Isayas 39 - Fanawbuid tagsibaliwas Fakayabian

Sik ngay Nasugu siginans Babilunya

¹ Ginanya, Merudak-Baladan, Baladan at baguama, Babilunya at fun, nadungug te, Esekyas at fakasaitun anfia wan. Ay nu katanya kanya nasugu ngay fagsuguan ay nafabuba sas Esekyas sik ngay rirukan ay sik famonun.

² Ay Esekyas naylat kanya fag ngay fagsuguan at nadasugan, ay nafalag sa anya at fagfungsuan nusnge wain fag ramraman sanbung salapi ay gintu, ay famaenamnam fakonun, ay at mafilian fag langis, ay nusnge wain fag famawayan, ay tiba yak ramraman. Kanya nafalag wan fagayu nusnge wain sit bale daul ay sit fagfagtainanan.

³ Ay Isayas fag taglong nalao sas fun Esekyas ay nainto te, “Daginan kanya fag ngay taw ay nataw at algan?” Ay Esekyas nabalus te, “Kanya andasug siginans tangayayu fag talun, siginans Babilunya.”

⁴ Ay Isayas gdog yay nainto te, “Nataw at nalag sim bale?” Ay Esekyas nabalus te, “Kanya nalag wan fagayu nusnge wain si ku bale daul. Kwe nasuksuk fagayu ku fagmaramramanun; nafalag kwan.”

⁵ Ay Isayas nalong sas Esekyas te, “Dungugani Yawi at Mabalyanan at longan:

⁶ Umdasug ban sik buknga e namuba wan sas Babilunya fagayu am ramraman sim bale, gasfuan am ngay mangaguyang at nafaful fag ngay ramraman dasug katsi. Yawi glong te, wa ban e sawad.

⁷ Ay at fadogan ban am kasugfunanan gatabanan ay nangasik fagsuguan sas Babilunya at fun at bale.”

⁸ Ay Esekyas namatangan te, “Kaduge kban gleleg, e fagmanabayanun tua ay wa ban e mdasug at mauri.” Ay kanya nalong sas Isayas te, “Masine am nalong sa angku fag foyungan tagsiginans Yawi.”