Isayas 45 - Fanawbuid tagsibaliwas Fakayabian

Dius Nafili Sirus

¹ Katatuy Yawi at longan sas Sirus, sat nafili ay sat nafae fagmabalyananun fag fun. “Namagbilug au sa emu ngay talun at ngay taw, ay namababawan au sa emu ngay fun, ay nanggubuk au emu nanluang ngay furuan at ngay sakbawan ay we madingding.

² Gguna kban emu, ay namadatag au ngay buksul, ay nanrasras au ngay sakbawan at mawatan tansu, anggan famalabag fag ngay sanbung.

³ Ay gfon kban emu nusnge wain fag ngay ramraman at mafasuksukan, laman sumaful o te, au Yawi, Israel at Dius, at nauro emu.

⁴ Nafili au emu laman nanggubuk o ku fagsuguan ay ku nafili fag ngay taw Israel. Nafauseganan au emu gina o yud natoglag angku.

⁵ Au wan Yawi, we tiba yak dius sas day angku. Nafabitsug au emu gina o yud natoglag angku,

⁶ laman fagayu taw sas fagdaul daga sumaful te, sas day angku, we tiba yak dius. Au wan Yawi, ay we tiba ya.

⁷ Au wan at nafae yamag ay at nafae dulum. Ay au yangay tagfadasug fagmasineun ay fagmauriun. Au Yawi at nawat takatanya fagayu.

⁸ Namae fagmatuyanun au fagayu taw, kata banwa ay linyabu nu gfae arak. Nu katanya, fakalangfean ay fagmatuyanun umrapyag sas fagdaul daga kata sik ngay tanum nu gtugbung. Au Yawi at nafakamulun takatanya.

⁹ Afanyuan sik taw tagfabadbaboan at nawat anya fag Dius. Kafag taw kata way sik tikung. O sik lifak mafalong sa takawat anya te, ‘Wain fakatanyaun am nawat?’ O ay nunda mafalong sabaliwa takawat anya te, ‘Kanya wa saful kawat’?

¹⁰ Sik sisian wa malong sat mina te, ‘Ida, nataw ro am fagnafasalugun angku?’ ”

¹¹ Yawi, Israel at Dius at yud e Malong, at nawat anya fagayu glong te, “O gfayud am ku ngay nawat? O gsugu yayam angku te, ‘Fakatatuyi tua nu kawat o’?

¹² Au wan at nawat fagdaul daga ay anggan ngay taw tagbanwan sanya. Ku ngay daluap at narafad banwa, ay au yangay tagsugu menit, ay magdanun, ay galeme te, ‘Asurei.’

¹³ Au at nafili Sirus laman namafasludan ku ngay algan at masine. Ay namafasludan au nusnga setaw at balyawvtan. Ay kanya ban gdog yay nangawat ku furuan, ay namalfas ban ku ngay taw at natabanan sa tibak talun. Kanya ban namakamulun takatanya dewa yud e famayad. Au Yawi at Mabalyanan at nalong takatanya.”

¹⁴ Yawi nalong sa sangay taw Israel te, “Namagtainan ban am ngay taw Igiptu, ay ngay taw Etiupya, ay ngay taw Saba fag gaban taw tangabat. Kanya ban fagayu umdasug sa emu gbuba at ngay ramraman ay at ngay gutluan, ay gtaban ban am anya fagayu, ay kanya ban fagayu nanmalub sa ay daga salubangan ay gfainfanyuan sa ayu te, ‘Anud, Dius gufud ayu, ay sas day anya we tibak Dius!’ ”

¹⁵ Dius, o wan Israel at Tagfalangfe, at matuyan wo kalag.

¹⁶ Ngay takawat fagsegan umke fakaplaun.

¹⁷ Dewa katanya, Yawi gfalangfe tua ngay taw Israel, ay nu gfalangfe we fakatabuan. Ay kabavn ban di e fakaplaun.

¹⁸ Yawi, o at nawat banwa ay fagdaul daga. O wan Dius. Wo nawat fagdaul daga way ro e gleleg, nawat o kanya laman e gbanwan. Ay nalong o te, “Au wan Yawi, sas day angku we tibak dius.

¹⁹ Ku ngay nalong di e masuksuk. Kwa ro nalong sas Akub at ngay kasugfunanan te, ‘Rvbvyi angku,’ nu dway ro e fagsegun te, lumag ro angku. Au wan Yawi, ku ngay nalong matuyan. Glong au fagayu at masine.”

²⁰ Yawi glong yay te, “Fagayu am at nalagyu siginan tibak talun, afuli ay akbangi sa angku. Ngay taw tagbuba at ngay fagsegan fag ngay kayu we fagsafulun. Kanya gdarangin sat ngay fagsegan at yud mafalangfe anya.

²¹ Ngay fagsegan, kamatoani ay longi ay fagkamatoanun. Sinu at nafoyung ebi te, katanya ban at kumfasludan? O nunda bunwa au? Au Yawi, we tibak dius sas day angku, at Matuyan ay Tagfalangfe fag Dius.

²² Fagayu am sas fagdaul daga, akbangi sa angku laman umlangfe am. Aroro au wan Dius ay we tiba ya.

²³ Gtuyan au te, fagayu ku ngay nalong di ban ginbalian. Fagayu taw nantudan laman gseg angku, ay namatuyanan te, gfaning ban angku.

²⁴ Ay kanya ban lumong te, ‘Yawi way tagfon fagmatuyanun ay fagmabitsugun sa sangay taw.’ ” Ay fagayu ban takauri Yawi umkakbang sa anya ay umkapla.

²⁵ Yawi gtap Israel at ngay kasugfunanan te, yud e asalanan, ay kanya ban fagayu sumeg anya.