Isayas 5 - Fanawbuid tagsibaliwas Fakayabian

Sik Alubad sabaliwas Tanuman Wat Ubas

¹ Nangalubad au sik alubad laman sa ku fakesugun, sabaliwa at tanuman wat ubas: Ku fakesugun e tanuman wat ubas si sik buksul sit masine fag daga.

² Kanya naali ay nabul wan fagayu gang, ay natanum sanya at mafilian fag ngay fananum ubas. Ay nawat sanya sik bale ngabat fagnangulitan, ay nafagarvy yangay gang laman at fagturisan at gutluan. Sanya ginan, kanya gfanya at rawvg at matamis, ay aroro mangaro, at rawvg mayat way.

³ Nu katanya, tagagbilug tanuman wat ubas nalong te, “Ngay taw Erusalem ay Uda, insafuli. Tain ay amatanganan sabaliwa angku ay sa ku tanuman wat ubas?

⁴ Nataw ya ku fagnamakamulunun ku nayud nafakamulun? Aroro ku fagsegun ku tanuman at rawvg matamis tua, ay aroro mangaro mayat way. Wain fakatanyaun?

⁵ Namoyung au ayu ku fagnamakamulunun ban sa ku tanuman wat ubas: Nanrasras kban at matunglu fag ngay tanum, ay nanrufa kban at alad, laman ngay mela nangon ay nansiad.

⁶ Kwa ban gulit ya ku tanuman wat ubas. Ay kwa ban gfagud ya at ngay sanga ay ggulad ya at makmak tagfaut. Ay nanlong kban sa sangay linyabu te, ‘Lag karak ya.’ Nu katanya, umkayu ban at madugi fag makmak, ay umkata ban sik araw.”

⁷ Yawi at Mabalyanan at tanuman wat ubas, ngay taw Israel wan. Ay at fagusegananun fag ngay wat ubas at bagu gtugbung, ngay taw Uda wan. Yawi at fagsegun at tanuman namasure nangus fagmatuyanun, dewa katanya, kanya fagayu nafamabul way. Ay kanya gseg yangay te, at tanuman namasure at fagyudun e malong, dewa katanya, at fakamulun, kamalingun way.

Faurianan ban Kadasug

⁸ Ida, afanyuan am! Am takaylat gfayu ay bale ay takaylat gfabia ay daga, yakmay am naiyan fagayu taw tagbanwan sanya, ay am way lang tagbanwan sanya fag talun.

⁹ Yawi at Mabalyanan nalong angku te, “Gtuyan au te, wa ban e namanwan ya sanya fag ngay bale ayu daul at masine.

¹⁰ Ay at fagtanuman wat ubas, dewa gbia, alay way at gutluan fanlangu. Ay at natanum fare, dewa safuluk tasan, at gutluan sadi wayk tasan.”

¹¹ Ida, afanyuan am! Am takafulo masurip laman nanginum fanlangu, ay am tagfasigad ginum siginans fafun sitsigons buknga yabi laman galangu am.

¹² Gina am maful si ay fagmafulun, ay amatanganan sa way baliwa ay ngay fagfawangun ke ngay bakyang, ay ngay fagfadkalinganun, ay tulali, ay anggan ay ngay fanlangu. Dewa katanya, wam gamatangan ya sabaliwa Yawi at nafakamulun laman sa ayu.

¹³ Nu katanya, ku ngay taw ban gatabanan, aroro kanya fagayu wa gamatangan ya ku ngay nafakamulun laman sa anya fagayu. Kabul ban am sas fanlunus ay sas fandanum gasfuan ay ngay tagfangguna.

¹⁴ Ay fagfolian at sakbawan umbia ay umluang kata takalunus fag mela nu gfabia at bibig, laman sumakbo sanya takadungug fag ngay taw Erusalem ay at yud e fanambagun ay anggan ngay taw tagbarisanan kamanagsag.

¹⁵ Nu katanya, Dius ban gfababa fagayu taw, kaugat wan takamatungudun.

¹⁶ Dewa katanya, e sumeg Yawi at Mabalyanan aroro kanya matuyan nu gwabilug, ay namalag te, kanya at yud e malong fag Dius aroro siginan at ngay fakamulun at matuyan.

¹⁷ Ngay furuan ban at marasrasan, at maramraman fag ngay taw at fagbanwanan ebi, umsik masine ban fag fagnamafangonan ngay tupa.

¹⁸ Ida! Afanyuan am, aroro kamuag am laman gfataglayun nu gasalanan am.

¹⁹ Ay nalong yayam te, “Taw Israel at Dius at yud e Malong, fasakiti wan nu gfadasug o am algan, laman lumag ami. Fafasludani wan ebi am nalong am fagnamakamulunun, laman sumaful ami.”

²⁰ Ida, afanyuan am! Am taglong te, masine way at mauri, ay mauri way at masine, ay taglong te, at madulum mayamag, ay at mayamag madulum, ay taglong te, at mayat matamis, ay at matamis, mayat way.

²¹ Ida, afanyuan am! Am takamanagsag te, “E fagsafulun au!”

²² Ida, afanyuan am! Am tagananad ginum at malangu, ay tagsaful ngay famasuglat sas fanlangu.

²³ Wam naubung at ke asalanan fag ngay taw aroro nabul am famayad siginan anya, ay wam gfakamulun at matuyan sat yud e asalanan fag ngay taw.

²⁴ Nu katanya, umkata ban am sik ngay nagutan ay sik makmak at kinyango ay at natubung masakit. Ay kata yangay am sik tanum at kindan at lalid ay at ngay barugwak at kinlangke ay takalayug kata lukbu, aroro natalyuyan am Yawi at Mabalyanan at longan, ngay taw Israel at Dius at yud e Malong, ay nafayud am e masuad at ngay foyungan.

²⁵ Nu katanya, Yawi maksvn nu kadotama at ngay taw, ay kanya mafalganan wan namaurianan anya fagayu. Ngay buksul ban guigan, ay ngay taw ban at mabulan rumapyagan sa sangaba dalan kata ngay nakaurian. Dewa katanya, Yawi at dotama ya nalyam, ay mafalganan yay namaurianan anya fagayu.

²⁶ Ay kanya gyafe at daluap sa sangay taw sa tangayayu ngay talun, ay giful laman ngay taw tagbanwan sa tangayayu fag fatuan daga. Ay masakit kadasug sa Erusalem laman namawayan at ngay taw.

²⁷ Ay kafag ngay taw tagsiginan tangayayu fag talun wa kalufuy ay wa kalub, ay wa gfiangalay ay wa gtiug. Ay at famutus fagwan ay at fansalod lapak di kaluas.

²⁸ At ngay fiso maglat, ay at ngay godun mafalganan wan. Ay fagayu at ngay kabayu at u katugas sik gang, ay at ngay faguyudan at ke balingkitan masakit kata sik tagbaribungan fag tagmara.

²⁹ Kanya fagayu nu guro gina gfawayan malimu kata sik liun nu gsubang. Ay gtaban at ngay nagamat, ay we namalfas ya.

³⁰ Ay ginanya fag menit, gina kanya fagayu gfawayan ngay taw Israel, guro kaksvn dagat nu gfawas. Ngay taw nu nadama sa sangay taw Israel at talun, at lagan fagmadulumun way ay fagidapun, aroro sik linyabu daul gfarum at mayamag.