Isayas 35 - Fanawbuid tagsibaliwas Fakayabian

Ngay Taw at Kinlangfe nu Guseganan

¹ Ay at matat fag talun guseganan ban kata sik taw nu guseganan. Ay gbarugwak ban sanya at ngay makmak.

² Kafag talun guro tua ban nu galubad at kaksvnan nu guseganan, ay ngay barugwak ban kabuskad. Ay umsine ban kanya fag talun kaksvn buksul Lebanun nu masine, ay kata buksul Karmel ay datag Sarun. Ay umsure ban sanya Yawi tam Dius at fagmabalyananun ay at kamasuloan.

³ Nu katanya, gubuki tua takamomuy.

⁴ Foyungi tua sas fagayu takalimu te, “Lag am kalimu. Faksvni tua ay amatanganan. Umdasug ban ay Dius laman gfasud ay ngay fawayan, ay namalangfe ayu.”

⁵ Ay nu nfasludan ban katanya, sik taw at yud glag, glag tua ban, ay at yud gdungug, gdungug tua ban.

⁶ Ay at yud malo fag ngay taw nanfanulbuan kata sik kambing talun at kaksvnan nu guseganan, ay at yud maringang nanguro tua aroro gfanagsag. Mamam ban gfamilugan tua sat matat fag talun, ay at ngay bulbug gfamilugan sa sangaba talun.

⁷ Ay at masugba ban fag lagnasan umke lino. Ay at magong fag talun umke bulbug tua. Ay sanya ban tumugbung nusnge wain fag makmak sa sangay idu talun at dan fagbanwanan.

⁸ Ay umke dalan ban daul sas talun ay e gngayan te, “Yud e Malong fag Dalan.” Ay wa ban e glao sanya tagasalanan anggan at yud e nasafulan, nu bunway at ngay tagfaning way lang Yawi at balyawvtan.

⁹ Ay wa ban e liun ay anggan nusnge wain tagfangagat fag mangilafang at lumo sanya fag dalan, nu bunway Yawi at nafalangfe fag ngay taw.

¹⁰ Kanya ban fagayu kafoli sas Siun galubadan. Ay nalyam wan at fakabaluun ay at fagwaywayun, ay natubus at yud e gfasud fag fagusegananun ay fagfanagsagun.