Isayas 36 - Fanawbuid tagsibaliwas Fakayabian

Ngay Taw Asirya Nafawayan Erusalem

¹ Gina sis falabi ufatk banwa Esekyas nu gfunan, Senakerib, Asirya at fun, nafawayan ay nagbilug fagayu at maaladan fag furuan sis Uda.

² Ay gina Asirya at fun sis furuan Lakis, kanya nasugu at fun tagfawayan anggan ngayuk tagfawayan sas fun Esekyas sis furuan Erusalem. Ay gina kanya fagayu ndasug sis day Erusalem, anragang si sik fagfamiluganan sis buid fag fagfungsuan mamam, sa sangaba dalan tagsas tagbakbak at gamasun.

³ Ay Elyakim, Kilkya at baguama, tagfunan sis fun at bale, ay Sebna fag tagalaga salapi, ay Ua, Asaf at baguama, tagalaga ngay rirukan sit fagfagtainanan nanamablang anya fagayu.

⁴ Ay Asirya at fun tagfawayan nalong te, “Nanlong am sas fun Esekyas te, “Katatuy Asirya at fun at mabalyanan at longan: Nataw am fakamatungudunun?

⁵ Nalong o te, ngayu tua am ngay nasafulan ay mabalyanan am ngay tagfawayan, ay dewa katanya, am longan fagayu we masuad. Sinu at mabalyanan am fagsegun, am nafamaboan angku?

⁶ O talun Igiptu? Kanya fag talun at ngay taw ay at fun kata way sik magatvngan fag tulag tagurus am daluap nu gatulagan o.

⁷ Nute glong o te, ‘Gafanud ami sa em Dius Yawi.’ O nunda bunwa o Esekyas at nasugu te, ‘Rasrasi wan ngay bale fakafulan sa tangabat fag ngay buknga anggan tagsanya fag ngay fagirugan fanggalangun’? Ay nalong yay o sas fagayu tagbanwan sis furuan Erusalem ay anggan sa sangay furuan sas Uda te, ‘Nu gseg am sa yakman Erusalem fag fagirugan.’

⁸ “Ay katsi ku tagfayafun, Asirya at fun, e fagyafonun emu. Namon ami emu duak libuk kabayu nu e duak libu tuok taw tagsaful gsakay sas kabayu.

⁹ Wa ro wo mababo nusdi way ku tagfayafun at fagsuguan tiba daga. Nu katanya, wain am fagsegun yay te, talun Igiptu namon ban emu sik ngay faguyudan fangawayan anggan sik ngay taw tagsaful gsakay sas kabayu?

¹⁰ Ay sadi ya, o gamatangan o te, Yawi wa kaylat ku naloan stie? Kanya wa ngap karo at nasugu angku te, ‘Farasrasi wan ay famini tuy fag talun.’ ”

¹¹ Ay Elyakim, Sebna ay Ua nalong sas tagfangguna tagfawayan te, “Anin, nu gfakamatoan o emi, sa yakmans taw Aram at fangaringang, aroro kanya way em fagtogdungugun. Lag garingang sas Ebreu fag fangaringang aroro tagsis alad furuan fag ngay taw gdungug way.”

¹² Dewa katanya, kanya fag fun tagfawayan nabalus te, “O nunda sa way lang ay fun ay sa ayu ku tagfayafun at fagnasuguun angku ste laman gfadungug ayu tuy? Bundi, anggan tua sas fagayu taw tagbanwan iste sis furuan Erusalem. Fagayu ban am umlunus wam ay umdanum nu gfawayan wami ayu. Ay nu katanya, ay fakonun ban ay kek mandi ay ay fanginum ay tifus.”

¹³ Sanya ginan, kanya fag tagfangguna tagfawayan anlindug ay nauro sas Ebreu fag fangaringang te, “Dungugani Asirya at mabalyanan fag fun at foyungan.

¹⁴ Katatuy at longan: Lag am gadayan Esekyas. Kanya wa mafalangfe ayu siginan ku daluap.

¹⁵ Lag am gafaylatan, kanya gina gafanud sas Yawi glong te, ‘Matuyan wan Yawi namalangfe wan antam, ay di ban gfatigwanan ya tuy fag furuan sas Asirya at fun.’

¹⁶ “Lag am gdungugan Esekyas! Katatuy Asirya at fun at longan: Lag am namawayan angku; luangi sakbawan ay duksuni wan sa angku. Kaylat kwan nu nangon am ay tanuman at rawvg ay nanginum mamam sa ay sadili saguban,

¹⁷ yakmay au umdasug ay tumaban au ayu sa sik talun kamasine yangay ay talun, tangayu at ubas ay fagnamulan ay fanlangu ay ngayu yangay at fangawat tinapay.

¹⁸ Lag am gdungugan Esekyas, kanya kamuag way sa ayu te, ‘Yawi wan tagfalangfe antam!’ O nunda e tibak dius sa tibak gaban taw at mafalangfe at talun siginans Asirya at fun at daluap?

¹⁹ Dada wan furuan Amat, Arpad ay Sefarbaim at ngay fagsegan? O nunda kanya nafalangfe Samarya siginan ku daluap?

²⁰ Kayunya fag ngay dius, inday at nafalangfe at ngay talun at ngay taw siginan angku? Nu katanya, tain ro Yawi nu mafalangfe furuan Erusalem siginan ku daluap?”

²¹ Sanya fag ngay taw wa nabalus, aroro fun Esekyas nalong te, “Lag gbalus.”

²² Sanya ginan, Elyakim, Sebna ay Ua nagirat at ngay lanbung at kaksvnan nu kabalu, ay anfoli yay sas Esekyas ay nafoyung fun tagfawayan at ngay nalong.