Isayas 38 - Fanawbuid tagsibaliwas Fakayabian

Esekyas e Fakasaitun

¹ Ginanya, Esekyas anke fakasaitun ay arvs anbul wan. Ay Dius at taglong Isayas, Amus at baguama, nananlag anya ay nalong te, “Yawi nalong wa te, ‘Fadantei yap am ngay kalongan aroro wa kafia ya am fakasaitun, ay umbul wo.’ ”

² Ay Esekyas nu nadungug katanya, kanya nasalubang sas dingding ay gdarangin sas Yawi te,

³ “Yawi, amatangani tua ku ngay nafakamulun at matuyan, ay nasaful wo te, fagdaul ku amatanganan nafaning ktua emu, ay fagdaul ku nafakamulun masine tua sa emu.” Ay kanya gwayway maksvn.

⁴ Yawi nalong sas Isayas te,

⁵ “Loi sas Esekyas ay longi anya te, ‘Katatuy am mangaguyang Dabid at Dius, Yawi at longan: Nadungug au am darangin ay nalag au am liasun. Nu katanya, namamut kyay am leleg labi lima yak banwa.

⁶ Namalangfe au emu gasfuan am furuan siginans Asirya at fun, ay nanggubuk au tuy fag furuan.

⁷ Katatuy am fagsafulan ban te, namakamulun au ku fatuyanan:

⁸ namafoli kyay safuluk talangtang at aninu menit at fagfafoliun tagsis Akas at nawat fag fanginsaful alinan menit.’ ” Ay anfasludan takatanya.

⁹ Katatuy Esekyas, Uda at fun at rirukan gina at fakasaitun anfia.

¹⁰ Nu glong kro dewa au mabaguama yay kabul kwan, ay gdalan kro sas sakbawan tagsa sangay kinbul at talun.

¹¹ Nu glong kban kwa lumag ya Yawi iste sis tagleleg at daga ay kwa lumag ya ngay taw.

¹² Arvs nalyam wan ku leleg kata sik tagulit tupa at bale ramit at kinlayug. Nu glong au umlifung wan ku leleg kata sa sik fangawat ramit at kinlifung siginan at fansimat. Nafanya au nu gfatabu o ku leleg siginans balabag sitsigon sad yabi.

¹³ Nafanya au sitsigons balabag ay nu gamatangan au, umbul kwan kata sik liun nu grufa ku bini.

¹⁴ Naet au gubuk at kaksvnan nu garingang au, kata way lang sik alfasang ay mannga sik baratingan nu guni. Ay gfandeng au kata sik labikung nu guni. Ku mata kalufuy wan nu gtangda banwa. Yawi, gubuki wan angku; maksvn wan nu gidapan au.

¹⁵ Ay tain ya ro ku longan? Aroro kanya nabalus tua ay nafafia angku. Nu katanya, nanfamababaun ktua sa anya aroro sa ku nadalan fag fagidapun.

¹⁶ Fun Dius, aroro sa am nafakamulun, gfabitsug tuo gugat ngay taw at amatanganan, ay nafabitsug tuo anggan ku amatanganan. Nafafia tuo angku ay naylat yay o nu gleleg au.

¹⁷ Matuyan wan, ku nadalan fag fagidapun anke fanambagun sa angku. Aroro nesug tuo angku, nafalangfe tuo angku siginans faurianan ay nafalyam tuo ku ngay asalanan.

¹⁸ Aroro setain ro nu gseg au emu nu nbul kwan? At ngay kinbul wa gseg ya emu ay we fagsegun ya sa am fagmatuyanun.

¹⁹ Tagseg emu tagleleg way lang fagayu kata ku fakamulun katsi. Fagayu ban sugfun taw gfoyung sat fadogan fag sugfun taw sabaliwa am fagmatuyanun.

²⁰ Yawi, nafalangfe tuo angku. Nu katanya, kaduge ban ami gleleg, nangalubad ami sa am bale, gasfuan nu gfawang ami em ngay fagfawangun.

²¹ Ay Isayas nalong sas fun Esekyas at ngay fagsuguan te, “Dafuti sik nafalumak fag rawvg igus sat yapvs laman umfia wan.”

²² Ay Esekyas nainto te, “Tain ro sik fagsafulan famatuyan te, umfia au ay malao kyay ban sas Yawi at bale?”