Isayas 34 - Fanawbuid tagsibaliwas Fakayabian

Dius Namaurianan ban at ngay Fawayan

¹ Am fag ngay talun at ngay taw, akbangi ay dungugani angku. Fagdaul daga dungugani anggan fagayu tagsanya.

² Aroro Yawi kadotama fagayu talun at ngay taw, kanya kadotama at ngay tagfawayan, ay namamin ban fagayu. Namabul waban anya fagayu.

³ Wa ban e namoli ya at ngay bilug, ay nu katanya, umbasung ban sanya, ay sanya ban fag ngay buksul umraska aroro gatagukun.

⁴ Fagayu nusnge wain tagsis banwa umtinas wan, ay banwa mafabilugan kata sik fafil. Ay fagayu galeme umtong wan kata sik ngay don ubas at kinlangke, ay kata sik ngay rawvg kayu at kin-gong.

⁵ Yawi nu ntabu gagbilug at fiso sis banwa, kanya nangagbilug yangay at fiso sas Edum laman namamin.

⁶ Yawi at fiso gatabaun ay gatagukun, kata nu gfilas sik ngay fanggalangun fag kambing ay tupa. Aroro Yawi namabul ban fagayu taw Busra kata sik fanggalangun. Ay ngayu yay at fagnamabulun sis talun Edum.

⁷ Ay namabul yangay ban at mabalyanan fag ngay taw sanya fag furuan kata nu gfabul sik baka tama. Ay sanya fag furuan umkapnu taguk ay taba.

⁸ Aroro Yawi e nafalganan tua sik menit laman namasud at ngay fawayan laman ggubuk ngay taw Siun.

⁹ Talun Edum at ngay bulbug umkata sik madai fag fandafut ay at daga umkata sik afuy asupre. Fagdaul ban sanya fag talun gigang,

¹⁰ ay kanya ban wa karabung ya kayu menit ay kayu yabi, ay anus kabat sas kiwang kabavn ban. Wa ban e gbanwan sanya ay wa ban e taw dumalan sanya kabavn.

¹¹ Tagbanwan ban sanya ngay ebo way lang ay ngay ugak. Yawi at ke algan te, Edum umsik mabaluanan ay at yud e gbanwan fag talun.

¹² Ay at ngay fun sirut gfangayan ban kafag talun te, “We Tungkul fag Fagfagtainanan.” Ay at ngay tagfangguna kalyam waban.

¹³ Ay tumugbung sanya sik ngay makmak madugi sit maaladan fag afud furuan. Ay sanya ban tagbanwan sik ngay ebo way lang ay ngay idu talun.

¹⁴ Maful waban sanya fagayu mela ay ngay idu talun. Ay ngay kambing talun nangudgunian, ay at ngay mela tagfanlo sad yabi namanwan sanya.

¹⁵ Ngay ebo nu gfugad sanya wan, ay nu giklug, anggan nu gfabuksa, ay glub at ngay riangan sit daga fakfak. Ay sik ngay dadwaan ugak sanya yangay nu nangaful.

¹⁶ Fagayu am damai Yawi at rirukan ay tapi. We yud umfasludan fagayu at marirukan sanya kata ku nalong. We kalyam nusdi sadik mangilafang tagsanya, ay tagsanya mesa tua e ufud. Aroro katanya wan Yawi at fakaylatun, ay kanya wan at nafaful anya fagayu.

¹⁷ Kanya yangay at nafae fagbanwanan ngay mangilafang, laman gagbilug ban kabavn, ay sanya ban nu gbanwan kabavn.