Isayas 37 - Fanawbuid tagsibaliwas Fakayabian

Fun Esekyas Nananginto sas Isayas

¹ Fun Esekyas nu nadungug kafag barita, kanya nagirat at lanbung, ay nasulun saku laman sik famasaful te, kabalu, ay kanya nalao sas Yawi at bale laman nandarangin.

² Kanya nasugu Elyakim, tagulit at bale, ay Sebna fag tagalaga salapi, ay anggan tiba tungud fag ngay tagfon fanggalangun laman glao sas Isayas fag taglong, Amus at baguama. Kanya fagayu galanbungan saku.

³ Ay kanya fagayu nu ndasug sas Isayas, nalong anya te, “Esekyas glong te, ‘Katsi maksvn nu gidapan tam, ay nu gafaurianan tam ay gafaplan. Kata tam sik mangena tagafasalugun at yud e bitsug ya gfasalug at ngenge.

⁴ Asirya at fun nasugu at fun tagfawayan laman namalingun tagleleg fag Dius. Malgau ay Dius Yawi nadungug wan kanya fag fun tagfawayan at longan ay kanya umfaurianan aroro nalong takatanya. Nu katanya, darangini tua at kinsawad si antam.’ ”

⁵ Ay gina fun Esekyas at ngay nasugu andasug sas Isayas,

⁶ Isayas nalong sa anya fagayu te, “Longi sa ay tagfayafun te, Yawi glong te, ‘Lag o kalimu am nadungug fag longan Asirya at fun at fagsuguan nu gfalingun angku.

⁷ Dungugani! Namabanwan au sik falad sas Asirya at fun. Ay kanya ban dumungug sik barita ay umfoli sat talun. Ay namabul kban anya sit talun siginan sik takamasing.’ ”

Taw Asirya Gdog yay Gfararang sas Taw Uda

⁸ Ay fun tagfawayan nu nadungug te, Asirya at fun nalao wan siginans furuan Lakis ay gfawayan sis Libna, kanya nalao sanya.

⁹ Ay Senakerib, Asirya at fun nu nadungug te, Tiraka, Etiupya at fun, namawayan ngay taw Asirya, kanya nasugu sik ngay tagfosuk longan sas Esekyas laman glong anya te,

¹⁰ “Lag o gadayan am fagsegan fag dius nu glong te, ‘Asirya at fun wa nangagbilug Erusalem.’

¹¹ O nunda wo nadungug Asirya at ngay fun at nafakamulun sas fagayu talun? Kanya fagayu nafabul fagayu talun at ngay taw. O gamatangan o te, umlangfe yay o?

¹² Ku ngay mangaguyang nafamin ngay taw tagsi sangay talun Gusan, Karan, Resef ay anggan at ngay taw tagbanwan sis Eden tagsis Tel-Asar. O nunda sanya fag ngay talun at ngay dius nafalangfe anya?

¹³ O nunda ngay fun si sangay furuan Amat, Arpad, Sefarbaim, Ena, ay Iba nafalangfe at ngay taw?”

Esekyas at Darangin

¹⁴ Esekyas nu nabul rirukan siginan kafag ngay tagfosuk, kanya natap, ay nalao sas Yawi at bale ay narafad kafag rirukan sis Yawi at daga salubangan.

¹⁵ Sanya ginan, kanya gdarangin te,

¹⁶ “Yawi at Mabalyanan, Israel at Dius, at malunggung sit faglunggungan sis wabilug ngay awatan at ke fakfak, o way lang Dius sas fagayu fagfagtainanan sas fagdaul daga. O wan at nawat banwa ay fagdaul daga.

¹⁷ Yawi, dungugi tua angku ay damai. O tagleleg fag Dius, dungugani Senakerib nu gfalingun emu.

¹⁸ Yawi, o matuyan, Asirya at ngay fun nafamin wan ngayuk talun at taw ay nafasik mabaluanan at ngay talun?

¹⁹ Kanya fagayu nafamin wan fagayu at ngay fagsegan ay naukas sasad afuy. Aroro kanya fagayu bunwa at matuyan fag dius; sik ngay kayu way ay ngay gang ngay taw at nawat.

²⁰ Nu katanya, Yawi em Dius, falangfei emi siginan Asirya at daluap, laman fagdaul daga at ngay taw sumaful te, o way lang Dius.”

²¹ Sanya ginan, Isayas, Amus at baguama nafosuk sik longan sas Esekyas te, “Yawi, Israel at Dius glong te, ‘Nadungug au am darangin sabaliwas Senakerib, Asirya at fun.

²² Nu katanya, katatuy ku longan sa anya: Ngay tagbanwan sis Siun sis Erusalem fag furuan kauri ay gfalingun emu. Kanya fagayu gfalingun emu kaduge o glagyu.

²³ Sinu am nafalingun ay am nafauri? Ay dada nu garingang o ay nu kamatungudun o? O nunda bunwa au, Israel at Dius at yud e Malong?

²⁴ Nagbilug o am ngay fagsuguan laman gfalingun o angku, Nalong o sa angku te, “Siginan ku ngay faguyudan fangawayan naundaud au sa tangabat fag ngay buksul, anggan tungud buksul Lebanun. Nafuan kwan sanya fag ngay kayu tangabat, ay nalag au tangayayu fag fungfung tangrawan, ay at masine fag araw.

²⁵ Ay nafaali au ngayuk bubun sa sangay talun, ay nainum au mamam sanya ginan. Ay gina au gdalan, nafalanggang kwan fagayu liskung sis talun Igiptu.”

²⁶ Anud, narasras o ngay furuan ayu daul at ke ngay dingding alad. O nunda yo nasaful te, glugo wan nu e algan au takatanya? Siginan yay ebi anke algan kwan ay katsi nafafasludan kwan.

²⁷ Ngay taw tagbanwan si am narasras fag ngay furuan wa mabitsug ya. Kanya fagayu kalimu ay kapla. Kata ngay makmak sis talun at masakit kalangke, ay kata sik makmak tagtugbung sis tungud bale takalangke way vtv.

²⁸ Nasaful kwan fagayu sabaliwa emu. Nu inda nu gbanwan o, ay nu daginan o, ay nu dada ro wo, ay nu setain nu kadotama o angku.

²⁹ Aroro nadungug au nu kadotama o ay kamatungudun sa angku, namae fansayang au sim dungus ay namuksung au am bibig, ay gguyudan au emu sam guyan ay namafoli au emu sam fagbanwanan.’ ”

³⁰ Ay Isayas nalong sas Esekyas te, “Katatuy am fagsafulan te, Yawi nandiri furuan Erusalem siginan sangay taw Asirya. Katsi fag banwa, ay fakonun ngay rawvg siginan ay yud natanum. Ay at fadogan fag banwa, ay fakonun tagsiginan at natugbung siginan egbanwa at kintong fag bvtang. Ay dewa katanya sis fatuluk banwa, tanumi ay gutlui, ay e fakonun tua ban am. Ay mafatanum yangay ban am ay ubas ay e fagrabasun yangay ban am rawvg sanya ginan.

³¹ Ay fagayu at kinsawad tagleleg sis Uda umramraman yangay ban, kata sik tanum tangabasad at lalid ay tagrawvg.

³² Aroro e sawad ban tagleleg sis furuan Erusalem, sas Buksul Siun. Yawi at Mabalyanan at namafasludan takatanya.”

³³ Katatuy Yawi at longan sabaliwas Asirya at fun: “Kanya ban wa gsakbo sas furuan Erusalem, ay wa magbilug at godun laman gfatos nusdi sadi at banyas. Kanya wa manangakbang at ke famalabag ay nanligung laman namawayan.

³⁴ Kanya umfoli way. Au, Yawi, glong au te, kanya ban wa masakbo ste fag furuan.

³⁵ Gdiri kban ay namalangfe tuy fag furuan laman e namauseganan angku ay aroro ebi nafatuyanan au sa ku fagsuguan Dabid.”

³⁶ Ay Yawi at tagbarita nalao sas Asirya at fagmafulan ay nafabul sadik sandan waluk safulu e limak libuk tagfawayan. Gina sis balabag sirut, at ngay tagleleg nu nfulo, nalag kafag ngay mabulan.

³⁷ Nu katanya, Senakerib noli sas Ninibe ay nanamanwan sanya.

³⁸ Sik menit, kaduge Senakerib gseg at fagsegan Nisruk sit bale fagnansegan, at baguama fagdua Adramelek ay Sareser nafabul anya siginans fiso ay duksay nalagyu sas talun Ararat. Ay at baguama Esarkadun at natubus anya laman sik fun.