Isayas 47 - Fanawbuid tagsibaliwas Fakayabian

Babilunya nu Karasras

¹ Yawi nalong te, “Babilunya, umlunggung ban o sasad lukbu, ay wa ban o e fagfagtainanan ya. Ebi kata oma o sik maylat fag baguina, ay katsi wo katanya ya.

² Katsi sik fagsuguan way o lang; buli sik lusung ay alu ay lubuki fare. Buli wan sim alfuyu fag ramit, ay kaduge o gdife liskung, fabati am lanbung laman umsure am balangbang.

³ Ay fagayu taw lumag nu malulasan o ay umkapla o. Namaurianan au emu ay kwa ban kafanyu ya emu.”

⁴ Tam Tagfalangfe, Yawi at Mabalyanan, Israel at Dius at yud e Malong.

⁵ Yawi nalong te, “Babilunya, nanmalunggung o maragangan sasad dulum. Wa ban e gfangayan ya emu te, ngay fagfagtainanan o at fun fag mangena.

⁶ Andotama au ku ngay taw ay naiyan au anya. Nu katanya, nafababawan au sa emu ay wo nfanyu ya. Ay nafaidapan o anggan at mafagtainan.

⁷ Ebi glong o te, ‘Sik mangena au fag fun ay kdi e fakatabuan.’ Ay wo namatangan am ngay nafakamulun takatanya, ay wo namatangan ya te, setain ban takafasludan sa emu.

⁸ Dungugani, sik tagfangaylat o sam sadili fakaylatun, ay nu gamatangan o, we kadasug sa emu at mauri. Ay nalong yay o sam sadili te, we gfasud angku. Ay nu gamatangan o, wo umsik fagbubayun, ay di mbul am ngay sisian.

⁹ Dewa katanya, kaduge way sik menit umsik fagbubayun o ay am ngay sisian umbul. Umfasludan takatanya, dewa o saful gfangabalo ay gfangufit.

¹⁰ Ay gafanud o te, we faurianan takadasug sa emu dewa o gfakamulun at mauri, aroro gamatangan o te, we glag emu. Am ngay fagsafulun ay am fagmamatanganun nafalyam emu, ay kanya wan am fagnalongun te, ‘We gfasud angku.’

¹¹ Nu katanya, faurianan umdasug sa emu, ay wo saful te, setain nu gagbilug o am fangabalo laman masaruy o faurianan. Ay umdasug sa emu sik faurianan ay wo mabayad laman wa kataglayun. Sik faurianan masakit nu kadasug sa emu gina o yud mafalganan.

¹² Agvd, fataglayuni nu gfangabalo o, ay nu gfangufit o, kata am fakamulun gugat siginan ngay nu masisian o. Gbabo tua ban o manga, ay manamalimu am ngay fawayan.

¹³ Kalufuy wo gamatangan tibak taw at ngay fangatulun sa emu. Fae foyungi sa am iba at ke fagsafulun sabaliwa ngay galeme, ay tagfoyung kayu magdanun sabaliwa at kumfasludan. O nunda kanya namalangfe emu siginan takadasug ban?

¹⁴ At matuyan, kanya kata way sik ngay nagbiluganan at masakit kairug, ay wa mafalangfe at sadili siginan sad afuy. Kafag afuy di kata at maugali fag afuy nu bunway amasugba yap tua.

¹⁵ Kafag ngay taw am fagnangetan fangatulun siginan ngay nu masisian o, katanya way gugat at fagmafakamulunun. Kanya fagayu gtaglayun glao sat dalan, ay we mafalangfe ya emu.