Isayas 52 - Fanawbuid tagsibaliwas Fakayabian

Dius ban Gfalangfe Furuan Erusalem

¹ Furuan Siun, afuloi, alunggungi ay maksvni tua! Ay fasurei am fagmabalyananun, o at yud e malong fag furuan Erusalem, aroro at yud taw Israel, am natuyan te, masuya, wa ban gdog ya gsakbo sa emu.

² Erusalem, malindug o ay fagfagi am dafugun sim bilug, ay dogi funani, ay alfasi siginan am fagmasiukanun.

³ Katatuy Yawi tam Fun at longan: “Nafagsuguanan am yud e famayad, nu katanya, namalangfe kban ayu yud e famayad.

⁴ Ebi ataw, nalo am sas talun Igiptu laman namanwan, ay abandi, talun Asirya nafagsuguan ayu.

⁵ Ay katsi, nataw at kinfasludan sa ayu? Ngay taw Babilunya nafagsuguan yangay ayu yud e famayad, ay at ngay tagfangguna guro guseganan, ay gfalingun gugat angku.

⁶ Dewa katanya, sik menit ban tumoglag am ku ngayan, aroro au wan tagaringang gugat sa ayu. Matuyan, au wan.”

⁷ Damai, masine at nanfamoyung fag ngay taw at darafa nu glao sa sangaba buksul, gbuba at masine fag barita tagfae fagmanabayanun ay fagmasineun sas furuan Erusalem, aroro Dius ban gfalangfe kanya fag furuan. Kanya nalong sas furuan Erusalem te, “Ay Dius gfagtainan wan!”

⁸ Ngay tagulit emu guro guseganan, aroro lumag ban Yawi nu kafoli sas Erusalem.

⁹ Am at kinrasras fag ngay afud Erusalem, asfuani alubadi useganani, aroro Yawi namasun wan at ngay taw ay namalangfe wan Erusalem.

¹⁰ Yawi namalag at fagmabalyananun yud e malong sas fagayu talun at ngay taw, ay fagdaul daga lumag Dius nu gfalangfe.

¹¹ Duksuni wan siginans Babilunya ay lag am gted nusnge wain at masuya. Duksuni wan fagayu am tagbuba ngay fagagbilugun tagsis Yawi at bale, ay masinei tua.

¹² Dewa katanya, lag gabanganan nu glo am, kata nu e faglagyuun am, aroro au wan Israel at Dius Yawi tagsi ay fagunan ay si ay faguyanan.

Dius at Fagsuguan at Fagidapun

¹³ Yawi nalong te, “Ku fagsuguan ban gbabo. Kanya ban umsik takadungug ay mauseganan.

¹⁴ Ngayu ban takadulo anya, aroro at kamatan gabalungan wan ay wa kata ya taw at kamatan.

¹⁵ Anggan ban tibak talun at ngay taw umdulo anya. Ay at ngay fun ban wa maringang ya, aroro kanya ban fagayu lumag nusnge wain at masuksukan, ay sumaful ban nusnge wain at yud batang nadungug.”