud fag ngay gang gmedmeloun.

¹² Ay ku fangawat ban am fagulitan sim alad siginan at maraska fag ngay gang, ay ku fangawat ban am ngay sakbawan ay am ngay alad, at mafanud fag ngay gang tagsadsamanan.

¹³ Namoyung kban sa am ngay taw laman gbanwan tua manabayan.

¹⁴ Ay umkaksvn tua ban o aroro am ngay taw ban at ugali matuyan tua. Ay am ngay fawayan ban lumagyu emu, nu katanya di ban am e fakalimuun ya, ay kanya ban fagayu wa manangakbang ya sa emu laman namalimu.

¹⁵ Ay nu e nanamawayan ban emu, kanya bunwa ku nasugu. Ay nusnga sinu ban at nanamawayan ayu gababawan way.

¹⁶ Dungugani! Au wan at nawat ngay tagsaful kawat sanbung fag ngay fagagbilugun. Kanya gfae igang afuy ay kawat ngay famawayan. Au yangay at nawat ngay tagfawayan tagagbilug kafag ngay famawayan laman at famabul.

¹⁷ We mababo emu nusnga setaw fag famawayan, ay mabalus tuo nusnga sinu tagfalingun emu. Kanya wan ku famonun sa ku ngay fagsuguan, ay namababo kban anya fagayu. Au, Yawi, taglong tuy.”