Isayas 32 - Fanawbuid tagsibaliwas Fakayabian

At Matuyan fag Fun

¹ E sik fun matuyan tua nu gfunan, ay at ngay tagfangguna anke fagmanabayanun nu gfangguna.

² Galay at sadi umkata sik fagsarirungan gina fulug andasug. Ay kanya fagayu umkata sik liskung tagfamilugan sas talun yud e taw, ay umkata sik tagbia fag gang at lanbung sit masugba ay at matat fag daga.

³ Ay fagayu ban taw grvbvy Dius ay gdungugan anya.

⁴ Sik taw tagfangabanganan sumaful tua ay tumogdungug at fakamulun, ay sik taw tagutal maringang tua ban masine ay masnug.

⁵ Ay sik ngay taw yud e fagsafulun, wa ban e gfauseganan ya anya, ay sik ngay tagfandaya wa ban e gsuyu anya.

⁶ Aroro sik ngay taw yud e fagsafulun nu garingang at yud way e masuad, ay at amatanganan sa way lang at mauri, ay gfakamulun at yud masine, ay kamuag nu garingang sas Yawi, ay gfabayan takalunus ay takadanum.

⁷ Ngay tagfandaya at ngay balyawvtan wa masine. Kanya fagayu gfalganan gugat at mauri sat yud e kwa fag ngay taw siginan at fakamuaganun, dewa at yud e kwa at fagetun matuyan.

⁸ Dewa katanya, at ke fagsafulun fag taw, matuyan at algan, ay kabavn matuyan tua at fakamulun ay gfafasludan tua.

^9-10 Fagayu am fag ngay mangena tagbayan lang, dungugani ku fagyalongunun ayu! Gina yud anlangfe sik banwa siginan katsi, umlimu ban am aroro ay tanum ubas wa ban e rawvg ay wa ban am e fagrabasun.

¹¹ Glugo wan nung am lang gbayan, ay wam gugatan gfakamulun. Katsi tadtaruyani alimui. Buli wan ay lanbung ay futusi si ay fagwan sik saku,

¹² ay abalui ay gamasun at ngay rawvg ay at marawvg fag ngay ubas.

¹³ Sa ku ngay taw at daga e tumugbung sik ngay makmak madugi. Kalyam ban at manabayan fag furuan at ngay bale.

¹⁴ Wa ban e gbanwan ya sanya fag furuan at maksvn fag afud, ay tagsanya fag buksul ay bale fagulitan umsik talun way ban kabavn, ay ngay asnu at fagbanwanan ay ngay tupa at fagnanfangonan.

¹⁵ Umfasludan wa fia takatanya yakmay ban umdasug at Masine fag Falad siginans banwa. Nu katanya, sanya ban fag talun umsik masine tua fag daga ay umsik araw.

¹⁶ Ay sis talun at yud e taw ay sit masine fag daga, nu e gfawabilugan, matuyan tua.

¹⁷ Ay fagmatuyanun at rawvg, fagmanabayanun, ay di e fagafanawaun kabavn ban.

¹⁸ Fagayu am ku ngay taw, manabayan ban nu gbanwan am, ay anlangfe wam siginans faurianan. Ay di ban e gfasalag ayu.

¹⁹ Dewa arak yelu kadaul ngay gang ayu sirut gfarayaw ay araw ay rumasras ay ngay furuan,

²⁰ Dius ban ggubuk tua ayu, ay kasakan tua ban at mamam famarugme ay tanuman, ay anggan fagayu ay ngay fagbaugun manabayan gfangonan nusnga nday.