Isayas 53 - Fanawbuid tagsibaliwas Fakayabian

¹ Sinu at nafanud em foyungan? Ay dada Yawi at fagfasurean at fagmabalyananun?

² Yawi at fagsuguan tagfaning anya kaksvn tua kata sik tanum at bagu gtugbung ay taglalid tua dewa sat matat fag daga. Kanya wa masine ya ay we famaylatan ya laman kakbang tam anya.

³ Ngay taw nafalingun ay naiyan anya. Ay andasug sa anya at masait ay at maidap. Natalyuyan tam anya ay nafalingun, ay wa tam nasuyu ya.

⁴ At matuyan, kanya nagwanta at masait ay at mabalu tam fagnandalanun ma. Nu glong tam e asalanan Dius at fagnafauriananun anya.

⁵ At matuyan, siginan tam fakamaboun kanya anke fakarukan, ay kanya nafalangan aroro sa tam fagmauriun. At nadalan wan fag fagidapun at nafae fagmasineun antam, ay siginan at faginke fakarukan anfia tua tam.

⁶ Ankata tam sik tupa at malyaman. Ay tam fagfaningun tam sadili way fakaylatun. Dewa katanya, Yawi nafafasanan wan sat fagsuguan tam fagnandalanun ma fag ngay fagidapun.

⁷ Kanya naidapan ay nafalangan, ay dewa katanya wa naringang. Ay kata sik fagfilasun fag tupa at nabuba sas fagfilasan ay kata yangay sik tupa tagaufoun, dewa katanya di e nalong.

⁸ E nagamat anya ay nafaurianan ay nafabul. Ay nusdi sadi wa nafamafanud, kanya anbul yud e kasugfunanan, ay nagwantan nadalan tam fagnandalanun ma fag faurianan.

⁹ Ay kanya dewa yud e nafakamulun at mauri ay deyud nafandaya, e nanamoli anya sas fagfolian magamut ngay taw mauri ay at maramraman fag ngay taw.

¹⁰ Dewa katanya, Yawi nafalganan anya sas fagidapun ay faurianan. Ay Yawi dewa nafili anya sik fanggalangun laman famalyam ngay taw at asalanan, kanya ban lumag yay fia at fadogan fag ngay kasugfunanan ay mul ban yud e fakatabuan fag leleg, ay siginan ban anya umfasludan Yawi at algan.

¹¹ Ay nu nlangfe ban nu gidapan, kanya ban lumag at naidapanan at rawvg ay guseganan ban. Yawi nalong te, “Ku fagsuguan matuyan, ay siginan at fagsafulun ngayu ban at kumtap kata nu yud e asalanan, aroro kanya ban nanginkidapan laman sa sangay taw at asalanan.

¹² Siginan takatanya, namauseganan au anya kata at mabalyanan fag ngay taw, ay kanya namae fagusegananun yangay sat maseganama fag ngay taw, aroro nafon tua at leleg anggan sas fakabulun, ay ngay taw natap anya te, sik tagasalanan, kanya nainkidapan aroro sa sangay taw at asalanan, ay naet tua sas Dius te, falyami kafag ngay taw at ngay asalanan.”