Isayas 42 - Fanawbuid tagsibaliwas Fakayabian

Yawi at Fagsuguan

¹ Yawi nalong te, “Ste wan ku fagsuguan. Nafaksvn au at amatanganan, ay nafili au anya ay guseganan au anya. Nafatayuk au ku Falad sa anya, ay namae fagmatuyanun ban sas fagayu talun at taw.

² Wa ban guro ay wa gfabia nu garingang sa sangay dalan.

³ Kanya ban di gfabayan at yud maksvn nu gafanud ay ngay yud e fagsegun. Ay gfae fagmatuyanun fia.

⁴ Kanya ban di kamomuy ay di umyud e fagsegun yakmay ban nafae fagmatuyanun sas fagdaul daga. Anggan ngay taw tagsiginan tangayayu fag ngay talun tagsis wabilug dagat gfanya at ngay foyungan.”

⁵ Yawi tam Dius at nawat banwa ay at narafad kata sik umut. Kanya nawat yangay fagdaul daga ay anggan fagayu tagsanya. Kanya yangay tagfon leleg sa sangay taw tagbanwan sis fagdaul daga.

⁶ Ay kanya nalong sat fagsuguan te, “Au wan Yawi at nafili emu laman namalag o te, au wan at matuyan. Ggubuk au ay gfaksvn emu, ay namasik nasadian au emu sa sangay taw, ay sik salung sas fagayu talun at taw,

⁷ laman at yud glag, glag tua, ay namalfas at ngay maubungan siginans fagmadulumun.

⁸ Au Yawi! Kanya ku ngayan! Kwa kaylat tibak fagsegan nu gbul famauseganan sabaliwa angku.

⁹ Fagayu ku nalong ebi anfasludan wan, ay katsi gfoyung au ayu takafasludan ban.”

Sik Alubad Tagfauseganan Yawi

¹⁰ Alubadi sik bagu fag alubad sas Yawi! Fagayu am tagsis fagdaul daga, alubadi sik ngay famauseganan anya. Segi yangay anya, fagayu am tagsis sakayan lino, ay fagayu tagbanwan sa tangayayu fag ngay talun tagsis wabilug dagat.

¹¹ Segi anya, fagayu am fag ngay furuan sat magong fag talun ay anggan am fag ngay taw Kedar. Ngay taw Sela, alubadi useganani. Uroi useganani tagsis sangay tungud buksul.

¹² Fauseganani segi Yawi, fagayu am tagsiginan tangayayu fag ngay talun tagsis wabilug dagat.

¹³ Yawi namawayan kata sik tagfawayan at mafalganan. Kanya guro sik famasaful te, namawayan wan, ay namabo at ngay fawayan.

¹⁴ Yawi nalong te, “Glugo wan nu gragangan au gagwanta. Ay katsi, gfasure kwan ku dotama. Guro au kata sik mangena nu gfandeng gina gfasalug.

¹⁵ Nanrufa kwan ngay buksul ay anggan ngay fungsu, ay namagong au ngay tanum. Namalanggang au ngay liskung ay anggan ngay bunaw.

¹⁶ Nantaban au ku ngay taw at yud glag sat nayud yay batang glao fag dalan. Namae yamag au sat madulum fag fagloan, ay namadatag au ngay dalan at matagubung. Namakamulun au takatanya ay kdi ban gfabayan anya fagayu.

¹⁷ Dewa katanya, ngay taw tagafanud sa sangay fagsegan, umkapla ban ay lumagyu.”

Ngay Taw Israel Wa Gdungug ay Wa Glag

¹⁸ Yawi nalong sat ngay taw te, “Am fag ngay yud gdungug ay yud glag, dungugani ay damai!

¹⁹ Am wan ku ngay fagsuguan ay ku ngay nafili. Nasugu au ayu laman ku ngay taglong, ay dewa katanya, we taw kaksvn ayu nu yud gdungug ay nu yud glag.

²⁰ Glag oma am, ay wam kasalag. Gdungug oma am, ay wam kaylat gdungugan!”

²¹ Yawi kaylat gfalag te, at faugali mabalyanan ay masine, laman gfasaful sas fagayu taw te, kanya matuyan.

²² Dewa katanya, katsi, kafag ngay taw nafangkamulan wan, ay nabulan at ngay ramraman, ay tiba ankubung sasad lusung ay sasad ubung, ay we nagubuk ya.

²³ O nunda katsi si ayu ye kaylat gdungugan ay gamatangan at nasaful?

²⁴ Sinu at nasugu te, nanfangkamuli ay nangagoi ngay taw Israel at ramraman? O nunda bunwa Yawi? Kanya tam nafamaboan. Aroro wa tam nafaning at ngay balyawvtan ay at ngay suguan.

²⁵ Nu katanya, Yawi nafalag sa antam at dotama maksvn, ay nafaidapan antam sa tam ngay fawayan. Kanya nu kadotama kata sik afuy at maligung tagirug antam, aroro wa tam nafandungug ay namatangan.