Isayas 3 - Fanawbuid tagsibaliwas Fakayabian

Faurianan sas Uda ay sas Erusalem

¹ Fun Dius, Yawi at Mabalyanan, namalyam ban ngay taw Erusalem ay ngay taw Uda at ngay fagsegun: at fakonun ay at fanginum,

² at maseganama fag ngay taw ay at ngay tagfawayan, ay at ngay tagwabilug, ay at ngay taglong, ay at ngay taginsaful ay at ngay tagfangguna,

³ ay at ngay fun tagfawayan, ay at fagsuyuun fag ngay taw, ay at ngay tagfalu longan, ay at ngay tagfakamulun at madulo, ay at ngay tagfangufit.

⁴ Ay Yawi ban nanfili sik ngay sisian laman at namangguna anya fagayu.

⁵ Kanya ban fagayu gfauri at iba: at fasabale, ay at fagtainan. Ay at yud ban e fanambagun gfawayan wan at ke fanambagun fag ngay taw.

^6-7 Ginanya ban fag buknga, sik taw nangakbang sat kalongan ay glong te, “Emu am lanbung masine yay, nu katanya, o wan at nanfunan emi katsi gina tam furuan marasrasan.” Ay kanya ban gbalus te, “Duan, kwa makatu gfangguna ayu. Anggan ami fag talanan, wami e fakonun ay wami e ngay lanbung, nu katanya, lag gfili angku ay fun.”

⁸ Matuyan, Uda ay furuan Erusalem umrasras wan, aroro ngay taw tagbanwan sanya nafamabo Yawi, siginan nu gfakamulun ay nu glong at mauri. Ay kanya fagayu dewa sis Yawi daga salubangan glong at mauri sa anya.

⁹ Ay katoglag sit ngay kamatan te, e ngay asalanan. Ay kanya fagayu wa kapla gfakamulun at mauri kata ngay taw Suduma nu yud gsuksuk at ngay fakamulun at mauri. Ida! Kanya fagayu afanyuan way lang! Kanya yay fag ngay taw at nafadasug faurianan sat sadili.

¹⁰ Nanlong am sat matuyan fag ngay taw te, “Anud, mauseganan am, aroro gbul ban am ay nainlufuyan siginan ay nafakamulun at masine.”

¹¹ Dewa katanya, longi sat mauri fag ngay taw te, “Ida! Afanyuan wayam, aroro umdasug ban sa ayu faurianan. Namasud sa ayu kata ay nafakamulun sa ay iba.”

¹² Yawi nalong te, “Ku ngay taw, ay ngay baguama kata way sik ngay sisian gfaidapan ayu. Sik ngay mangena way lang tagfangguna ayu. Ay ay ngay tagfangguna gtaban way ayu sat yud matuyan fag dalan.”

¹³ Yawi mafalganan wan laman nanginsaful te, sinu at ke asalanan. Kanya nanginsaful at ngay taw.

¹⁴ Kanya andasug laman namoyung te, sinu fag ngay tagfangguna at ke asalanan. Katatuy at longan sa kafag ngay tagfangguna, “Nafauri am ku tanuman wat ubas, at masuad te, ku ngay taw. Ay nafapnu am sa ay ngay bale nusnge wain ay nabul siginan at yud e kwa fag ngay taw.

¹⁵ Wain ay fagnafauriananun ku ngay taw, ay ay fagnabulun at yud e kwa fag ngay taw at ngay fagagbilugun, kata nu natigna am at ngay alfuyu sas daga?” Katanya tam Fun, Yawi at Mabalyanan at longan.

¹⁶ Yawi nalong yay fia te, “Tagsis furuan Erusalem fag ngay mangena kamatungudun. Kaduge glao kamaseganinaun, ay nu gdama kamaylatan, ay nu glao kamasayaun, ay at famasine sit tiusan bitis kadkalingan.

¹⁷ Nu katanya, namae buyu au at alfuyu, ay kanya ban fagayu umlanu.”

¹⁸ Ginanya ban fag buknga, tam Fun Dius gbul wan kanya fag ngay mangena at ngay famutus buk, ay at ngay dalag, ay at ngay bauyung tagsit ngay tiusan bitis,

¹⁹ ay at ngay sulman, ay at ngay baklo ay at ngay famasine sit alfuyu fag ramit mayangfis,

²⁰ ay at ngay fansifig alfuyu, ay at ngay bauyung tagsit ngay famauyungan, ay at ngay famutus fagwan fag ngay ramit, ay at ngay fagsuadan famaebebanglu, ay at ngay fagmabalyananun fag ngay dalag,

²¹ ay at ngay fanumyu tagsit sumyu ay sit dungus,

²² ay at ngay lanbung at mabyat nu kabayad, ay at fansifig at ngay bilug fag ramit, ay at ngay fagulabeanun fag ngay ramit, ay at ngay fagsuadan salapi,

²³ ay at ngay fagdamaan at kamatan, ay at ngay lanbung at mawatan siginan at masine fag ramit, ay at sangbo taganyang ay anggan at lanbung tangaba.

²⁴ Nu katanya, abat ngate kanya fag ngay mangena mabebanglu, basung way. Ay abat ngate at famutus fagwan sik ramit, sik lubid way, ay abat ngate at buk masine, malanu way, ay abat ngate at lanbung masine, saku way, ay abat ngate at kamatan masine, kapla way.

²⁵ Ay fagayu mangama sis furuan Erusalem umbul sas fagawayanan, gasfuan at ngay tagfawayan at maseganama.

²⁶ Nu katanya, ngayu ban tagwayway ay takabalu sas sakbawan alad. Ay at furuan ban umkata sik mangena at malunggung way lang sis daga at kaksvnan nu kabalu, aroro fagayu at fagagbilugun namin wan.