Isayas 49 - Fanawbuid tagsibaliwas Fakayabian

Dius at Fagsuguan

¹ Dungugani angku, am tagbanwan sa tangayayu fag ngay talun sis wabilug dagat: Gina au yud ansalug, Yawi nafili angku laman at fagsuguan.

² Ku longan kata sik fiso at maglat. Ay Yawi nalaga angku siginan at fagmabalyananun. Kata au sik banyas at mafasinean tagsiwas godun.

³ Kanya nalong sa angku te, “Israel, o wan ku fagsuguan. Ay aroro sa emu, ngay taw ban namauseganan angku.”

⁴ Ay nalong au te, “Ku ngay nagdalanan fag fagidapun we fanambagun; nafangulan kway ku fagmabitsugun.” Yawi nafalganan wan at fagnamonun sa angku tagalvngvdan ku nafakamulun.

⁵ Yawi nafili angku laman at fagsuguan, laman namafoli ay namaful ngay taw Israel sa anya. Yawi ku Dius nafausegan ay nafon angku fagmabitsugun.

⁶ Kanya nalong te, “Ku fagsuguan, namafoli o ku nafasawad fag ngay taw Israel, ay saman wa kanya, ngayu yay ban ku fagnamakamulunun sa emu. Namakata kban emu sik salung sas fagayu talun at taw laman fagayu taw sas fagdaul daga umlangfe.”

⁷ Yawi wan Israel at Tagfalangfe fag Dius at yud e Malong. Ngay talun at ngay taw ay ngay fun at ngay fagsuguan nafalingun ay nafauri Yawi at fagsuguan. Ay Yawi glong sat fagsuguan te, “Ngay fun ban lumag emu, ay nangalindug gsuyu emu. Ngay fun ban nanmalub laman gseg emu. Umfasludan ban takatanya fagayu aroro au wan, Yawi at matuyan, ay Israel at Dius at yud e Malong, at nafili emu.”

Gdog yay ban Nangawat Erusalem

⁸ Yawi glong te, “Si ban ku nafalganan fag buknga, namalangfe au ay namalus ay nanggubuk emu. Nandiri kban emu, ay aroro sa emu nangawat au sik nasadian sa sangay taw. Gdog yay ban o namasine Israel at ngay daga at kinrasras, ay namagbilug ban o sa ku ngay taw.

⁹ Foyungi ban sat ngay natabanan fag ngay taw Israel, ay sat kinkubung sasad madulum te, ‘Duksuni wan! Nalfas wam!’ Ay kanya ban kata sik ngay tupa tagfangonan sa sangaba dalan, ay sa sangay buksul ebi at yud e gtugbung.

¹⁰ Kanya ban fagayu di kalunus ay di kadanum. Ay kanya ban fagayu di ban karoy siginan at magong fag talun ay menit at sugba. Nantaban kban anya fagayu sa sangay bulbug, aroro kafanyu au.

¹¹ Namae dalan kban sa ku ngay buksul, ay namabat au ku ngay dalan daul.

¹² Ku ngay taw ban tiba kadasug siginan tangayayu, ay tiba ban siginans wala fag alvngvdan ay siginans fakayabian, ay siginans Sinim.”

¹³ Banwa, alubadi useganani. Fagdaul daga, useganani! Ngay buksul, alubadi. Aroro Yawi kesug ay gfasun ngay taw tagidapan.

¹⁴ Ngay taw Erusalem nalong te, “Yawi nafabayan ay wa gamatang ya emi.”

¹⁵ Dewa katanya, Yawi nabalus te, “O nunda sik mina kalyam at fagfasusuun fag sisian? O nunda wa kesug at ngenge? Sik mina nu ddi kalyam at sisian, kaugat wan nu yud au kalyam ayu!

¹⁶ Furuan Erusalem, kabavn kwa kalyam emu. Nariruk kwan am ngayan si ku daluap. Gamatang kway gugat am ngay alad.

¹⁷ Munakbang wan nu kafoli at nangawat emu, ay nangaiyan wan at narasras emu.

¹⁸ Damai sa am ligung; am ngay taw kafoli wan. Gfatuyanan au te, kafanud nu gleleg au, gfanagsag ban o anya fagayu kata sik mangena at nangadadwa at ke dalag.

¹⁹ Anrasras wo ay nafasik mabaluanan, dewa katanya, katsi tagbanwan si emu wa sak ya. Ay at narasras emu umyayu wan.

²⁰ Am ngay sisian at kinsalug gina o kabalu lumong ban te, ‘Yami sak ste fag furuan. Fabiai yap.’

²¹ Ay gamatangan ban o te, ‘Sinu at nafasalug anya fagayu laman ku ngay sisian? Ay ku ngay taw tangayu nbul wan, ay anbalu au. Ay tiba natabanan sa tibak talun, ay au way lang at kinsawad. Sinu at nafagurang kafag ngay sisian? Ay daginan kanya fagayu?’ ”

²² Yawi tam Fun glong te, “Gyafe au sa sangay talun laman gfafoli am ngay taw sa emu kata at fagulitun fag ngay sisian.

²³ Ngay fun ban gasfuan at ngay mangena namaning emu. Kanya ban nangulit am ngay sisian, ay gtudan ban gseg emu, ay nangafagtainanan emu. Nu katanya, sumaful o te, au wan Yawi. Fagayu tagafanud sa angku di ban umyud e fagsegun.”

²⁴ O nunda ro manangago yay o ngay ramraman ngay tagfawayan at madot at nabul ebi? O ay manamalangfe yay o am ngay taw at natabanan?

²⁵ Dewa katanya, Yawi nabalus te, “Kin, mafalangfe tuo am ngay fawayan at ngay nataban, ay manamul yay o at nabul fag ngay ramraman. Namawayan au at nafawayan emu ay namalangfe au am ngay taw.

²⁶ Namaon kban sa sangay taw at nafalingun emu at sadili bilug, ay kanya ban fagayu umkata sik ngay tagalangu aroro nainum at sadili taguk. Nu katanya, fagayu ban taw sumaful te, au wan Yawi, at nafalangfe ay at nafalfas emu, Akub at Dius at mabalyanan.”