Isayas 51 - Fanawbuid tagsibaliwas Fakayabian

Foyungan te, Afanudi sas Yawi

^1-2 Yawi nalong te, “Dungugani angku, fagayu am takakbang sa angku laman umlangfe am. Amatangi ay mangaguyang Abrayam ay Sara. Dadwa kata sik fungsu, ay am at naggatvngan. Amatangi ay mangaguyang Abrayam, ay anggan Sara at nafasalug ayu. Ebi gina au nafili Abrayam, kanya sesadi yay, ay dewa katanya nafayu au at ngay kasugfunanan.

³ Nangafanyu au Erusalem at kinrasras wan. Ay tagsanya fag talun at yud e gtugbung namakata au ku tanuman Eden. Ginanya ban sis furuan Erusalem maksvn nu gfanagsag, ay sanya ban e guseganan ay galubad.

⁴ Ku ngay taw, dungugani angku. Ku talun at ngay taw, dungugani angku. Namon au ayu ku ngay suguan, ay kanya umkata sik salung sas fagayu talun at taw.

⁵ Munakbang wan nu gfon au ayu fagmasineun. Wa ban glugo ya nu namalangfe au ayu. Namagtainan kban sas fagayu talun at taw. Ay anggan ban tagsi tangayayu fag ngay furuan gsarig sa angku, ay gfanya ku fagmabalyananun nu kadasug.

⁶ Tangdai sas banwa, ay damai sas fagdaul daga. Banwa umkalyam kata sik anus, ay fagdaul daga umrasras kata sik lanbung, ay sanya fag ngay taw umbul masakit kata ngay lango. Ay dewa katanya ku fagnamonun fag fakalangfean gtaglayun tua ban gugat, ay ku fagmasineun ban di e fakatabuan kabavn.

⁷ Dungugani angku, am tagsaful at matuyan ay tagfaning ku faugali! Lag am kalimu ngay taw tagfapla ay tagfalingun ayu.

⁸ Aroro takatanya fag ngay taw kata way sik lanbung, ulud at naurit. Ay dewa katanya ku fagmasineun gtaglayun tua ban kabavn, ay namalangfe au fagayu kasugfunanan.”

⁹ Yawi, gubuki wan emi. Fasurei am fagmabalyananun laman gfalangfe o emi. Gubuki emi kata ebi am nafakamulun sa emi. O nunda bunwa o at naramyuk tagbia fag mangilafang at ngayan te, Rakab?

¹⁰ O nunda bunwa o at nafatat dagat ay at nafae dalan sis wabilug, laman am nafalangfe fag ngay taw umdife?

¹¹ Am nafalangfe fag ngay taw umfoli sas Siun, ay galubadan guseganan yud e fakatabuan. Umkalyam wan at fakabaluun, ay guseganan tua ban maksvn.

¹² Yawi nabalus te, “Au wan tagfasun ayu. Nu katanya, wain ay fakalimuun ngay taw takabul way kata ayu? Kanya fagayu kata sik makmak tagakalangkeun wan.

¹³ O wam gamatang ya angku? Au oma at nawat ayu. Au wan at narafad banwa ay au yangay at nawat fagfatungkudan fagdaul daga. Wain ay fakalimuun yay gugat ngay taw takadotama ay tagfalingun ayu? Ay kanya ban fagayu wa kadotama ya ayu, laman di e gfaurianan ya ayu.

¹⁴ Wa glugo ya at ngay maubungan kalfas wan. Ay wa ban umbul sit fakaubungan, ay di ban kamin at fakonun.

¹⁵ Aroro au wan ay Dius Yawi tagfalugwak ay tagfafawas dagat. Ku ngayan Yawi at Mabalyanan.

¹⁶ Nafoyung kwan sa ayu ku longan, ay siginan ku fagmabalyananun nadiri au ayu. Au at nafatungkud banwa ay anggan fagdaul daga at fagmatungkudan, ay au yangay at nalong sas furuan Erusalem at ngay taw te, ‘Am wan ku ngay taw.’ ”

¹⁷ Furuan Erusalem, afuloi wan! Yawi at dotama kata sik fanlangu am nafamin, ay granranugan o.

¹⁸ Ay nusdi sadi am sisian we gtabanan ya emu, ay wa yangay e ggubuk ya emu.

¹⁹ Duak faurianan at kindasug sa emu: am ngay fawayan narasras wan emu, ay am ngay taw nadalan at maksvn fag fanlunus. Nu katanya, we sawad ya am ngay taw laman tagfasun emu.

²⁰ Kanya fagayu kalufuy ay mataygilid sa sangay sagbatan, kata sik ngay arasyo at kinsiuk sa sik sangdaw. Yawi at maksvn fag dotama andasug sa anya fagayu. Am Dius nasalag anya fagayu.

²¹ Nu katanya, dungugani am tagidapan, ay takaranug dewa am yud galangu.

²² Katatuy ay Fun Yawi at longan: “Dungugani! Nafalyam kwan nu kadotama au ayu, takata sik fanlangu at nafaranug ayu. Kwa ban gdog ya gfainum ayu.

²³ Namon kban sa sangay tagfaidapan ayu, at nasugu ayu te, ‘Malubi laman nansiad ami ayu.’ Ay kanya nasiad ay ngay guyuy kata nu glao sa sangaba dalan.”