Isayas 41 - Fanawbuid tagsibaliwas Fakayabian

Dius Nanggubuk Taw Israel

¹ Yawi nalong te, “Am fag ngay taw tagsiginan sangay talun tagsis wabilug dagat, ragangani ay dungugani angku. Ay am tagsiginan tibak talun, faksvni ay amatanganan ay akbangi sa angku, ay nangaful tam sas fagnanginsafulan.

² Sinu at nafili sik tagbabo siginans fakamenitan laman kanya gbabo nusnga nday? Ay sinu at nafagbilug sa anya ngay fun ay ngay talun at ngay taw? Kanya nafakata lukbu at ngay fawayan siginan at fiso, ay nafakata sik upa siginan at godun.

³ Kanya nafafalo at ngay fawayan ay we nasalag anya, ay gtaglayun dewa sat fagyudun batang glao fag furuan.

⁴ Sinu at nafakamulun takatanya fagayu? Sinu at nafafasludan takatanya, ay at nafae ngay sugfun taw siginans fagsigadan? O nunda bunwa au? Au wan, Yawi, siginans fagsigadan, ay anggan sas fakatabuan.”

⁵ Ngay taw tagsiginan tangayayu fag ngay talun sis wabilug dagat, ay anggan sas fungfung daga, nalag ku nafakamulun, ay kanya fagayu kalimu. Ay kanya fagayu ankakbang sa angku ay anful,

⁶ ay gudgubukan ay gfadfasunan.

⁷ Ngay tagsaful ggaruy kayu, ay tagsaful kawat ngay famasine siginans gintu, ay tiba yak tagsaful kawat nusnga setaw fag fagagbilugun, gfadfaksvnan yangay at ngay amatanganan ay glong te, “Masine tua fagayu tam nawat.” Ay arodi nafaogat wan at nawat fag ngay fagsegan at fagmalindugan laman di kataygilid.

⁸ Dewa katanya, Israel, o wan ku nafili ay ku fagsuguan, ku fagadgalangan Abrayam at kasugfunanan,

⁹ nafili au emu ay nabul siginan sangay fungfung daga. Ay nalong au emu te, “O wan ku fagsuguan.” Nafili au emu ay kdi ban gaiyan.

¹⁰ Lag o kalimu aroro au wan am Dius. Namabitsug au ay nanggubuk emu. Ku fagmabalyananun tagfaksvn emu ay tagfalangfe.

¹¹ Fagayu ban takauri emu umkapla ay gaewan, ay fagayu am fawayan umfaurianan.

¹² Ay dewa ban o grvbvy am ngay fawayan, wo e lagan ya. Ay kanya ban fagayu we tungkul ya.

¹³ Aroro au, Yawi am Dius, tagfabitsug emu ay taglong te, lag o kalimu aroro ggubuk au emu.

¹⁴ Dewa o mamomuy ay alay, lag kalimu aroro au wan taggubuk emu. Au Yawi taglong takatanya. Au wan am tagfalangfe, Israel at Dius at yud e malong.

¹⁵ Damai! Namakata au emu sik bagu fag fanruyus ke ngay bagang at maglat. Ay nanrufa o ngay buksul ay ngay fungsu kata nu gruyus, ay namakata o sik ngay upa.

¹⁶ Nanlayap o laman umlayug, ay sik maksvn fag tagmara namarapyag. Ay dewa katanya o nanguseganan tuo sas Yawi, ay nanseg tuo Israel at Dius at yud e Malong.

¹⁷ Ku ngay taw at yud e kwa grvbvy mamam, ay we nalag, ay at kaksvnan nu kadanum ankatat wan at ngay lislis; au Yawi, taggubuk anya. Au Israel at Dius kwa gfabayan anya.

¹⁸ Namae familugan au mamam sat yud e gtugbung fag ngay buksul, ay namae ngay bulbug au sa sangay datag. Ay at matat fag talun umke mamam, ay at ngay kin-gong fag daga umke ngay bulbug.

¹⁹ Ay namatugbung au sat magong fag talun ngay fun kayu tagbia ay tagsaman saman,

²⁰ laman ngay taw lumag, ay sumaful, ay umtuyan te, au Yawi, Israel at Dius at yud e Malong, at nafakamulun takatanya.

We Masuad ngay Fagsegan

²¹ Yawi, Israel at Fun nalong sa sangay fagsegan te, “Agvd, longi ay famayudi kata ay fagsafulun!

^22-23 Akbangi ay foyungi emi takafasludan ban. Foyungi emi at kinfasludan ebi laman sumaful ami te, nataw takafasludan ban. Foyungi emi te, nataw ban at kumfasludan, laman sumaful ami te, anud, sik ngay dius am. Fakamuluni at masine ay at mauri laman umdulo ami ay gsuyu ayu.

²⁴ Dewa katanya, at matuyan, wam e nafakamulun ay wam e masuad. Ngay taw tagseg ayu maksvn nu mauri.

²⁵ Nafili au sik taw siginans wala fag alvngvdan laman namagtainan. Kanya kakbang tua angku, ay katsi kanya kadasug siginans fakamenitan. Kanya ban namamin ngay tagfunan kata sik takawat tikung nu gsiad lifak laman gfalganan at fangawat tikung.

²⁶ Sinu si ayu at nalong te, umfasludan ban takatanya, laman sumaful ami ay lumong ami te, kanya matuyan? Fagayu am wam e nalong, ay wam e malong te, ‘Au.’

²⁷ Au Yawi, at nalong takatanya sas Siun, Erusalem fag furuan. Nasugu au sik tagfosuk longan laman namoyung ayu at masine fag barita te, ‘Andasug wan taggubuk ayu.’

²⁸ Narvbvy au te, o e fagsegan at mafalu, ay kwe nalag. Nusdi sadi we mafabalus ku ngay fagintoun.

²⁹ Kafag ngay fagsegan we masuad, ay we fagmafafakamulunun, kata way sik tagmara.”