Isayas 43 - Fanawbuid tagsibaliwas Fakayabian

Dius Nafatuyanan nu Namalangfe Taw Israel

¹ Israel, katatuy Yawi, at nawat emu, at fagyalongun sa emu: “Dangay o kalimu aroro namalangfe au emu. Nauro au am ngayan, ay au wan am tagagbilug.

² Dewa o glao sasad mamam, au wan am fadgaloan. Ay dewa o gdife sa sangay liskung, di o kalimus. Ay dewa o gdalan sasad afuy, wo kairug, ay di o kasugba dewa sasad igang.

³ Aroro au Yawi am Dius, Israel at Dius at yud e Malong, ay am Tagfalangfe. Namon au ngay taw Egiptu, Etiupya, ay Seba sa tibak talun at ngay taw, laman famangsi emu.

⁴ Ay namon au tibak talun at ngay taw laman fangungbus emu, laman famaungbus am leleg, aroro o wan at mafanud ay at masine sa angku, ay kesug au emu.

⁵ Lag o kalimu aroro au wan am ufud. Namaful kyay ban fagayu am ngay kasugfunanan tagsis fakamenitan ay tagsis fakayabian.

⁶ Glong kban sa sangay talun at ngay taw tagsis dua alvngvdan laman gfabayan wan am ngay kasugfunanan nu kafoli sat sadili talun, dewa ndaginan fag fungfung daga.

⁷ Kanya fag ngay taw ku nafili. Nawat au anya laman gfauseganan angku.”

⁸ Yawi nalong yay te, “Uroi ku ngay taw at yud glag dewa e mata, ay at yud gdungug dewa e talinga.

⁹ Ay uroi ngay taw sa sangay talun. Kafag ngay taw at fagsegan wa mafoyung takafasludan sas fagunan, ay wa batang gfoyung at kinfasludan wan. Fastiei tagfatuyan kafag ngay fagsegan at longan, laman ngay tagdungugan lumong te, anud, matuyan.

¹⁰ Ngay taw Israel, am wan ku tagfatuyan. Nafili au ayu laman ku ngay fagsuguan, laman sumaful am angku ay gafanud tuam sa angku, ay anggan sumaful am te, au wan Yawi. We dius at naguna angku, ay wa ban e dius ya tagguyan angku.

¹¹ Au Yawi, ay sas day angku we tibak tagfalangfe.

¹² Nafatuyan au te, namalangfe kban ayu, ay nafalangfe ktua ayu ay nafoyung takatanya sas fagdaul daga. We tibak dius at nafakamulun sa ayu takatanya. Am wan tagfatuyan te, au wan Dius. Au, Yawi, taglong tuy.

¹³ Siginan ebi au wan Dius. We masaruyan sa ku fagmabalyananun. Ay we mafabali fagayu ku ngay fakamulun.”

Dius Ggubuk at ngay Taw

¹⁴ Ngay taw Israel, Yawi ay tagfalangfe, ay ay Dius at yud e malong glong te, “Namadasug au sas Babilunya sik ngay tagfawayan tagsiginan tibak talun, ay ngay taw Babilunya glagyu gsakay sit fakamatungudunun fag ngay sakayan lino. Namakamulun kban takatanya laman sa ayu.

¹⁵ Au Yawi, ay Dius at yud e malong, at nawat ayu, ngay taw Israel. Au ay Fun.

¹⁶ Au Yawi at nafae dalan sas wabilug dagat.

¹⁷ Nafaful au talun Igiptu at ngay tagfawayan, ay nafalubgub au at ngay faguyudan ay at ngay kabayu, ay wa nlakwi ya. Kanya fagayu kata sik salung at kinrabung.

¹⁸ Ay dewa katanya, lag am gamatangan at kinfasludan ebi,

¹⁹ aroro katsi saman wan ku fakamulun, wa kata ebi, ay kafasludan wan. O nunda wam glag? Nangawat au sik dalan ay sik ngay bulbug sat magong fag talun.

²⁰ Fagayu ban mangilafang gfauseganan angku, gasfuan ngay idu talun ay ngay ebo, aroro namae bulbug kban sat magong fag talun, laman ku nafili fag ngay taw e fanginum tua.

²¹ Nawat au kanya fag ngay taw laman sa angku, ay laman ban kanya fagayu namauseganan angku.

²² Ay dewa katanya, Israel, wo naet sa angku gubuk, ay kauri o angku.

²³ Ay wo nafon sa angku sik fagirugun fag tupa. Ay wo nafauseganan angku, dewa au yud gfaidapan emu ay gfalufuy siginan nu get au sa emu te, foni tua sa angku fanggalangun ay ngay famaebebanglu.

²⁴ Ay wo nabayad sik famaebebanglu laman sa angku, ay yo batang girug fagbaugun at taba laman am fanggalangun. Abat ngate, nafaidapan way o angku ay nafalufuy aroro sa am ngay asalanan.

²⁵ Au at nafalyam am ngay asalanan laman sa angku, ay kwa ban gamatangan ya.

²⁶ Agvd, gamatangan tam at kinlangfe fag ngay menit, ay gkamatoan tam. Fatuyanani te, di o e asalanan.

²⁷ Ebi am ngay mangaguyang anke asalanan sa angku, ay anggan am ngay fun nafamabo angku.

²⁸ Nu katanya, nafae fakaplaun au am ngay tagfon fanggalangun, ay o, Israel, nafabayan au emu gafaurianan ay gafaplan.