Isayas 31 - Fanawbuid tagsibaliwas Fakayabian

Fagayu Tagsarig sas Talun Igiptu Gafaurianan ban

¹ Afanyuan, fagayu am at nanget gubuk sas talun Igiptu. Gsarig am sat matarung fag ngay kabayu, ay at tangayu fag faguyudan fangawayan, ay at magaras fag ngay tagsaful gsakay sis kabayu. Dewa katanya, wam gseg Yawi, Israel at Dius at yud e Malong, ay wam nanget gubuk sa anya.

² Anggan Yawi e fagsafulun yangay, ay kanya tagfae faurianan, ay gfafasludan wa fia at nalong. Namaurianan wa fia tagfaning mauri at talanan, ay anggan taggubuk kafag talanan.

³ Ngay taw Igiptu sik ngay taw way kata ayu, ay bunwa Dius. Ay at ngay kabayu bunwa sik ngay falad, kanya kata yay tibak kabayu. Ay gina ban Yawi gfauri, umrasras wan talun Igiptu anggan at faggubukun fag ngay talun at ngay taw. Ay kafag duak talun umkamin ban.

⁴ Katatuy Yawi at nalong sa angku te, “We mafasalag sik liun nu gngarngar gina e nagamat, dewa ngay tagulit ngay fagbaugun guro. Katanya yangay, we mafasalag angku nu gbalabag au Buksul Siun.

⁵ Au wan Yawi at Mabalyanan. Galaga kwa fia furuan Erusalem kata sik manuk tungud tagulit at fugad. Gbalabag kwa fia, ay namalangfe, ay kwa ban gfabayan anya.”

⁶ Am fag ngay taw Israel, maksvn nung am nafamabo Yawi. Afolii wan sa anya.

⁷ Aroro umdasug ban sik menit nangukas wam ay ngay fagsegan at fangawat sanbung salapi ay gintu, ay nawat aroro siginan ay nafamaboan.

⁸ Fagayu taw Asirya umbul wan, dewa katanya, bunwa siginans fiso. Kanya ban fagayu lumagyu siginans awayan, ay fagayu at ngay baguama nangafagsuguanan.

⁹ Fagayu at ngay tagfawayan lumagyu aroro kalimu, ay at ngay fagtainan wa nasaful te, tain ro at fakamulun gina nalag at ngay fawayan gfabat at famasaful fag ramit. Katanya Yawi at longan, at nafae afuy sis Siun, sis furuan Erusalem.