Isayas 30 - Fanawbuid tagsibaliwas Fakayabian

We Tungkul Uda at Nasadian sas Igiptu

¹ Yawi nalong te, “Afanyuan ku ngay sisian takamabo. Kanya gfalganan sik ngay algan deyud gfadiuganan angku, ay nanangasadi sa tibak taw dewa yud au e longan. Takatanya at fakamulun gfayu way at asalanan.

² Kanya fagayu glo wan sas talun Igiptu laman nanget gubuk sat fun, ay wa get gubuk sa angku.

³ Dewa katanya ngap, kapla ban talun Igiptu at fun nu ggubuk anya.

⁴ Aroro dewa talun Igiptu at fun gfagtainan wan anggan sas Suan ay Kanes,

⁵ ay ngay taw Uda umke fakaplaun ban aroro ngay taw Igiptu wa ggubuk ya, nu bunway gfadasug way fakaplaun ay fagyudun e fagsegun.”

⁶ Katatuy Dius at foyungan sanya fag ngay mangilafang baliwa tagsis talun Negeb: Ngay taw Uda nalo sa sik talun maidap at dalan, ay e liun, ay e ngay ule ay dot kata tua nu glayug. Ay nafabuba at ngay fagmaramramanun sat ngay asnu ay kamelyu, laman famonun sa sik talun at ngay taw at yud mafagubuk anya nusdi alay.

⁷ Kanya fag talun, Igiptu wan, at yud e tungkul fagayu at gubuk. Nu katanya, gfangayan au anya te, “sik tagbia fag mangilafang at yud e tungkul.”

⁸ Yawi nalong sa angku te, “Gewan, riruki sa sik fafil ku nafayudan sa sangay taw Israel, laman ban gfamatang ay gfatuyan at ngay asalanan kabavn.

⁹ Aroro kanya fagayu sik ngay takamabo ay takamuagan, ay wa kaylat gdungugan ku foyungan.

¹⁰ Kafag ngay taw nalong sat ngay taglong te, ‘Lag gfoyung ya emi sabaliwas Dius at nalong sa ayu. Lag gfoyung sa emi at matuyan fag ugali. Am fagfoyungun sa emi nusnge wain yakman tagfauseganan emi, ay sik ngay taginfan yakman at yud kafasludan.

¹¹ Saruyani wan siginan em dalan. Lag gsalag emi. Lag gfoyung emi sabaliwas Israel at Dius at yud e Malong.’ ”

¹² Nu katanya, Israel at Dius at yud e Malong nalong te, “Aroro nasaruyan wayam ku foyungan ayu ay nafanud wam sas famalingun ay fandaya,

¹³ umkamin ban am, ay ay asalanan kata karang si tangabat fag alad, ay masakit way nu kasuak.

¹⁴ Umrufa ban am kata sik bisu daga, ay at kaksvnan, we nagrufan ya sak masaruk ngay nagyunguan ay mafatas mamam.”

¹⁵ Yawi tam Fun, Israel at Dius at yud e Malong, nalong te, “Afolii sa angku ay manabayani, aroro namalangfe kwa fia ayu. Lag am gaduanun; afanudi wa sa angku, aroro namabitsug kwa fia ayu. Dewa katanya, kamayud wayam.

¹⁶ Ay nalong am te, ‘Malagyu waymi siginan em ngay fawayan, aroro fagayu em ngay kabayu matarung tua.’ Anud, umlagyu wam fia, dewa katanya, at namafalo ayu amatarung yap tua.

¹⁷ Sik taw yamay lang at famalimuanan, sadik libu ay tagfawayan lumagyu, ay nu lima wak taw takamalimuanan, fagayu wam at lumagyu, yakmay am gsadsadian lang, ay kata wayam sik turuk fagfabatan famasaful fag ramit gsadilian sis tungud buksul.”

¹⁸ Dewa katanya, Yawi mafanyan nu nangakbang am sa anya laman kafanyu ayu. Kanya mafalganan namalag ayu at fakafanyun. Aroro Yawi wan at matuyan fag Dius, ay fagayu tagafanud sa anya mauseganan.

¹⁹ Ngay taw Siun tagbanwan sis furuan Erusalem, wa ban am gdog ya gwayway! Yawi kafanyu tua ban ayu nu get tuam gubuk sa anya. Ay gina nadungug ay darangin gbalus wa fia.

²⁰ Tam Fun Dius kata nu nafainum ayu ay nafaon sik ngay faurianan ay fagidapun. Kanya dewa nafakamulun takatanya sa ayu, kanya wan ay takamoyung ay di sumuksuan ayu. Lumag wam fia anya,

²¹ ay dumungug wam fia nu garingang nu namoyung ayu at matuyan fag dalan, dewa nusnga nday am.

²² Amatangani te, mauri way ay nawat fag ngay fagsegan at fangawat sanbung salapi ay gintu. Ukasi wan kata sik fangarus fangigusan fag ramit ay longi te, “Deyud ya kanya!”

²³ Yawi ban gfarak gina sis fantanuman fag buknga, ay umkayu ban ay tanum at rawvg. Ay fagayu ay ngay fagbaugun nu gfangonan sat tagbia fag fagnamafangonan.

²⁴ Ay fagayu ay ngay baka ay ay ngay asnu ay fagagbilugun gina am gfakamulun nanfangonan tua sat tiba tungud nu masine fag famafangon.

²⁵ Ginanya ban fag ngay menit, gina e gfabul ay ngay fawayan ay e grasras at ngay bale fagulitan, mamam ban gfamilugan siginan sangay fungsu ay buksul tangabat.

²⁶ Ginanya ban, magdanun dumamlag kaksvn menit. Ay menit nu mayamag kafamut yay fitu ginan, kata nu nafasadi fituk menit at damlag sa sadik menit. Umfasludan ban takatanya gina Yawi gsifig ay gfafia at ngay taw at ngay fakarukan.

²⁷ Dungugani fagayu am! Yawi kadasug siginan tangayayu, kata nu gigang at dotama sis wa buknga anus. Ay at bibig mapnu dotama ay nu garingang kata wa sik tagigang fag afuy.

²⁸ Ay nu gengasan kata wa sik mamam nu kabia, kabat sis liug. Ay gfamin wan fagayu talun at ngay taw kata way nu glayap. Kanya fagayu kata way sik baka at ke siuk sit dungus ay gatabanan sas faurianan.

²⁹ Dewa katanya, fagayu am Dius at ngay taw nangalubad tuam, kata ay fakamulun sad yabi gina am gfauseganan Yawi. Ay guseganan am kata sik ngay taw tagadgaloan glo sas Yawi at Buksul kaduge e gfawang ngay tulali, laman nanseg anya, Israel at fagsarirungan fag gang.

³⁰ Ay sanya Yawi namadungug at mabalyanan fag aringang, ay namasure at daluap laman gfasaful te, mafalganan wa namauri aroro maksvn nu kadotama. Gfasfuan sik tagigang fag afuy, ay arak way nu umbusbus, ay glimbad ay gtalafun, ay arak yelu kadaul ngay gang ayu sirut.

³¹ Ngay taw Asirya umlimu nu gdungug Yawi nu garingang at famauri sanya fag ngay taw.

³² E gfamin waban fagayu taw sanya ay kayu ginan Yawi gfalang sanya fag ngay taw, gfasfuan sik fagfadkalinganun ay fagfawangun ke ngay bakyang.

³³ Glugo wan nu mafalganan at buknga daga at fagnangirugan Asirya at fun. Kanya tagbia wan ay nangabasad wan, ay mafalganan yangay ngayu fag famaygang. Yawi at engasan kata sik afuy asupre tagfalabe kafag famaygang fagayu.